|
قصيدة اتحدى من يستطيع اضافة بيت واحدلها !!!!
هلا بكم اخواني وخواتي الاعضاء
اول شي امسيكم بالف خير وعافيه يالوجيه المسافير ثاني شي هذي قصيدة كتبتها من فترة وكلما حاولن اكملها ما قدرت وحسيت انها اكتملت ولا استطيع كتابة اي بيت اضافي لها !!!! ووالله انها ليست من باب التحدي للشعار او الشاعرات ابدا ولكن من باب محاولة شحذ الهمم !! مع اني على يقين بان لا يستطيع اي احد الاضافة بشرط ان لا يكسر في وزن او قافيه او الاخلال بهما ( اي ان يكون الصدر منتهي بحف الياء واللام والعجز ينتهي بحرف الالف والفاء واللام )) واترك لكم القصيدة مع التحية واتمنى ان تنال اعجابكم كما يشرفني مرور وتعليقات الاعضاء والعضوات الغير الشعار ايضا،،،،،،
اقفت كما برق(ن) سرا في سواد الليل= ولا تحققت عيني من الظبيه الجافل وفزّت من المحوا وتسبق سبوق الخيل=وبنت المها تسبق وتاريخها حـــافل ولا جيتها قانص ولا ادور التعــــلـــيل = ولاادري بها الا يوم هجت ونا غافل تقود الجوازي يتبعنها وسرب العيــل =رشيقة لطيفة تفتح القلب لو قـــافــل عنيدة خجولة تنحني بلخفــــا وتــميل =ولا تنقنص للخاين الماكر الـــســافل رسوم الدموع بخدها مثل مجرا السيل=وتبكي محاجر عينها رمشها الهافل لها وجه يخجل نور بدر السما وسهيل= وغطّا على الزهرة غدا نورهاآفل ولو دفّلت في البحر يرجع بطعم النيل= تعالج ملوحة بحر من ثغرها الدافل جميله وزوّدها كثير الحياء تجـــميل= لوشافها مطوّع نسي الفرض والنافل ويالله عسا ما هي حليلة ردي الحيل = وتمسي بداره ويصبـــح لها كـــافــل وسلامتكم ،، من قصائد الرحــــــــــال |
رد: قصيدة اتحدى من يستطيع اضافة بيت واحدلها !!!!
لها وجه يخجل نور بدر السما وسهيل***وغطّا على الزهرة غـدا نورهاآفـل
ولو دفّلت في البحر يرجع بطعم النيل***تعالج ملوحة بحر من ثغرها الدافـل صح لسانك يالرحال2006 على هالرائعة وننتظر منك المزيد تقبل تحياتي؛؛؛؛؛؛؛؛؛؛؛؛؛؛؛ |
رد: قصيدة اتحدى من يستطيع اضافة بيت واحدلها !!!!
عبدالله ال عامر
صحت ابدانك يالغالي ولا هنت ، الاروع كان تواجدك على صفحتي عطرت زاويتي مشكورا |
رد: قصيدة اتحدى من يستطيع اضافة بيت واحدلها !!!!
الرحال الله يمسيك بالنور ويعطيك عافيه صح الله لسانك اخي الرحال قد تقول انك ماتحديت ولكن عنوان موضوعك يقول غير ذالك وكنت اتمنى انك ماتحديت لأن التحدي مايجوز منك فأنت شاعر وغيرك شعراء والمثل يقول:- (عصا العز لاتومي بها كل ساعه ..... خطرٍ على عيال النساء يكسرونها). اتمنى منك اخي العزيز ان تعيد النظر في الشطر الاول من بيتك الأول والشطر الثاني من البيت الأخير فأنا ارى فيها اختلال في الوزن. <== وجهة نظر. اترككم مع القصيده بإضافة بيتين في بدايتها:- [SIZE="5"]
اببدي بذكر الله في مبتدا هالقيل=وفالبحر انا لشراع سفينتي باافل وبكتب عن وصوف الفريده بهذا الجيل=هنيئاً لقافٍ صار بوصوفها رافل اقفت كما برق(ن) سرا في سواد الليل=ولا تحققت عيني من الظبيه الجافل وفزّت من المحوا وتسبق سبوق الخيل=وبنت المها تسبق وتاريخها حـــافل ولا جيتها قانص ولا ادور التعــــلـــيل = ولاادري بها الا يوم هجت ونا غافل تقود الجوازي يتبعنها وسرب العيــل =رشيقة لطيفة تفتح القلب لو قـــافــل عنيدة خجولة تنحني بلخفــــا وتــميل =ولا تنقنص للخاين الماكر الـــســافل رسوم الدموع بخدها مثل مجرا السيل=وتبكي محاجر عينها رمشها الهافل لها وجه يخجل نور بدر السما وسهيل= وغطّا على الزهرة غدا نورهاآفل ولو دفّلت في البحر يرجع بطعم النيل= تعالج ملوحة بحر من ثغرها الدافل جميله وزوّدها كثير الحياء تجـــميل= لوشافها مطوّع نسي الفرض والنافل ويالله عسا ما هي حليلة ردي الحيل = وتمسي بداره ويصبـــح لها كـــافــل آسف على الإطاله محـMـد الـMـري |
رد: قصيدة اتحدى من يستطيع اضافة بيت واحدلها !!!!
