البارح الليـل ( غيـر ) ومختلـف جـوّه
لحظة قضا .. ( الدّين ) يا ديانهـا .. حانـت

يا ( أبو مشاري ) بعد جعلك علـى القـوّه
بعض الوجيه ( إنتبه ) منها ليـا مانـت !!

مشكور .. يا البارق اللي مـا صـدق نـوّه
صحيح ما ألعن من الهقوه .. ليـا خانـت

ما عاد فيهـا حيـا وإنعدمـت ( الخـوّه )
النـاس جاهـا بـلا .. ونفوسهـا شانـت

وأنـا علـى فطرتـي .. وإن جيـت بمـوّه
( ملامـح الوجـه ) لـو خفّيتهـا بانـت

والكلمـه اللـي بصـدري باقيـه جـوّه
أقول هانت .. وهـي والله .. مـا هانـت

دون الخوي مـا ذخـرت لوقتـي وسـوّه
شف وشكثر .. شالت متونـي ولا لآنـت

أرفا الخمل .. لا ظهـر .. وأجيـه وأنـوّه
وأدفع ثمن ( غلطته ) .. ما كنّهـا كانـت

وأحطب له ظلوع صدري .. لا طفت ضوّه
وأجمّله .. وأمدح علومـه .. ليـا زانـت

ما كنت أبي شئ .. كان الدافـع .. مـروّه
وعهود عاهدت فيهـا نفسـي .. وصانـت

مانيب ندمان .. مير الجـرح يـا ( قـوّه )
عزاي يا كم رجال مـن ( الوفـا ) عانـت

يا صاحبي .. كان باقي لي طلب .. سـوّه
اللي حصل شي عادي !! هقوة وخانـت

لا جيت ( بير ) الصداقه ( دمّه ) أو ( طوّه )
هانت لك أشياء بس ( النفس ) ما هانـت

ممــا رآآق لي :okkiale: