برد الجفا ما يرحم ضلوع مغليك=يلعب بحسبة شوقي اللي فضحته
حتى لو إن البعد غيّب طواريك=عيّا يتخلى عنك قلبٍ جرحته
حبك بقلبي مثل عرش المماليك=وحبي بقلبك ما أنمسح لو مسحته
تسترسل الدمعات من فوق خديك=فديت دمع الشوق لامن لمحته
تبغيني أجي قول لي كيف ما أجيك؟=وأنت الوحيد اللي بعمري ربحته
الوصف يستعصي في هيبة معاليك=ولا أظن يكفيني العمر لو شرحته
يا من غلاك مذوّبٍ مهجتي فيك=إسمك على جدران صدري نحته
أسهى وأحس إنك تنادي وألبيك=يا ويل حالي جبت عيدي وبحته
أنا دخيل عيونك السود يكفيك=ذبحت قلبي من غلاك وفضحته
نذرٍ على رقبتي نذر إني أبغيك=هذا الصحيح بخاطري واستبحته
ما باقي إلا أخطفك وأنهزم فيك=ومن جاء على أثرنا من أهلك ذبحته