رجوت قلمي ان يكتب بدلا عني
كنت جاي قبل شوي من المكتبه وتخيلت هذا الحوااار بيني وبين القلم واليكم ماا حصل بيني وبين قلمي ... فالح: يا قلم اكتب بدالي لان مزاجي شوي مهب رااايق القلم : وليه عسى ماشر ... دور غيرها !!! فالح: صدق والله ما لي خلق اكتب ... واكتب بداالي القلم: طيب انا بكتب بس تعاهدني إنك ما تسويلي شي ولا تكسرني ولا تهددني فالح: ليه ناااوي على شر؟؟؟!!! القلم: لا بس ابغي آخذ العهود والمواثيق فالح: طيب ماارااح اسويلك شي وعد القلم: لا حبيبي غير هالسوالف .. تراني في وجه ابو حمد الشامري المدير العام القلم: تكفى يا بوحمد اذا سوالي شئ وقف عضويته تراني في وجهك فالح : اهب يا وجهه انشهد انه ناااوي على شر!!! القلم: لا لا من اللي قالك تقولي اكتب بدالي فالح : طيب قلنا اكتب مهب تهدد القلم: موشغلك انا بكتب وفي وجه ابو حمد فالح : زين زين اكتب بس القلم: اخواني الاعضاء انا بكتب عن شخصية فالح تراه مهاااايطي درجه اولى إخذ وخل لا يغركم!!!! فالح : حسبي الله عليك و و القلم: اقول اسكت .. انت قلت انا اكتب رجاءا تسكت انا في وجه المدير العااام القلم: صحيح انه طيب بس اذا عصب جعل عاليها سافلها .. ولا وبعد ينسى نفسه .. اسألوني عنه !!! فالح : يا ولد تعوذ من الشيطاان القلم: يا حبيبي انت خليت فيها شيطان اقولك اسكت احسن ولا فلصت بالعلوم كلها القلم: لا وبعد يتكلم عن الاهداف يتكلم عن الاهداف ويرسم اهدافه وفي نصف الطريق يضيع اهدافه .. وما يدري وينه رايح .. اقوووول روح المخفر احسن لك فالح : خلاااص لا عااد تكتب ... الله لا ينفع بك القلم: حبيبي رااااحت عليك ... احسلك اسكت لا اجيب الطواااام والطمااااط!!!! فالح: زين زين جعلك السلال عاااد فيها طوااام القلم: ذااابحني كرف كرف اكتب اكتب ولا فيه فاااايده ولا متجمل القلم: ومواااضيعه ممله ابداااع ابداااع خلاااااص عرفناااا القلم: لا ويعني ثقييييل ما يدش الترفيييهي... يا حبيبي استرييييح فالح : والله ما اخليك يا ذا الحدبه القلم: اقوووول روووح انا في وجه المدير القلم: تراااه غبي لا يغركم اذا سمع السالفه سااااعه على ما يفهمها وساعه على ما يستوعبهااا واذا يبي يكتب موضوع عشرين مره يكتبه ويمسحه جنني فالح: والله ما اخليك !!! القلم: اقووول اخذ لك فره على دوااار الجامعه احسلك القلم: لا ويعنني حاااط نفسه متواااضع وهو متغطرس جباااار انتوووو شوفوا شكله بس القلم: وذاابحنا يقول فيه فرق بين الثقه بالنفس والغروووور... يعني كلش الحين فالح : لعنبو غيرك خلاص القلم: اقوووول على شحم واسكت والله اذا ما تسكت لا اجيب العييييد القلم: والله يالربع انه مجنووون ما غييير يكتب ماااكو شغل ذبحني جنني وياااليته ينشر ما غير يكتب في ذا الدفاااتر ويخلييها طااايحه القلم: والله لو اقووولكم وش يكتيييييب علوووووووم فالح : لعنبااااك بس تكفى خلاص القلم: والله اللي يدفع لي اعطيييه علووومك ... من قاااالك تقولي اكتب القلم: لو تدرووون وش