يا بنت أنا للشمس في جلدي احروق=وعلى سموم القيظ أنا أطوي عباتي
أطرد سراب اللاال في مرتع النوق=ومن الظما يجرح الساني لهاتي
عاري جسد.. والليل هتّان وبروق=رعشة شمال البرد تسكن شفاتي
لاجا الربيع أنبت خزاما ورقروق=وكأنه دهر ٍ تيبس فيافي حياتي
إن عذربوني بعض خلانك اصدوق=يابنت أنا عشق الخلا من صفاتي
أنا بدوي ثوبي على المتن مشقوق=ومثل الجبال السمر صبري ثباتي
ومثل النخيل أخلقت أنا وهامتي فوق=ما اعتدت أنا أحني قامتي إلا بصلاتي
إلى افتخر بفعال يمناه مخلوق=يا بنت أنا فعلي اشهوده أعداتي
الله جعلني وكلمة الحق بوفوق=وملكت الأرض .. وراس مالي عصاتي

يا بنت أنا للبحر في خافقي شوق=ومن السفر والغوص هذي صفاتي
أتبع نجوم الليل وسط السما فوق=وتاقف على حد المنيه حياتي
في غبة ٍ وسط البحر عيشتي بوق=والملح كنه في لساني حلاة ٍ
إن كان طعتي بي .. مطاييش وطفوق=ولا سمعتي ما حكوا بي وشاتي
أنا حضري بيتي من الطين ملصوق=ولاهمني سيل المطر من رهاتي
مادام لي بين المخاليق معشوق=لاجله أنا حملت كفي وفاتي
أكتب عليه من الشعر كل طاروق=واللي يجي كله على مشتهاتي
وإن كان يجهلني أنا اليوم مخلوق=منكي أنا.. ما ظن هذي جزاتي
ولو كان لي يم البحر دم وعروق= تاج البداوه فوق راسي.. غناتي