مجالس العجمان الرسمي

مجالس العجمان الرسمي (http://www.alajman.ws/vb/index.php)
-   مجلس عيون الشعر النبطي (http://www.alajman.ws/vb/forumdisplay.php?f=29)
-   -   رديات سعد عبدالله الهتلاني وضيدانبن صبحان (http://www.alajman.ws/vb/showthread.php?t=47175)

سماوي1 07-08-2009 12:22 AM

رديات سعد عبدالله الهتلاني وضيدانبن صبحان
 
ضيدان وسعد
من منا عندما يذكر لنا اسم هذين الشاعرين.. :
ضيدان بن صبحان العجمي..
&
سعدبن عبدالله بن حسين الهتلاني العجمي
رحمه الله
لا ترتسم ابتسامه عريضه على وجهه
من طرافة ما تبلودت بينهما من رديات .. رغم فارق السن بينهما
إلا نهما كانا ثنائي رائع .. يحاول كل واحد منهما
اغاضة الاخر في اطار من المزاح الودود
وقد وجدت لهم روائع
وددت ان تشاركوني قراءتها
ما اوصيكم
تقضبوا عدل
دووووووس
الشاهي

ضيدان في أحد المقاهي :
تطلب لي الشاهي و تطلب لك حليب
. . . وانا على الحليب كبدي ذايبه
أنا احمدالله يوم ما انت بـ لي نسيب
. . . يقطـــع اصبي ٍ مايقـــدر شايبـــه

فرد سعد متأففاً :
قم اطلب لنفسك ترى منت بـ غريب
. . . ولاني بـ طالب لك ولاني بـ جايبه
تبغي الكفيّا يوم طرّيت المشيب
. . . واتعبتني مثل الوزير ونايبـه

رد ضيدان :
في خوة الطيب انا مالي نصيب
. . . ومن خوة الرديان نفسي طايبه
وقد كان ظني فيك للعله طبيب
. . . والاريا .. بها مخطي وفيها صايبه

وختمها سعد:
كل يبي يرمي رفيقه في الجليب
. . . وابليس نـــوّخ عنــدنا ركايبــــه
وعلـّمته الممشى سبقني فالخبيب
. . . اللي علومـــه كلّبـــوها خـــايبه


الطيور الحايمه :

شك ضيدان بوجود ثروه لدى سعد فالبنوك :
عطنا من اللي يا سعد ربي عطاك
. . . عندك فــلوسٍ في البنوك ونايمــه
وانا رفيقك دايمٍ وامشي وراك
. . . وما ادري متى تمطر سماك الغايمه؟
.

رد سعد متأففاً :
اللي عطاني خير بالشحذه بلاك
. . . هذي عطايا الله وذي قسايمـــه

يومك حسود وتوّ .. مابيّن رداك
. . . مـــا عندنا لك مايفطر صايمـــه

.
رد ضيدان يذكـّره :
أظن من زارك بـ بيتك مانساك
. . . ولا ظن مثلك تنّسى قدايمــــه
يا رجل فكّر زين والرب يهداك
. . . عزّم ترى الرجّال من عزايمه


غضب سعد :

تعشّ عندي جعل ما تاكل عشاك
. . . عسى تعشــّاك الطــيور الحايمــه
واللي لنا جابك عسى يقلع مداك
. . . واللي يبي فرقاك محدٍ لايمــــه


فختمها ضيدان بـ :
لا تحسب انا قاعدين ٍ في رجاك
. . . وعاد الجمل يمشي على قوايمه
يالله المعبود جارك و دخلاك
. . . راحت خساره ذا الصبي تمايمه !!


خيمة سعد المهجوره :

اتى ضيدان يتهزء بخلو الخيمه من الضيوف :
يومين غيري ياسعد ما حدٍ جاك
. . . متكرسعٍ في خيمةٍ لك صغــيره
وامــدّ .. لك يمناي وتكف يمناك
. . . ويــاهي على نفس المسيّر كبيره
وابغى تغني لي وانا بسمع اغناك
. . . وترى الغنا ماهو بـ بس لـ " سميره " .