يكتب ذا المطووووع فالح : يا ليل من انت ليله القلم: الليل والله سااااااري القلم: والله ما عرفتله مره خواطر ايمانيه ومره خوااطر روومانسيه ومره كتاااباات عشوائيه ومره ابداااعيه ومره خراااابيط في خرااابيط ومره مسرحيااات خياااليه وانا ما كوا شغل ماااغير اكتب و و و و فالح : طرااااخ كف على وجهه القلم: بسم الله الرحمن الرحيم وش العلم؟؟!! فالح : انت خليت فيها علم يا السلوقي القلم: تكفى يا بو بدر والله كنت سكراااان ... شااارب لبييينه من البقاااله ومضييع الجاااده القلم: والله مدري وش قلت تكفوووون يا اعضاااء المنتدى تراااني في وجيهكم تكفى يا المدير العاام القلم: والله ان يبريني ذا المطوع في البرايه إلييين يخلييني قراااش قلم يا ويلي ويلاه فالح : يا الربع وش اسووووي فيه ... الحكم لكم !!!!! كتبه فالح بن محمد |
القلم: والله اللي يدفع لي اعطيييه علووومك ... من قاااالك تقولي اكتب
وش تسوي به !! عطني القلم وبـ دفع له !! الاخ الفاضل \ فالح العمــره حوار رائع .. والله جد صور لنا طبيعة فالح العمره وروحه الطيبــه .. اشكرك ويعطيك الف عافيه لكـــن !! طلبتك ماتسوي له شي ..! قول تم !! دمت بألف خير تحياتي |
اخوي فالح العمره .. والى القلم اللي عطوه كف هههههه ( طرااااااااخ ) اخوي .. الله لا يحرمنا من كتاباتك انت وقلمك .. وانت مبدع اخوي فالح .. وانا على فكره ما ادخل الترفيه .. مو شرط .. تكفي كتابات قلمك ومواضعيك الممتازه ... انتظر رد ابو حمد الشامري لك .. ومره اخرى .. الله يلا يحرمنا من كتاباتك وقلمك يا اخوي فالح . |
ههههههههههههههههههه
مبدع دائما اخي العزيز لك اصدق التحايا |
هههههههههههه
مناقشة وحوار ساخن بينك أخي ابو بدر وبين القلم اللي ما شفنا أطول من لسانه الله يعيينك عليه أنا أنصحك بالكتابة بالقلم الحبر أحسن :) لا هنت أخي ابو بدر على ما طرحت وعساك على القوة. |
مرحبا بك اختي الفاضله المستحيله
لا هنتي على الحضور والتعليق والله انه تم ... حظه نجا هالقلم من الهلاك .. بس بحوله للاعمال الشاقه ... اخليه يكتب ويمسح يكتب ويمسح |
مرحبا بك اختي الفاضله نور الليالي على الحضور والتعليق الطيب
وما عليك من سوالف القلم لا تصدقوونه كااان شارب لبن ودايخ البارحه |
مرحبا بك اخي الفاضل صفو الوداد
ولا هنت على الحضور يا الغالي ... وما دام القلم قااال الي في خاطرك بحذفه من اعلى شاهق في الاردن ليكون عبره للاقلام المأجوووووره ههههههه |
هلا يا بو مسعووود شفت شلون يا بو مسعووود هذي آخرتها مع هالقلم
قعد يخوووورها بس شكلي باااخذ قلم مااااركه عالميه عالية الجوووده |
اخي الفاضل فزاااع مرحبا بك ولا هنت على الحضووور وحمدلله على السلامه
اما بالنسبه للقلم خليته شوي ينفس عن مااا في خاطره خاااف ينتحر وابتلش فيه سعدت بحضورك اخي الفاضل |
هههههههههههههههههههههههههههههههههه
انشهد يا بو بدر هذا مال حذف من النهر الي انت خابر هههههههههههههههههههههههههههههههههههههههههههه |
