مجالس العجمان الرسمي

مجالس العجمان الرسمي (http://www.alajman.ws/vb/index.php)
-   مجلس المحــــاورة والألغاز الشعرية (http://www.alajman.ws/vb/forumdisplay.php?f=28)
-   -   محاورة نادرة للملك فيصل رحمة الله والشاعر لويحان (http://www.alajman.ws/vb/showthread.php?t=6230)

فهد ال هادي 19-09-2005 11:50 AM

محاورة نادرة للملك فيصل رحمة الله والشاعر لويحان
 
قـــــال الـمــلــك فــيــصــل

خابرك تذكر بساتيـن ثمرهـا الـورد والهيـل

هو حاضر نفعهـا والا متـى حتنـه يصيـري

بالحيل بالحيل يالويحان انـا مشتـاق بالحيـل

ليتك تشـاور لنـا الوقيـف كـوده يستخيـري

**

قـــــــــال لـــويـــحـــان

من حال هاك البساتين النظيفـة علهـا السيـل

يقودني صوب حلو اثمارهـا خيـط الحريـري

وقيفها يا وسيـع المعرفـة مـا يفهـم القيـل

تثور بندق قليل الفـود فـي وسـط الجفيـري

**

قـــــال الـمــلــك فــيــصــل

انا احسب انك على اللزمات بالقـالات حلحيـل

تسعى لنا في طريق البيـع والناقـد بصيـري

حنا الى من شرينا يحضرونـك حـزت الكيـل

وتشوف بالعين مشكـاي مـا قلبـك غريـري


**

قـــــــــال لـــويـــحـــان

والله ما في يـدي قـوة ولا حيلـة ولا حيـل

حيث ان حبي الى شافوك يمضونـه شعيـري

من يطرد الصيد يذبـح بالجفـار وبالمغازيـل

واللـي يجـر السرايـا للعـدى لازم يغيـري


**

قـــــال الـمــلــك فــيــصــل

الـى غزينـا عليهـم فانـت قيـدوم الدواليـل

صيور ما نلطم الخصميـن بالحـد الشطيـري

ويش انت خابر يوم انك جبت لي بعض المناديل

تقول هذا مليتـه مـن زهـر بستـان غيـري


**

قـــــــــال لـــويـــحـــان

والله فلا ابغى فزوع ولا جـرود ولا محاويـل

الناس في حكم رجال علـى العالـم خطيـري

ما ظن به كهربة تجـذب كمـا يجـذب التيـل

والا فلا صار شـي اولا بعـد قـر القريـري


**

قـــــال الـمــلــك فــيــصــل

لياك تيّس ولو صـارت عواكيـس وغرابيـل

صبور ما يحمـد المصبـاح سـراي يسيـري

الناس وقت الصرام كرام في كـل المحاصيـل

واليوم نبغى كرمكم يوم جا وقـت العصيـري


***

قـــــــــال لـــويـــحـــان

تـراي انـا اميـز المخـراج قـدام المداخيـل

بحال ابا اخشرك وبحال ترى منتـب خشيـري

خادم وحامل سلاحـي مالنـا بالعـدل والميـل

ولا يخاشـر سلاطيـن الملـوك الا الوزيـري

فهد بن محسن 19-09-2005 01:04 PM

الاخ \ فهد ال هادي

بيض الله وجهك ولاهنت على كتابة هذه المحاورة النادرة

تحياتي لك

الهـــااادي 19-09-2005 01:11 PM

الاخ \ فهد ال هادي

بيض الله وجهك ولاهنت على كتابة هذه المحاورة النادرة

تحياتي لك

فهد ال هادي 25-09-2005 11:15 AM

ولا انت يا فهد بن محسن وجهك ابيض تسلم يا الغالي

فهد ال هادي 25-09-2005 11:16 AM

ولا انت يا الهادي وجهك ابيض تسلم يا الغالي

بندر المري 27-03-2014 10:36 PM

رد: محاورة نادرة للملك فيصل رحمة الله والشاعر لويحان
 
بيض الله وجهك ولاهنت


الوقت في المنتدى حسب توقيت جرينتش +3 الساعة الآن 01:00 PM .

مجالس العجمان الرسمي