ضيّف سعد ضيدان باستكانة شاي ، ثم رد:

العلقم اللي لونه احمر عطيناك
. . . مكثــّرٍ شايـه ولا فيه شيــــره
خذلك بياله وانقلع عني اهناك
. . . مـا عندنا لك يا اسود الوجه غيره
واللي تسبّه قبل يومين غدّاك
. . . والبارحه عشاك يبغي الستيره
وعيّى يفكه من بلاويك فكـّاك
. . . يوم ابتلش بك ياردي البصيره
وانا اتذكـّر قبل عامين زرناك
. . . يوم انت تطلع بالثياب القصيره
وقفت عند الباب وتحك علباك
. . . اثرك على خبري ولا رحت ديره
واقولها فـ وجهك ولا حن بـ نقفاك
. . . مــا حـنّ للغيّـاب نـاتي بسيــــره


عصابه:

اتى سعد بفكره مجنونه وعرضها على ضيدان :
ضيدان ما ودك نشكل عصابه
. . . نحتل بعض بنوكها والمحلات ؟
إما يجي لي ولك قدر ومهابه
. . . والا تبيّـتنا بيات "الشريفات"
والرجل ودّك يشتهر في شبابه
. . . بالطيب .. والا .. بالعلوم الرديات!
ولا يهتني فـ اكله ولا في شرابه
. . . إلين تطلع صورته فالمجـــلات


رد ضيدان بحكمه وبعد نظر :
تحسب انّـا يا سعد وسط غابه
. . . هاللي تراوالك تراهن عمارات
وموضوعك اللي جبت كله غرابه
. . . والظاهر انه سابع المستحيلات
واخاف لا تنبح علينا الكلابه
. . . ثم هات نسلم من مخاليبها .. هات
ويا بوك ماعمري دخلت النيابه
. . . ومن العمر ما باقي ٍ كثر ما فات
وان كان تبغي الراي قبل يغدا به
. . . من واحدٍ جرب جميع الحيالات
خل الحطب للي يعرف الحطابه
. . . نهارنا شمسٍ وفـ الليل لمبات


اماني ضيدان:

اخذ ضيدان الخيال والتمني :
ياليتني تاجر وبيتي على الطاش
. . . ومساهم ٍ في نفـط بحـر الشمالــي
واشري من اللي تنطح السحب بالكاش
. . . ماهمـّني لو قالوا : الســـعر غالــي
واحجج اللي كاده العسر ببــــلاش
. . . وادفـــع مـــلايينٍ زكـاةٍ لمالــــي
وعندي سعد يعمل مقهوي وفراش
. . . والى بغيت امشي يطرّف نعالي
رجلٍ نعرفه زين ما هو بـ غشاش
. . . والى طلبته حاجةٍ جابهــا لــي
والرجل لا جاوز ثمانين مـا عاش
. . . وان عاش من عقب الثمانين بالي


غضب سعد من "مقهوي وفراش" فكان رده :
البارحه فكري من الهم منداش
. . .من واحدٍ طرش كتابه وجالي
والله مالي خلق نمزح مع اللاش
. . .اللي تمنى الخير له والعنا .. لي
وقد قلت له : دعواك بـ ترد بهواش
. . . وارسل مكاتيبك على احدٍ بدالي
واما اعتذر ما دام الاوضاع تنـّاش
. . . والا .. قــلبنـــا الاولات التوالـــي
ويا صعب فهـّامك وتفهيم الادباش
. . . وبيـّن عليك انك تكت الدحالي
واليوم كثرت التمنى على ماش
. . . يا زين رضخك بالعصى والعقالي
وربعك يعرفونك : كميّخ وعماش
. . . وجهك مهوب من الوجيه الطوالي
يوم انت لا جوّ المسايير تنحاش
. . . مثل الثعل من رافعات الذيالي


وقوع ضيدان بالحب

اشتكى ضيدان من همومه العاطفيه لسعد :
هنّـيتكم من قلب ياللي تنامون
. . .وانا جزت من لذة النوم عيني
نتنا .. من الغالي يجينا تليفون
. . . وحنا على حسب الطلب جاهزيني
واشوف حالي صار من دون في دون
. . . والله ما ادري يا سعد ويش فيني
ولولا الزجاير يا سعد واشقر اللون
. . . ومشاهد اللي مثلكم طيّـبيني
في مجلسٍ ما فيه حاقد وملعون
. . . ولا فيه نمّـامٍ بقلبه دفيني
لارمي بحالي من علوّ البليكون
. . . ويجيك علمي والخبر لك يبيني