هلا وغلا يا بو مسعوووود لا يا رجااال خل النهر في حااااله
القلم ذا يخرب النهر علينا لو احذفه يصير طوفااان خلنا على حذفته من اعلى شاااهق |
هالحين القلم في وجهي وتقوم تعطيه كف هههههههههه ما يصير يا ابو بدر لازم نقدمك لمحكمة مجرمي الحرب علشان ينظرون في قضيتك وقاضي المحكة العنيد وكيل النيابة راكان اليامي والمحامي محمد الشامري ذولا كلهم ضامنه:p يعني بوقفون مع القلم ضدك واولهم محاميك محمد الشامري هههههههه:p
لا هنت يا ابو بدر ونصيحتي توسع صدرك على القلم المسكين :p |
هلا هلا بالواسطه
يا بو حمد جنني هذا القلم العاق ... يا ولد باعها لو ما صكيته كف كان فلص بالعلوم كلها زين اني لحقت عليه لا ويقول شارب لبن ودايخ والله انه دايخ وبعدين حاط القاضي العنييييد لا بالله رحنا فيها ... عزالله بننخلط خلط راكان تكفى يا بو سالم ضبط الاموووور لحد يخليني المحامي يا جماعه حاطيينه على برنامج وجها لوجه وووين يفزعلي وهو مبتلش في نفسه لالا يا بو حمد هذي مدبره بليل تحياتي يا المدير |
.
هلا بك اخي الغالي فالح العمره الحقيقه كل يوم تسعدنا طلتك الغاليه بموضوع شيق لكن المره هذي سرق القلم منك الاضواء وسلطها لنا على جانب من شخصيتك لم تكن تتضح لنا ولا حتى بالمجهر لذا ياعزيزي انا اشكر هالقلم الي وضح لنا هذا الجانب المخفي في شخصيتك والي بيخلينا نطالبك بمزيد من العطاء حول الامور الي كانت تخفى علينا ففي سياق حديث القلم عن شخصيتك بانك تكتب خواطر ومنوعه فمنها الايماني ومنها الرومنسي لا تقول يابو بدر انك كبرت على الرومنسيه لازم نشوف لك شي من هالنوع والنوع الثاني بعد ومن ذا المشاركه لا ترد علي الا ونت معطينا وعد ان حنا نقرى لك شي من الخواطر بالنوعين فشرايك طال عمرك ؟! عاد اذا ماستغلينا تغريد القلم بذا الوقت متى بنستغله الي حاسني والله ذا المخمس الي جاه منك تلقاه جاه وهو داق طبلونه ههههههه المهم يابو بدر راجع كلامي وعطنا وعدك اليوم يالسنافي ومني لك اغلى سلاااااااامي |
مرحبا اخي الفاضل فااارس ولا هنت على حضورك وتعليقك الطيب يا الغالي
يا رجااال ما عليك من ذا القلم الفاصل ... يا رجال كان دايخ البارحه من شرب اللبن لا تصدقه ما عليك منه ... انا ذلحين مسكر عليه في الكبت حبس انفراادي مرحبا بك يا الغالي |
ابو بدر عيني في عينك :)
بدر القلوب : الله اكبر وش هالزين القلم : ماعليك منه ترى كلها خرابيط بعدين انت ماتشوف ان فالح متقلب بدر القلوب : لا والله ماهو متقلب الرجال يكتب ويتلاعب بالمفردات القلم : لا والله ماهو تلاعب هو انسان ذبحني بكثر الكتابه على عماها بدر القلوب : بالعكس فالح انسان يعبر عن رايه عبر الكتابه بك وهو يكتب رايه ويدون مايمليه عليه ضميره من قضايا الم ترى موقفه من المراه في الانتخابات القلم : رايت موقفه وليتني انكسرت قبل ان يكتب ماكتب ;) بدر القلوب : بالعكس فالح يعجبني انه يكتب رايه بحريه ويتقبل راي غيره القلم : بس احيانا فالح يضيع في القوايل :) بدر