مجالس العجمان الرسمي - مبروك لفلاح بن سلطان بن حثلين التزكية

يستاهل ولد سلطان , و الله ينفع به ربعه و زملائه , وهذا يا فلاح تكليف و مسؤلييه نسأل الله عز و جل أنه يعينك عليها و يسخرك لها , و أعلم أن قدر هذا البيت الكريم ( ال حثلين ) كان و لا زال في خدمة القبيله و الدوله و لأكثر من قرن من الزمان .
هذا و أود أن أهديك رائعة الأمير ( جدك ) فلاح بن راكان بن حثلين و هي من أروع ما قيل في ذلك العصر , و الدليل هو رحيل الشيخ فلاح بن راكان و لا زالت هذه الأبيات حية و تتقاذفها الأجيال من جيل الي أخر,,,.

الشيب يا خالد بدا قبل حله=فانكان ذا كبر فلاني بجزاع

مدري بلاه مفارق الخل خله=والا البنادق يوم ناتي لها انصاع

ياما نطحنا من جموع مظله=وياما عشقنا من حسينات الاقناع

وياما خذينا دق ذود وجله=ماعاد ينفع فيه صايح وفزاع

تشعاه قوم صابحت منزل له=مثل السباع اللي مضاريم وجياع

ولحقوا هل البل مانوونا بذله=على ظهور مجاذبت كل مصراع

وقدها ورانا واحتما الهوش كله=ثم اعترض بالسوق شاري وبياع

وردوا بني عمي بخيل وسله=ترجف حوافرها ويرجف بها القاع

اليا اقبلت كنها القنوف المظله=ولا زعزعوا مرزوق ياتنك ارياع

ترمى الجنايز مثل رمي الأجله=يشبع بها ذيب الدويه الا جاع

اقفا كبير القوم كونه يشله=اما قدم والا صويب ومرتاع

من ضرب ربع للمقاتل امدله=عجمان لامنه وقف عابر الصاع

نواسة الحربي ليا شان دله=لينه يجي عقب الصعاطير مطواع

خصيمنا جمعه غدا فيه خله=لاهوب للجه ولاهوب للقاع

حرب مشينابه على كل مله=بفرنجي ضربه يجي له تنيزاع

وان بكر الوسمي بحسب الأهله=نرعى الخطر غصب على كل طماع

حريبنا يقفي وكبده مغله=اليا ذكرنا في حلا النوم يرتاع

واليا عقد عقد لزوم نحله=وليا ذرع ذرع جزيناه بالباع

وان صاح صياح على راس تله=جينا على قب سريعات الافراع

والطير الأبرق ماينجيه ذله=لا جاه حر لأبرق الريش شلاع

ونستاهل الفنجال لامال ظله=في دلة يعبالها خمسة انواع

في مجلس راعي الشرف مايمله=وسوالف يطرب لها كل سماع

ونار تواقد ما حطبها بجله=ونجر يصوت كنه الذيب لاجاع

وهذي طراة الروح من قبل حله=والأجل ماله غير مولاه دفاع

مع لابة تسقي العدا كاس عله=لباسة الجوخ المشكل والأدراع

وان عاش راسي والسعد مقبل له=اني لأفضويهم على كل الأسناع

اعزهم وادمح لهم كل زله=عزي وزرعي لاحصد كل زراع

وكل عل فعله لسانه يدله=وقول بلا فعل مثل ضايع ضاع

وصلاة ربي عد وبل يهله=على نبي للمخاليق شفاع