يا راسي تفاخر والعرب ما عليهم زود=ويكفيك فعلي من بعد فعل جداني
ويا عيني لا يتعبش السهر والعباد رقود=ترى كل شي يهون دام العمر فاني
والى صارت الايام قدام عيني سود=وضاقت علي والحظ قفى وخلاني
رفعت الكفوف وقلت ياربي المعبود=وعلى ذكر ربي رحت راهي ومتفاني
ومشيت الطريق اللي يجنب عن المنقود=وميّزت خلاني وميّزت عدواني
ولو ان حاجتي بمصامد الروس والبارود=عسفت المهار اللي بلا سرج وعناني
وخليتها كأنها تسابق هبوب النود=وحليت في جموع المعادين من داني
لكن حاجتي ماهوب قادر عليها كود=وريث الشيوخ اللي يوقف على شاني
يوقف ولا يرتاب لو الجموع حشود=ويقول احتزم بي وابشر ان الله احياني
كذا وقفت الشيخان لا سمعوا المارود=لا شاشوا المارودي ولا شاشوا القيفاني
وانا يا محمد لا نصيتك ولي مقصود=ماهوب قل في ربعي ولا قل في اخواني
لكنك وريث العود واللي وريث العود=لا صيحتله بالصوت وقّف ولا حاني
وانا افخر بفعلك دامني في الوجود وجود=ويفخر بفعلك كل عجمي وعرجاني
وانا ما نصيتك لجل تذبح لي المفرود=وانا خابر انك تكرم الضيف والعاني
وانا ما نصيتك لجل ادور على مردود=انا اعطي كثير الناس من ما الله اعطاني
ابي فزعتك لا عوّدت حاوي ومردود=الى حدني وقتي على اللي تحداني
ولاهيب لحية قولة ابذل لك المجهود=ولا قولة ابشر بالسعد كانه امداني
فلا كأن سندها على احمد سليل الجود=وبشته ملاذ وقصره يزّبن الجاني
وما دام الحكم لله ومن بعده ابن سعود=فلا للحمل غير ابن جمعه احدن ثاني
اقول الصحيح اللي ما يبغي عليه شهود=وصح بدنك من قبل صح الله لساني