(خل الورق) لاتجرحه بالكتابه = يمكن يموت اليا انجرح فوقه شعور
بعض الورق لامات / مات بصبابه = وينبت عليه من الوله ورد وزهور
مثل الذي لاغاب (يذبح غيابه!! ) = وتفوح مع ذكره رياحين وعطور
هذا الورق ياسيدي له مهابه=والحبر دم ينتثر (شرهة سطور)
وبعض الورق مملي (كلام/ ورتابه)=ويموت ( من قل المطر/جدبْ ودهور)
وأنا لقيت من المطر بك تشابه=والفرق لامن جيتني شعشع النور
سحايبك قلبي جفاف وحيابه=وإخّضرّ به من وابلك عرق وحضور
و الوصل برقه لاح يسبق سحابه=وهذا ثرى صدري من العشق ممطور
سالت بك عروقه وفاضت شعابه=وغرد على غصن الغلا ( وُرقْ وطيور )
وهذا غيابك / (سكّر الله بابه ) =من غبت/ والدنيا غدت عندي قبور
الوقت كشّر يا ابيض الوجه نابه=والصدر منزالٍ من الصد مهجور
يسفي على جدران شوقه ترابه=وتشوف ( كثبان الوله تدفن السور )
(جفاف الأرض) اللي من سنين صابه=خيّم على ارض قلوبنا واصبحت بور
نفس الطريق اللي مع الدرب جابه=خذاه/ما خلا سوى خالي الدور
الصمت درب نرسمه في عتابه=نمشي ونبني به (مسافات/ وقصور )
وهذا ( الورق ميت/ولكن صبابه )=موتة وفاء/تغني عن إحساس مكسور
وذاك الورق/ لاتجرحه بالكتابه=خايف يموت اليا انجرح فوقه شعور