آه يا هشمي ويا سعد عينك ياطلال=ماحدٍ قبلك يلا جا الجميله حبته
وكل من شافتك جاها على ضمك اهبال=وضحكت لك وابيض الكف يمك مدته
ما حسدتك نعمة الله بقصد انها تزال=ولاب عيني لاضوى رزق غيري صدته
قلتها من باب مشروه ضيقه وانفعال=باب مشروهٍ فتحته وصعب سدته
ماخبرت ان خصلة البخل فيك من الخصال=خابرك ان بيتك جزيل الهدايا مدته
بسألك وأصدقني القول في رد السؤال=يمكن ان تسلم مشاريه ابوك وهدته
يوم جتنا فتنة الشوف باهية الجمال=والنظر بعيون الاعجاب يمك لدته
واستحت مني وبالدس قالت لك تعال=وضمتك ضمة غلا سعد منهو ضمته
ومتعتك بشوف خدٍ مثل نور الهلال=غطته يوم استحت كنها ما غطته
ومتعتك بشوف عينٍ هدبها له ظلال=في نظرها كن سيف المهلهل سلته
ومتعتك بمبسمٍ ما بلغني ويش قال=كن عصير التوت الاحمر عصارة شفته
ليش يوم انك تمكنت من شبه الغزال=لحظة لو تطلب اكبر طلب ما ردته
ما ذكرت ابوك بالخير ياذرب العيال=تدري ان وده يجيك وترده عزته
كان قلت ابوي بنحط له معنا مجال=تعلمين انه خويي ولزمت خوته
عاقل وان شاف نوعك يجي فيه اختلال=بس ما يرخص وقاره وينسى عفته
اسمحي له بس يسمع معي همس الدلال=ولا حصل له كلمةٍ منك حلوه كفته
لاكن انك صرت اناني وخيبت الآمال=احتكرت الربح والوقت ما أقصر مدته
لين جا الجمس المظلل ووقفا به شمال=وفي الرياض وزحمةالسير ضاعت يمته
ثم وقفت اعاتبك وانت ما تبغا الجدال=لن مثلك لو يجادل تدينه زلته
وصار فينا من سقى الكبد من العذب الزلال=والطرف لآخر عسى مايموت بعلته
ياعذابي كان هاجوس ابو طلول طال=وطولت غيبة منامٍ عيوني ملته
وياعذابي كان صورته دامت في الخيال=ما محاها دمع شوقٍ عيوني هلته
اشهدٍ زين الغنادير هو سحر الرجال=ما بعد حسيت بالظعف كون بسبته
وانت يا ناسي خويه حسابك لا يزال=تدري ان ابوك ماهوب ينسى حقته
الوعد عند البقاله وقول أبغى ريال=وكل حادث له حديثٍ يناسب حزته
قبل قولتك أبشر برقم هاتف الاتصال=وأبشر بحيه عرفته وموقع فلته
لا تحسب إنك بتقدر على حل الشكال=ولو جمعت أعضاء مجلس الأمم ما حلته