يا عالم السر واللي من وراه اخفا = يا مكتفل بالخلايق راعي القدره
بحق عمّ ونون وسورة الصفّا= تجيرني من بلا وقتي ومن غدره
البارحه طرف عيني ما نوا يغفا = والعقل تلعب به الفكره ورا فكره
مره توديني افكاري ليا المنفا=وفجأه تعدي بي الى ما ورا الظفره
وما بين لفكار غادي روحه وملفا= دمي نشف والقلم نشّفت له حبره
اغلط بفكره وارد لفكرتي وارفا = وارقا بروس النوايف وانزل بحدره
والفكره الشارده عسفتها عسفا = حتى لخيالها تمشي على امره
صرفت حلو الفرايد خيرة الصرفا=يطرب بها كل منهو ضاق به صدره
قطفتها من بساتين الفكر قطفا = ما هي حرافه ولاهي زود في الخبره
عبّرت عن واقعي تعبير بالحرفا= ولا كسرته ولا حاولت انا جبره
واقع وعشته مع محبوبي الترفا = محبوب غالي وعندي عالي(ن) قدره
رقيق طبعه معي واسلوبه اللطفا= الله عطاه الحلا والزين بالفطره
(انا فدا روحك )ليا قالها تشفا = جروحي ويحيي عروق القلب من نظره
وان قال في حاجته لي يا ولد تكفا= قام الولد في قضاها لو دفع عمره
وعاد ( لبّيه)ما هي تحتمل وصفا= ان قالها ضعت بين ايديه في العشره
نا اشهد انه معي وافي وانا اوفا = شربت عشقه وحبيته الى السكره
لكن علينا بدت ريح الزمن تسفا = ويا فرحة اللي من اول مات من قهره
اليوم اشوفه وهو يضحك ويتشفّا= فرصه وجاته بعد ما ضاق به صبره
ما يدري ان عاد يمكن غيمها يصفا= ويرجع لهمّه وغيظه ياكل الحسره
وينسف الله طموحات الغبي نسفا = يمكر ومكر الاله اشدّ من مكره
نار المحبه ليا اشتبّت فلا تطفا = الحب يبقى مع العاشق مدى دهره
وبين المحبين لو حتى حصل ظرفا = يبقوا حبايب ولا يمكن لحد يكره
وختامها يالله بهتّان له رزفا = يسقي قلوب (ن) لها مدّه وهي قفره