يا ذيب ياللي في الخلا نسمع إعواه=بعواك وصّل كلمتي له وقله
صاحبْك ظامي وصلك .. وشوفتك ماه=وإسقه عسى يظميك منشي الأهله
ما يحتمل قلب العنا .. جور فرقاه=والكبد (خبزة ضو) .. والصبر مله
يا ذيب قله صاحبه ما تناساه=لو قلت ينسى ..جاير الشوق تله
فرقا غضيض العود ما جابت أقصاه=لكنها جابت له ألفين عله
كثرت هواجيسه .. ولا طاب ممساه=وصابتْه من كثر التفاكير خله
غرو ٍ هرم حسن العذارا تعلاه= من يوم ما ذبّه .. وهو مستحله
إلى تمشّى زيّن القاع ممشاه=كن السحايب عقب مشيه إتعله
دايم إلى عرّض عليْ .. يقصر إخطاه=مدري بلاه الثوب وإلا إجبله
لا زل في حقي .. وكثرت خطاياه=فإقبالته تدمح معه كل زله
ما زيّنه في العين حسن ٍ تغشّاه=إمزيّنه قبل الحسن زين دله
عذروبه إنه لا حكى ما سمعناه=حتى لزيزه لا حكى ما فطن له
من صغر ثـمْـه .. الحكي يقطر من إشفاه=يغنيه من كثر الحكي بعض قله
وفي عيني إن عذروبه أكبر مزاياه=لأنــّـه لو إنــّـه ما حكى .. ما تمله
الحكي والله فالنواعس .. وتقراه=لاسلهمت سود الرموش المظله
يا ذيب قله لثمته لا تعداه=لو طشّها .. كثروا .. حواسيد ظله
لا فرّع .. وقامت تبارق شفاياه=عيّت إرجيل المهتوي لا تشله
مدري غروره حال من دون لاماه=وإلا إنظلوه .. أهل الكبود المغله
بس الوكاد إنه مع إمقيط وإرشاه=جعله طريقه .. دامها عادتن له
يا ذيب أنا هوّنت ولا إترجاه=رجوا إلغير إمسخّر الما .. مذله
لا عاد تعوي له .. أنا أبغيك تنصاه=وإليا نصيته وصّل العلم كله
(أما قلط ضيفه على موخر الشاه=وإلا حلف ما عاد يقرب محله)