جاني وانا في وسط ربعي وناسي = جاني نشلني مثل مـا ينشـل النـاس
مني نشل روح تشيل المآسي = تشكي من أيـام الشقـى تشكـي اليـاس
اثر الألم في سكره الموت قاسي = ما هالني مثلـه و أنا إنسان حسـاس
جابوا كفن ابيض مقاسه مقاسي = ولفوا به الجسم المحنـط مـع الـراس
وشالوني أربع بالنعش و متواسي = عليه ومغطى علـى جسمـي البـاس
وصلوا علي وكلهم في مآسي = ربعي ومعهم نـاس مـن كـل الأجناس
يا كيف سوا عقبنا تاج راسي = وأمي الحبيبة وش سـوى بهـا اليآس
اسمع صدى صوت يهـز الرواسـي = قولوا لهـا لا تلطـم الخـد يا نـاس
قولوا لها حق وتجرعت كاسـي = لا تحتـرق كـل يبـي يجـرع الكأس
أصبحت في قبري ولا به مواسي = واسمع قريـع نعولهـم يـوم تنـداس
من يوم قفوا حل موثق لباسي= وعلـى رد الـروح صـوت بالأجراس
هيكل غريب وقال ليه التناسي= صوته رهيـب وخلفـه اثنيـن حـراس
وقف وقال أن كنت يا نمر ناسي = هـاذي هـي أعمالك تقـدم بكـراس
ومن هول ما شفته وقف شعر راسي = وانهارت أعصابي ولا أرد الأنفاس
يا ليتنـي فكـرت قبـل انغماسـي = بالغفلة اللـي منتهاهـا للإفلاس
و فزيت من نومي على صوت ناسي= واصرخ وأقول الموت وأحذر الناس