طيبك يبـو خالـد هماليـل وبـروق = وطاريك يشبه طـاري سهيـل لا لاح
المدح فنجال(ن) لـيمنـاك مسيـوق= مادام طيبـك فـي دلال الفعـل فـاح
والشعر لك مسيوق والطاق مطبـوق = ومسامعك من حقها جنـي الاربـاح
تفعل يمينك فعل مـا هـو بمسبـوق = وعندك لـبيبان الصعيبـات مفتـاح
مكانتك فوق الشواهيق مـن فـوق = ولك في دروب المجد مسرى ومسراح
شوفتك تبهج خاطر(ن) كان مبنـوق = ووقفتك تجلي هـم وتـداوي جـراح
لاجاك من همه جبل يشتكـي عـوق = داويت عوقه بالـدوا والجبـل سـاح
ولا جاك من له من ورا الظالم حقوق = عود بحقـه يقلـب اتراحـه افـراح
وخوتك تنبت في حشى القلب زملوق = وخوي جنبك مـن سواقيـك ميـاح
يشفق عليها راعي الطيـر ويـروق = لا راح معك العمـر مـا يعتبـر راح
في خايع(ن) كله خزامـى ورقـروق = ريحه طوال الليـل والصبـح فـواح
يشفي خفوق(ن) فيه من وقته فتوق = والبال مع شرواك يا شيـخ ينسـاح
وهد العديم الي علـى طلعـه يتـوق = يرخي جناح ويوعـد ويكفـت جنـاح
لو تنطحه ما شفت في سيقه سبـوق = شلايلـه كنهـا دناديـش مسـبـاح
ما طار لو من بعد ملحوق ملحـوق = والخرب لا ناشه وهو عازم(ن) طاح
كنه مـن فـواده الا طـار منتـوق = ما هـوب للريضـان لاهـد مسـاح
من يوم جاني ما تمشيـت بالسـوق = ولا شريـت مـن المحـلات تلـواح
مثله عن البيع وعن السوم مفهـوق = ومثلك يبو خالد لـه الشعـر نضـاح
وشعري عن الي ما يحاليك مرفـوق = ولاني لغيـر الطيـب القـرم مـداح
ما غيرك وقت(ن) به العمر مسروق = عن التراث تـذود بسيـوف ورمـاح
عز القنص بالطير والخيـل والنـوق = فالبـر خيـال(ن) وفالبحـر سبـاح
على طريق العود لأقدامـك تسـوق = زايد عسى الفردوس له بيت ومـراح
ومن تحته انهار وعلى راسه عذوق = جعله مثل ما ريـح الشعـب يرتـاح
الي بنى بالعـزم بالرمـل شاهـوق = وجنى من الصبخى كمثـرى وتفـاح
محبتـه بقلوبنـا شــي مـوثـوق = وغلاه مهمـا كـان باقـي ولا زاح
ابوك يا محمد على المجد من فـوق = وانت اشتريت الطيب والمدح الاربـاح
المدح فنجال(ن) لـيمنـاك مسيـوق = تقهو دام المدح مـن خاطـري فـاح