يالله يللي نرتجـي منـك الإنصـاف = ياربنـا المعبـود ياخـيـر هــادي
يالي بديـت الخلـق بالنـون والكـاف = كوّنـت مافـي الكـون تكويـن إرادي
يامسعف الي يرتجي منـك الإسعـاف = لي ضاق عبدك قـام باسمـك ينـادي
قال ابن مهـذل مدمـع العيـن ذرّاف = وقلبي من الروغـات جـاه ارتعـادي
عزّاه ياقلـب ٍ مـن الوقـت منـلاف = لي سج من بلـوى بـدت لـه جـدادي
القلب من مـا شافـت العيـن عيّـاف = فـي غبّـة اللوعـات والهـم غـادي
كم من صغير ٍ شاب من هول ماشـاف = عـن مايسـر القلـب حاديـه حـادي
أيّامنا عقـب الرخـا سـود وعجـاف = وقمـرا سمانـا مغتشيهـا الـسـوادي
وقلوبنا في ذا الزمن صـارت أهـداف = غاير عليهـا الهـم صبـح وهجـادي
ياوقتنـا كـم ذا تعازيـر وإتــلاف = مشروبـي اللوعـات والضيـم زادي
النوم لعيونـي مـن أيـام مـا حـاف = وقع الخبر يحـرم عيونـي الرقـادي
مرحوم ياشيـخ ٍ لـه المجـد رفّـاف = وقلوبنـا تبكيـك عـقـب الـشـدادي
قرناس لك في كـل نايـف تحـرّاف = وعينك تحوف الصيد وقـت الهـدادي
تعلّموا منك الشـرف كـل الأشـراف = في منهجك تمشـي الرجـال الجيـادي
لاوغد يالّي لك علـى العـز ميقـاف = لاوغـد يالطّـام خـشـم المـعـادي
يوم إن ولد الـلاش ماهـوب ينشـاف = في ساعـة ٍ تبـرق سيـوف الهنـادي
عليك يام ٍ تـذرف الدمـع بإسـراف = فقدك على أقصا يام ماهـوب عـادي
عقبك (مكايد) و(الوشل) ترجف ارجاف= رجف المكاين فـي نهـار الحصـادي
عليـك هلّـت دمعهـا كـل غريـاف = قـد شاقهـا فعلـك نهـار الطـرادي
لولا الحيا لأبدي علـى كـل مشـراف = وأعوي عوا السرحان فـي كـل وادي
قلبـي بعـد فقـده تلهّـف تلـهّـاف = حسبـي علـى جِـدّه ودار البـعـادي
فقـده ثقيـل ٍ ماتحمّـلـه الأكـتـاف = والله يسلّيـنـا بصـبـر ورشــادي
ما مات من نسله عديميـن الأوصـاف = كل أبلـج ٍ مـن دون ربعـه يفـادي
ياوالدي طبع الزمـن ظلـم واجحـاف = وبك العوض ياشيخنـا فـي المبـادي
أنت الحجا وأنت الذرا وأنت الأكنـاف = لي صاح صيـاح ٍ ونـادي المنـادي
قصر ٍ عظيم ٍ يزبنك كل مـن خـاف = يمناك طالت يـوم قصـرت الأيـادي
مجد ٍ توارثناه من عصـر الأسـلاف = يشهـد لـه التاريـخ علـم ٍ وكـادي
الحـر ولـد الحـر ياتيـك عـرّاف = يوم الردي ماهـو يعـرف القـوا دي
زرع الردي كم فرّق أحلاف وأحـلاف = ياجعـل زرعـه للدّبـا والـجـرادي
ياوالدي مـن يكسـر الحـق ينعـاف = يِطـرَد ولا لـه بيـن ربعـه قعـادي
إن الـردي ماهـو يجيبـه تلـطّـاف = ماهـو يجيبـه كـون قـدح الزنـادي
والصقر له مبـدا علـى كـل نيّـاف = متعزز ٍ مـن فـوق عالـي المبـادي
لك راية ٍ بيضاء معـا كـل ميقـاف = يـوم إن عدوانـك غشاهـا السـوادي
ملّيـت مـن دنيـا العنـا والتكـلاّف = وأعلنت فـي الدنيـا الدنيّـه حـدادي
مخدتـي همّـي وحسراتـي لـحـاف = ودموعـي الشكـوى لـرب العبـادي
حزني عليه أكبر من الوصف بالقـاف= ويالله عسى في الصبر نلقـا المـرادي
حكم ٍ مضـى ماهـو يـردّه تحسّـاف = هـذا قضـاء ربّـي ومــاالله رادي
بحق مـن نـزّل تبـارك والأحقـاف = اللـي رفـع سبـع ٍ بـدون اعتمـادي
يسقي ثرى قبره من الوسـم وكّـاف = برقـه نخيلـه مـن بعيـد الـبـلادي
وعداد من لبّـى بمكّـه ومـن طـاف = صلّوا علـى اللـي للمخاليـق هـادي