ياراكب الي مـاورد مثلـه ولاجالـه مثيـل=ألا مع رجالـن تفاخـر فالزمـن بأموالهـا
النوع لكزس فل كامل والمديل آخـر مديـل=مصنوع خصيصن لقومن تستغيض امثالهـا
وصفة ليا منه نطحك وجـاك قـدام المقيـل=شيهانن يشوف الفريسـة والعـرب تبرالهـا
ولونه ليا منه عرضلك لون ناقضة الجديـل=الي تهبـل عقـل ناسـن ماتعـرف هبالهـا
واليا قفاك وراح مقفي كنـه المطـرود ليـل=والقوم من خلفـه بنادقهـم يثـور إشعالهـا
ماكمل أسبوع التجـارب تـو ورده الوكيـل=في ديرتن فيها المواتـر مايعـرف اشكالهـا
عليه روح يانديبي وأنـت فالمسـرى دليـل=للديرة الي غيـر عـن كـل الليـال ليالهـا
ديرة هل الطالات وأهل الجود والفعل الجزيل=ياميتـن بيـن الخلايـق عاليـن منزالـهـا
وصل سلامي للنشاما مرويت حـد الصقيـل=أهل الفعول الي تنومـس والعـرب تعنالهـا
وقل للزميل الي حشى ماشفت جاء مثله زميل=عبدالله عبيـان نسـل المرجلـه ورجالهـا
الله يبارك في حياتك يالاصيل ابن الاصيـل=وقفتك بيضـاء والنشامـا تفتخـر بأفعالهـا
ولاهو غريب الطيب منك ولاعليكم مستحيل=دام الجدود الطيبـه طابـت جميـع عيالهـا
انتم هل الوقفه وأهل فعلن مثل وبل المخيـل=لا ثارت الهيجاء وبايـن للرجـال رجالهـا
تشهد لكم ماض الليالـي بالحقايـق والدليـل=وتشهد جميع الناس في شرق الدول وشمالها
شهادة لركان ابن حثليـن كسـاب الجميـل=اسطورة التاريخ شيـخ الطايلـه وأبطالهـا
وشهادة لربعه هل الوقفات والسـاس النبيـل=وأهل المكـارم فالمواقـف ماتبـت حبالهـا
قلته وانا ربعي ذوي زراق مزبـان الدخيـل=العزوة الي في سنام المجـد محـدن طالهـا
من روس قومن فالمواقف لاتكـل ولاتميـل=قومـن تطابـق فالليالـي فعلهـا وأقوالهـا
عتيبه الهيلا هل الوقفـات والفعـل المهيـل=الشجرة الي في شداد العـز ظـل ظلالهـا