جددي في القلب جرحك يالعنود=واجرحيني كل ما شفتيه طـاب
همك من العام في قلبي يزود=ومنه راسي ياعنود الصيد شاب
جرحك اللي في الصدر مافيه فود=والله انه طابع مثل الكتاب
كنّ قلبي حزمةٍ والجرح عود=من كثر ما تجرحين القلب عاب
نار حبك تشتعل وانتي وقود=كيف داويتي عذابي بالعذاب
القمر والليل ونجومه شهود=ان قلبي في بحور الحب ذاب
لك بساتينٍ بقلبي من ورود=واقرب لمحجر عيوني من الهداب
في الهوى لابد توثيق العهود=دامنا يابنت في سـن الشباب
ماهقيتك تخلفين اقوى الوعود=القمر وشلون غطته السحاب
ماهقيت الحب ياظبي النفود=والمشاعر كلها تصبح سراب
ايه لي مبدا على سلم الجدود=ولو تزل الرجل يردعها العتاب
وبك انا يابنت جداني اسود=كاملين العرف وعزاز الجناب
طيبين النسل عربين الجدود=والدخيل ليا زبنهم مايخـاب
لو جهلتيني ترى ماني بجحود=صادق وافي وقلبي ما يهاب
لو سمعت الشام تحكي للزيود=وش علينا من سواليف تعاب
القوافل مالها بند وحـدود=ولا درت يا بنت عن نبح الكلاب
ويش جاب الثعل لشبول الفهود=ومن يقول الحر هاب من الغراب
عاذلي والعاذل بطبعه حقود=في عيوني ما يساويله ذبـاب
ادري اني طحت في نذل وحسود=وادري ان الدم ما يصبح شراب
وادري ان العمر يابنت معدود=وادري ان نهايتي تحت التراب
مار هذا الوقت والحظ معقود=وكل خرج اليوم نلقى فيه داب