القلوب : اقول لاتخور ترى الرجال عزيز على قلبي وتراني مارضى عليه القلم : يعني تبي تقولي انك يابدر القلوب تتقبل راي فالح وكتابته رغم الاختلاف فيما بينكم بدر القلوب : ايه اتقبل رايه وبكل حب بعد وارد عليه برايي ان اقتنع فيه زين وان ماقتنع بسلامته القلم : عجبي كيف تفكرون انت واياه بدر القلوب : انا وفالح ثنائي رغم اختلافنا في بعض القضايا الا اننا نبقى اخوه القلم : الحين بتفكني من فالح والا وشلون بدر القلوب : اطلع وتراك في وجهي من فالح واكتب اللي تبي القلم : يعني مافيه طراقات بدر القلوب : ماكو طراقات ماكو الا رفسه على مؤخرتك ان لم تنته عما يدور في ذهنك القلم : يعني ماحنا بخالصين بدر القلوب : لا بنخلص بس انضبط وابشر بالي تبي القلم : اطلع اروح انا حر " اعطني حريتي اطلق يدايه " بدر القلوب : اذلف رووووح طراااااااااااااااااااااااااخ صك الباب :) |
الله الله الله يا بو محسن
والله الذي لا اله الا هو قد تختلف الأقلام ولكن القلوب لا تختلف يا بو محسن لدي قاعده في الحياه جديده خالفني بلسانك وقلمك ولا تخالفني في قلبك فعندما تتصافح القلوب تصبح بدرا للقلوب ... وما فالح الا قلبا احب بدر القلوب والله على ما اقول شهيد |
فالح : يا ليل من انت ليله
القلم: الليل والله سااااااري استاذي ابو بـــــدر الله يعطيك الف عافيــــــه |
ابو بدر ياليتك ماعطيته كف خليته يفضفض عن مافي خاطره
كان بيجيب لنا العلوم الباقيه ههههههههههههه بعدين ليش تعطيه كف وهو في وجه مديرنا ابو حمد مالك حق في اللي سويته:cool::cool: كلكم مبدعين انت وقلمك سلمت على ماكتبت يابو بدر |
يا مرحبا يا بو حزاام ولا هنت على الحضور يا الغالي
والله يعافيك من كل مكروووه |
ارحب يا الشاعر المغوااار حبيب ولا هنت على الحضور والتعليق
يا حبيب حظه اللي جاه كف مهب مشعااااااااب على رااااسه لا هنت لا هنت يا الغالي |
حكمت المحكمة حضوريا : بشنق فالح العمره لمدة خمسه دقيـــــــــزه<<<دقيقه!!!! وكما سيتم السماح له بان يصلي ركعتين قبل الشنق!!!! بس هاه لا حد يروح يسوي لنا فيها صلاة التراااويح!!!! مشنوق يعني مشنووق
وذلك لانه اخطأ بحق هذا القلم الرائع<<<<< صح القلم طول لسانه <<< لكن تستاهل انت <<< ابو بدر القاضي العنيد يقول لك : لولا هذا القلم ماكنت ستصل الى ما وصلت اليه من مراااتب عاليه جدا في عالم القمم والهمم العـــــــــــــاليه ...... ولولا القلم ما كان أصبحت دكتور!!!!! لا وعادك ناشب في حلقه !!!!! وبما اني القاضي فلي الحق الكااااااااااااامل في اصدار اي حكم في حقك!!!! نحيطكم علما بانه سيتم حرمان فالح العمره ابو طاقيه من مسك القلم لمدة لا تقل عن ثلاث دقائق وعشر هللات..حتى نرى ان كان يستطيع العيش بدونه!!!!!! فالى المشقنة يابو بدر !!!! يلا قدااااااااااااامي!!!!! ولا كلمة اششششششش !!!! ههههههههههههههههههههه بارك الله فيك يابو بدر انشهد انه موضوعك راااااااااااااااائع والله !!!! قريته للمره الثانيه حقيقه .... كما لا تنسى من سيقراه معي!!!!!! الناس الي انت خابر!!!!! لك خالص شكري وتقديري!!!! |