تعاطف سعد معه وكان رده :
أنا اشهد ان للحب تأثير الإفيون
. . .وانا احمد الله يوم حن سالميني
أشوف لي ناسٍ من الحب يبكون
. . . الله يعـــافيهــم ولا يبـتلينـــي
ويالربع شايبنا تولع ومفتون
. . . والوجد يومي به يسار ويميني
والحب مالي حيلةٍ فيه تدرون
. . . ومافيه : "يمه قولةٍ إرحميني"
يحب ذا الشايب وهو مـا له سنون
. . . واعيش وكبار العجايب تجينـــي
ويوم العرب بدوٍ وقبل يتحضرون
. . . كم ليلةٍ نبّـح كلاب القطينـــــي
على كلام اللي صفاته يعرفون
. . . وعقــّال من شيباننا الاوليني
لكن هداه الله وجـا .. كنه متكون
. . . وقبل امس علمي به ثقيلٍ رزيني
واليوم جـا .. بمطمـّةٍ كونها كون
. . . الحب واللي يجنن العاقلينــــي
جاك المسير مالقى منـك ترحيـب
لاجبت له قهوه ولامـن قدوعـي
ياليتنـي دوّرت غيـرك معازيـب
جيتك جويع ورحت منّك بجوعـي
الظاهر انك ماتعـرف المواجيـب
لاشك طبعك يختلف عن طبوعـي
حنّا لاجانا الضيف ننفض له الجيب
ونجيب له من كل شكل ٍ ونوعـي
عاداتنا والرزق من عالـم الغيـب
هذا وانا ابخل واحد ٍ من ربوعـي


فجاء سعد بالقدووع ورد عليه :

إقدع عسى يقدع على راسك الذيب
في خايع ٍ مابه من الناس دوعـي
متعطل ٍ في البـر قبلـي تناقيـب
من ليلة الجمعه ليـوم الربوعـي
ومرّوك ناس ٍ غايب ٍ عنهم الطيب
وخلوك وحدك في مكان ٍ يروعـي
ثم جاك ذيب ٍ ماسنونـه بتركيـب
ذيب ٍ ولد ذيب ٍ وشرس ٍ قطوعي
سوّى بك سواة ٍ على غير ترتيب
يجزع لها قلب الشجاع البتوعـي
مرحوم ياعود ٍ كسا راسه الشيـب
هنديته تـذرف عليـه الدموعـي

ناصر آل ذروه 07-08-2009 05:26 AM

رد: رديات سعد عبدالله الهتلاني وضيدانبن صبحان
 
الله الله

سماوي الله يسعدك على هذا النقل

استمتعنا بما نقلت لنا :)

والله يرحم ضيدان ويسكنه الجنه

نفس ماقلت معروفون بالنفس الخفيفه والفكاهه في ردياتهم

لاهنت


وتسلم يمينك

تقبل تحياتي

" مــــابه جديــــد " 07-08-2009 06:44 AM

رد: رديات سعد عبدالله الهتلاني وضيدانبن صبحان
 
لااهنت يالسماوي على النقل الطيب

ناصر ذبحت الرجال الله يهديك:)

الله يحم سعد ويطول عمر ضيدان ولااهنت يالشيخ على الاختير الجميل والنقل الطيب

ناثرة الورد 07-08-2009 03:15 PM

رد: رديات سعد عبدالله الهتلاني وضيدانبن صبحان
 
{{ سمــاوي 1 }}

,
,


آآبداع غير مستغرب
دمـت بهذا الرقي

تقديري ..,

الغروب 07-08-2009 03:55 PM

رد: رديات سعد عبدالله الهتلاني وضيدانبن صبحان
 
سمــاوي 1

اشكرك على تقديم هذه الرديات الطيبة

تقديري.


الوقت في المنتدى حسب توقيت جرينتش +3 الساعة الآن 05:59 PM .

مجالس العجمان الرسمي