تعجز حروفي وفكـري بالرغـم إنـي=أغني الحـرف وأعزف فكـرة مدنـة
لكن إذا قـال عبّـر بالشعـر عنـي!=في وقتها كن مالـي بالشعـر شنـة
لا جيت له رافـعٍ خشمي وإلا فإنـي=أتوه .. ويصير هوّ اللـي ألا فإنـه
رخيـم صوتـه بهرجـه كنـّه يغنـي=أخذت موته عسانـي ما أنحـرم منـه
دلـوع فيـه الدلـع زايـد وجنـنـي=نعوم مـن ريشـة العصفـورة أحنـه
يمشي وكنـه طـوال العـام متحنـي=كنه على روس الأصابـع مشـى كنّـه
والشعر سايح على الأمتـان متدنـي=وأظن الأنفاس مـن سيحـه يهبّنّـه
أحيان إذا غاب عني قمـت متعنـي=وأغلط وأصلي الخسوف .. متابع السنة
لا جا قبالي أغنـي لـه حسـب فنـي=وإن غيّب أجـاذب الونـة ورا الونـة
حبـه تمـكـن بخفـاقـي ومكـنّـي=ماهو بحب الغـوا والطـق والرنـة
أحب (مرحبه) لا صـدّح بهـا كنـي =متعومـسٍ كيّفـه هيلـه معـا بنّـه
إي والله إني أحبه مـن صغـر سنـي=ولا ذبحنـي عليـه إلا صغـر سنّـه
والضيم لو قال لي: ماعنـك وعنـي=أو اتركه.. قلـت : لا ما عنـي وعنـه
أقرب لروحي .. من شفاهي إلى سنّي=وأبعد من البغض .. بعد ابليس مالجنة
ظني به أعلى من (مهلهل) أبو الجنـي=وظنه بي أرسى من مهلهل ومن جنّـه
حتى ولو ما بقا الغالي علـى ظنـي =بغض طرفي .. وأنا ببقا علـى ظنـه