على صفحة سما سودا في ليله تسلب الألباب=دعاني هاجسي الأول كتبته نار وقاده
دعاني واحتفا بي جيت له حطمت قفل الباب=عصف بي الشوق لأبياتي وقافن طال رداده
احس بداخلي ثورة حمم بركان لو تنساب=يذوب الثلج..يشرب ظامي"وينوخ اشداده
حسبت اني هجرت القاف واثر الهجر للأحباب=رجعت وكني ملاقي حبيب(ن)طول ابعاده
حسبت الوقت يومنه صفالي شوي ليه طاب=وخنته حب ذيك البنت..بنت الفكر ياساده!
بعد ماكنت انا الخاين يخون الوقت في الأصحاب=وكني المس امل في عين قلبن شع بأحقاده
تبي تعرف بعد وش صار ويش يصير من الأقراب=جحودن للجميل ونكر معروف(ن) وحساده
تبي تعرف وش اللي يمنع العبرات لا تنساب=بقايا عزتن واجلال شخص(ن)يصنع امجاده
علامك يوم تنبش خافيات الخاطر المنصاب=علامك ليه تفتح لي فضا ها الكون وابعاده
تبي تعرف ابوزيد الهلالي كيف بيد ذياب=يموت يفارق الدنيا بسبب طغواه وعناده
تبي تعرف..تبي عرف..تبي تعرف كثير اسباب=تخلي العقل ياصاحب يحيد ويعلن احداده
بعد هذا تجيني تقول جاك الشاعر الكساب=تحزم للقوافي واعتلاها صهوة اجواده
انا ما قلتلك بقعا تصقع راسي بالأطناب=اجل ماهمني شعار هذا الجيل واوغاده
وعلى صفحة سما سودا مثل قلبن بياضه غاب=دعاني هاجسي الأول وجيت اربي اولاده