طلعت للبر يا عزوز=أوسع البال عصرية
لقيت خيمة سفاها القوز=بيدين رفلان مبنية
أصحابها وضعهم مهزوز=شلة شبابٍ عماوية
جميعهم لابسين جنوز=وبالروس قصات غربية
غداهم التست والمالتوز=وعلبة حلاوى طحينية
والدش قدامهم مرزوز=وطبول وآلات فنية
وشبوطٍ أشهب قصيّر بوز=ما للقرم فيه مارية
سلمت ثم همهموا بلغوز=ماوحيت ترحيب وتحية
قلت العوايد ذهب وكنوز=وين السلوم الخليجية؟
قالوا لي ابليز منها جوز=بلا عوايد بدائية
خلك شبابي ومعنا فوز=برحلات برٍّ حضارية
ومن القهر طق فيّ فيوز=وبغيت أسل القديمية
قلت ايه.. أجل خبزكم مخبوز=والبر يبغى شقردية
يبي الذي يبعدون النوز=دايم وهم نارهم حية
فيها الغضى بالحزم مكزوز=ودلالهم حيد مركية
ومعهم حرارٍ ترد الحوز=شقرٍ تسمى نداوية
ما سامروا مثلكم فيروز=على القناة الفضائية
قالوا كلامك هذا ما يجوز=وين الصفات الرياضية؟
البر ما هو لاحد محجوز=لا تكثر الهرج موليه
وش فيك كنك لنا مدزوز؟=وأظنها نيتك نية