ابوبدر
سدحتي انت وقلمك ضحك الله يهديك ههههههههههههههههههه موضوع رائع كالعاده بس ابشر بالفزعه وانا محاميك وماعليك موضوع وجها لوجه مايشغلني عنك ابد ابشر بالفزعه يالعنيد انا اطالب بـ استنئاف الحكم <<< توه متعلمها من فيلم والله ههههههههههه المهم لاهنت والله يابوبدر على ذا الموضوع والله يعطيك العافيه انت وقلمك |
مرحبا بك يا القاضي
والله انا ما تفاءلت بالحكم لما حطك ابو حمد القاضي قلت رحت فيها على طوووول كل ذا علشان ذا القلم بأطلق سراحه الليله لاني حابسه حبس انفرادي وبشوووف وش بيكتب الليله هههه لا هنت لا هنت يا العنيد |
ارحب يا منصووور
عندك العنيييد واسأنف الحكم معه والا استخدم السلاح الابيض ((( المشعاااااب ))) لا هنت لا هنت |
محاورة وايييد قويه اخوي فالح العمره وفي نفس الوقت لها هدف معين ما يفهمه الا من وصل لفكر فالح العمره,,,,,
يزاااااااك الله خير عــــــ هالموضوع والوااايد زين,,,,,, مشكور اخوي |
مرحبا يا شامخ الهامه ولا هنت على حضورك
اسعدني ما كتبت في شخصي البسيط.... اشكرك جزيل الشكر |
حوار هادئ بس لازم تحجزه في شبك وتحط عليه مشوك ثم تتفحصه .ولا تكون دكتاتوري على سلاحك في الميدان ألا وهو قلمك الجرئ الصريح وخلك كما عهدنااااااااك صاحب الصدر الوسيع .
|
يا مرحبا يا مرحبا يا بو سعد
وين هالغيبه يا السنافي ما عليك من ذا القلم دواااه عندي!!!!!! اخيك فالح |
هاهاهاهاهاهاهاها التعليق الوحيد الذي سوف أعلق به على هذا الموضوع هو ( جعل مانيب قلم عندك :) ) بارك الله فيك ونفع بك وبعلمك يا فلذت كبدي :)
|
مبدع دائما اخي
لك اصدق التحايا |
ارحب يا بو محمد ولا هنت يا الغالي على حضورك والتعليق الجميل
|
ارحب يا سعد ولا هنت على هذا الحضور
|
رد: رجوت قلمي ان يكتب بدلا عني
اخوي بوبدر
أما آن لهذا القلم أن يسطر لنا ابداعا جديدا منك ؟ قرأت الموضوع باستمتاع تام وحزنت على حال قلمك المسكين ! بارك الله فيك ونفع بك اختك شوق الكويت |
رد: رجوت قلمي ان يكتب بدلا عني
مرحبا بش اختي الفاضله شوق الكويت
ولا هنتي على حضورش ولعلي اعود بالقلم لساحات المعارك |
رد: رجوت قلمي ان يكتب بدلا عني
اشكر اختي شوق لرفعها الموضوع من سباته ..
حوار جميل جداا مع القلم وصاحب القلم امتعنا حقيقه وعرفت جانب اخر من شخصيه بو بدر لم اكن اعلمها .. اسعدك الله يابوبدر دنيا وااخره.. وفي انتظار جديدك :) |
رد: رجوت قلمي ان يكتب بدلا عني
يا مرحبابش اختي الفاضله مهرة النسيان
ولا هنتي على حضورش وما حمل |
رد: رجوت قلمي ان يكتب بدلا عني
ههههههههههههههه لاهنت يابوبدر على الحوار الجميل الي خلانا نعيش الواقع وتقبل تحياتي |
رد: رجوت قلمي ان يكتب بدلا عني
ارحب يا بو محمد ولا هنت حضورك وما حمل
واضحك الله سنك |
الوقت في المنتدى حسب توقيت جرينتش +3 الساعة الآن 07:58 PM . |
مجالس العجمان الرسمي