في صبح يوم اربعتعش , خميس في نصف الشهر = وقفت في وادي الفنا , بين الضحا والقايله
وقفت حامل خنجرين , وسيف في يدّي شهر = واونست زول ٍ من بعيد , ايحوفني وآحايله
واقبل علي , شيخ ٍ جليل الشيب , بحجاجه ظهر = قال انت يامال الشحم , من انت من قبايله
قلت انت من جنس البشر , والا انت جني مشتهر = قال انت قول ولاتسل , واعطي الجواب لسايله
اسلم وتسلم يافتى , وش جابك لوادي القهر = ماتدري ان موتك ورا , طرق الخطوب الهايله
ماتدري ان وادي الفنا , بالجن يعرف واشتهر = واتسوق نفسك يافتى , ماخفت من هوايله
قلت اذكر الله ياكبير السن ياحدب الظهر = واسمع من اللي عذبه , ضيم الحظوظ المايله
في يوم ( ستعشر) ربيع اللي مضى له كم شهر = كانت بداية قصتي , والصيف في اوايله
عصفورة ٍ غنت علي , أعذب طواريق الطهر = طويلة ٍ , مملوحة ٍ , غرنوقة ٍ , متمايله
من جيدها شفت النجوم , اتبين في عز الظهر = والخد برّاق القنيف , يلوح لي وآخايله
والموت شوف عيونها , لاتـْعب حواجبها السهر = خدرا خيول رموشها , بين الحنايا صايله
اركت علي , لين اورقت يبس الحنايا وانتهر = وسواس قلبي وارتوت , من سيلها خمايله
ويوم اسرفت بي ثم خذت , قلبي لعيناها مهر = اقفت وروحي في يدي , واعدل جروحي عايله
بلـّق عيونه وانتبه , شيخ المسيله وانبهر = قال اسمها , قلت ابتسم , وانت اتـْعرف مسايله
قال الله اكبر ياجميل , اثرك معنيني دهر = من يوم طيرك سيدي , طيّحْك في حبايله
عرفتها من وصفها ياما لسانك به جهر = ياما كتبني حسنها , لرضاك يسلم قايله
انا القصيد اللي انولد , بيدك وعمّر وازدهر = باوصافها لين اتْعبه , من ثقلها حمايله
قلت انتبه , ركز معي , خل الحكي باذنك زهر = واياك شيطان الشعر , يغويك في عمايله
ياجعل شاعر ماكتب , فيها قصيده وانصهر = في حبها , ثم افتخر , تبطي حروفه حايله
قال اوعدك مهما حصل , ومهما يطول ابـْنا الدهر = ماتوب عن نقش اسمها , على عظامي الدايله
واخذت من شعري عهد , في يوم من نصف الشهر = ثم رحت من وادي الفنا , بين الضحا والقايله