اي والله ان قد ودي اصد واغيب=ومن غاب لحقته المشاريه لا غاب
لاصار مالي فالدعاوي مطاليب=جنبت لو مالي عن الدرب مجناب
بعض الدعاوي ما وراها مكاسيب=خصٍ ليا من عودت بين الأقراب
فكرت فالدنيا وبعض الأصاحيب=ولقيت حالي بين طالب وطلاب
ناسٍ تجازي فاعل الطيب بالعيب=ودنيا تشيب راس من مابعد شاب
وناسٍ يعود طيبها فالأجانيب=ويخزيك يابيتٍ بلا عمد وأطناب
وناسٍ غدوا لبيت المذله معازيب=لاشافوا راع المال صاروله أذناب
لا فراسها عرفٍ ولا رايها مصيب=اتجامل الكذاب لو كان كذاب
أطيبهم اللي ان جيت جر التراحيب=وان رحت يشذبني مع كل شذاب
راحوا مقر الطيب من ذكرهم طيب=فكاكة الحجه مفاتيح الأنشاب
من نحتمي بظلالهم ساعة الريب=قطاعة الفرجه طويلين الأشناب
لو الليالي في طرفها مواجيب=ماخلت كلاب العرب تلبس ثياب
وياذيب شف منت بولد شالحٍ ذيب=وياعقاب منت عقاب سعدون وحجاب
المال خلاكم كبار المناصيب=وصرتوا في عين اهل الخنا ذيب وعقاب
ولابد فالدنيا تدور الدواليب=وحنا فرجى اللي من ترجاه ماخاب
نرجيك يامن تعلم السر والغيب=تفتح لنا من باب رزقك مية باب
ومادامت الدنيا نصيب ومكاتيب=نقنع بما جانا ونرضا بالأسباب
ويالله توفقنا على الخير والطيب=من قبل لا ندفن تحت كومة تراب

المشاركة الأصلية كتبت بواسطة الغروب (المشاركة 781108) الاخ / متعب تسلم عالاختيار الجزل لقصيدة وليد بن رسمه وصح لسانه ولك الشكر

المشاركة الأصلية كتبت بواسطة عويضه الوقدان (المشاركة 781113) متعب أختيارك للقصيده موفق ولاهنت وصح لسان الشاعر وليد أبن رسمه وتقبل مروري وتحيتي