هيّض ابن حصيص في تالي نهاره=ألف قاف ٍ في ضميـره مدلجاتـي
ياوجودي وجد مكسـور الجبـاره=آخـذ ٍ تسعيـن ليلـه مايبـاتـي
أو وجود اللي خذا الحاكـم ديـاره=خـذ حلالـه والحريـم مسلّباتـي
عقب ماهو تاجر وراعـي أمـاره=صـار فـلاح ٍ وامـوره هيناتـي
أرتحل يا فهيـد منبـوز الفقـاره=آركـي وحبـال كـوره كالفـاتـي
آركي ومربّـع ٍ عشـب القـراره=ما علاه الشد من عشـر سنواتـي
ديرة الوشـم مـا فيهـا صقـاره=غير شيبـان وعجـز محندباتـي
من خشوم اكميت لي حـد الزبـاره=جعل تمحـل والوشـوم مربعاتـي
صاحبـي بالوقـف مدهالـه وداره=ما سكن فـي ثرمـدا والاّ مراتـي
ولعتني بالهـوى والزيـن سـاره=دلهتنـي عـن غناديـر البناتـي
يا حسايف بنت ذاك الجـار سـاره=عند ابوها تـدّرج مثـل المهاتـي
ريق ساره مثل ( غند ) في غضاره=أو حليب ابكـار عـرب مسمناتـي
والنهيد زبيدي ٍ فـي دعـب قـاره=في محير الماء القـراح مصلّعاتـي
والثنايـا قحويـان فـي زبــاره=زاهي نبتـه علـى كـل النباتـي
راس ساره ذيل شقراً وسط غـاره=والجدايـل بالرشـوش مجدلاتـي
والمطوع لو يشوف خديـد سـاره=طبّق المصحف وعجّـل بالصلاتـي
ما ذكر جار ٍ ذبـح بالحـب جـاره=يالمبيسـم والثنايـا المرهفـاتـي
حالف ٍ ما نسى ولااسلى حب ساره=كوداهل شقـرا يخلـون الصلاتـي
لايمي فاله حنيـش ٍ فـي مغـاره=سمّها يشظـى العظـام الصالباتـي