يا وجودي كل ما هبّ نسناس الشمال =وجد من حدّه زمانه على اللي ما يبيه
و يا وجودي كل ما أضحيت ثم مال الظلال =لا غفت عيني ولا ذقت شيٍ مشتهيه
وجد من قفّى وهو في رجا كلمة تعال =وإلتفت من عقب ما أقفى ولا أحدٍ لدّ فيه
ويا عذابي لا دنا الليل من روس الجبال =وانتهى يومٍ من العمر ما عاد أرتجيه
وأنتي أبعد من سما الحلم ووصالك محال =يا بعد من هلّ دمعي ضحى الفرقا عليه
يا غناتي لا تحسبين دمعي يوم سال =ضعف وإلاّ خوف وإلاّ كذا وإلاّ كذيه
والله إني من رجالٍ يضدّون الرجال =لكن الحظّ الردي ساق دمعي كل إبيه
والله إني كل ما دار حوليك الجدال =قمت كنّ الموت يشّر على قبري بديه
والله إن قد لي وأنا أصد لا جاء لك مجال =صدّة اللي لا تضايق تذكّر قبر إخيه
ومن سألني قلت مدري وإذا عاد السؤال =قلت له تكفى سؤالك ترى ما هو وجيه
وش تبيني أقول عن من ترى ذبحي حلال؟ =والخطا منها عليّ صرت أحبه وأهتويه
عذرها لو ما تعذّر مثل واضرب مثال =واحدٍ ما يعرف الحرّ الأشقر يشتويه
وإن رجعنا للتواصيف لله الكمال =لا انتهى ليل المزايين جاتك تبتديه
كنّها غفلٍ مع البدو طاويها الحيال =ما يميّز وصفها إلا نبيهٍ من نبيه
وآهني اللي وصلها وذاق من الزلال =شربةٍ مع غفلة الناس من فيها لفيه
وعزتي للي سواتي عشق ما لا يطال=ويوم طاله ضيّع الحلم بين أمه وإبيه
يا أول أحلام الطفولة على حدّ الخيال =الرجا باللي حمى البيت من حملة بريه
حال دونك سيف عنتر وتاسع حول حال =بأثر حولٍ حال دونك وأنا أدعي هيه هيه
هيه ياللي غرّك الحسن وأطغاك الجمال =والله إن أموت ما شفت لأوصافك شبيه
لو يسام الحسن والتيه بجنيه وريال =ما بقى في سوق غيرك ريال ولا جنيه
كيف أهدّك للمقادير وأنتي راس مال؟ =راس مال ومال والمال ما يعطى السفيه
حافظك حفظي لعيني ورمشي لك جلال =وأنتي تشحّين بالما وأنا شفّي مويه
شايفٍ ظلمك وساكت وطال الليل طال =لا نويتي طعن قلبي وأنا ما قلت ليه
لو بقى للهيل صبرٍ على فوح الدلال =ما بقى للهيل صبرٍعلى شيٍ يجيه
كنت أحسب إن الغلا زال وأثره لا يزال = في الحشا ما كنّه إلا دخيلٍ في الوجيه
ساقني حبك على الموت وسنيني هزال = والظروف أقسى من الظلم للعرض النزيه
وأنتي تسوقين عقلي على حدّ الهبال =تحسبين إن من بغى شي يقدر يشتريه
وإلاّ أنا يا وجد حالي وجودٍ ما يقال =وجد من ضحّى بغاليه لرضا والديه
ويا وجودي أول العمر قبل ألبس عقال =وجد من باع آخر العمر في رغبة ذويه
ويا وجودي كل ما هبّ صوتك من شمال =وجد من حدّه زمانه على اللي ما يبيه