هلا بمحمد المري
اول شي شرفني مرورك طال عمرك على صفحتي !! ثاني شي الله يمسيك بالنور والعافيه يا غالي !! ثالث شي ملاحظاتك ووجهة نظرك محل احترام وتقدير مني لشخصك الكريم وبالنسبة للشطر الاول من البيت الاول من قصيدتي فليس فيه اي كسر او اخلال بالوزن ابدا ابدا ابدا ابدا اما بخصوص الشطر الثاني من البيت الاخير فانا اوافقك الراي والسبب(( سقطت كلمة ( ولا) سهوا وبدون هذي الكلمة يكون معنى البيت ناقص ويفترض باي شاعر يقرا الشطر الاول من البيت الاخير ان يعرف من خلال المعنى بانه ليس كسر في وزن الشطر الثاني من نفس البيت ويظهر له جليا بان هناك كلمة نفي سقطت سهوا وهي ( ولا ) الف تحية والف شكر ع الملاحظة !!!! اما اجتهادك في التكملة ببيتين لمقدمة القصيدة فهذا جهد منك تستحق الثناء عليه والشكر ولكن لم تصب البيتين بنفس المعنى ولا القافيه ولا الوزن التام لها ( الكلمات المستخدمة هي ( افل ) وهذه لا معنى لها بل تكون دخيلة وحشو وغير مناسبة والكلمة الاخرى ( رافل ) ليست بقوة القصيدة وكلماتها لذلك اشكرك ع المحاولة وبخصوص التحدي فانا قد تحديت نفسي لاكملها بنفس القوة والمعنى والوزن والقافية ولكنني انهزمت امامها فلا تعاتبني يا اخي على العنوان اذا كان انا قد دخلت نفس المضمار واظن يا محمد ان التحدي كان في محله !!! لك التحية والتقدير |
رد: قصيدة اتحدى من يستطيع اضافة بيت واحدلها !!!!
الرحال ليس من المنصف ان تكون انت الخصم والحكم دع غيرك من الشعراء او المشرفين يحكمون |
رد: قصيدة اتحدى من يستطيع اضافة بيت واحدلها !!!!
بيتين لنهاية القصيده اتمنى تنول رضاك يا الرحال واعذرني على القصور :)
الحظ قسمه عادل ٍ وان طرا ميل=بعض الجواهر ياقع بشخص سافل لاشك من واليه رجل ٍ وحلحيل=ياقاه من رجل ٍ به العيب زافل |
رد: قصيدة اتحدى من يستطيع اضافة بيت واحدلها !!!!
اقتباس:
وانا اقبل ان يكون غيرنا الحكم في ما اختلفنا فيه ولكن كل ما اتمناه ان لاتصدر الاحكام قبل تحكيم شاعرية كل شاعر وارجو منهم عدم المحاباة او الخجل من الادلاء بالرأي الصريح القاطع والذي لا لبس فيه !! ونحن في النهاية اخوة متحابين ولا يفسد الاختلاف في الراي للود اي قضيه احتراماتي ،،، |
رد: قصيدة اتحدى من يستطيع اضافة بيت واحدلها !!!!
الحظ قسمه عادل ٍ وان طرا ميل=يقبل عليك ايام وايام خافل لاشك من واليه رجل ٍ وحلحيل=ياقاه من رجل ٍ به العيب زافل اعذرني الرحال ما انتبهت لوجوده بس ابشر انت معوض غرتها لك يالسنافي |
رد: قصيدة اتحدى من يستطيع اضافة بيت واحدلها !!!!
بيض الله وجهك يالرحال ..
صح الله لسانك .. ولاتستغرب ان لاتستطيع اكمالها .. لان الفكره كنها تقول خلاص انا حدي مثل ماتقول 7 ابيات .. اسناد ع القافيه في الشطر الثاني على آفل .. << خلص :) ولي تحفظ ع كذا مشاركه . :) لاهنت ياغالي |
| الوقت في المنتدى حسب توقيت جرينتش +3 الساعة الآن 07:29 PM . |
مجالس العجمان الرسمي