يا بنت أنا لاغبت ما هو من الضيق=خلّي علوم أهل الهـروج الكذوبـة
في لازمـي والله ولـيّ المخاليـق=والرجل ملزومٍ يكمـل دروبـه
العمر فرصـة و الليالـي توافيـق=والوقت يجري والسنين محسوبة
رجلٍ يبي يرقى لروس الشواهيق=ما قال عن درب المكاسيـب توبـة
يثبت ويرسي مثل ما يثبت طويـق=و يعلّي البنيـان طوبـة وطوبـة
ترى قلوب الناس مثل الصناديـق=مفتاحها هرج اللسـان إن حكوا بـه
لو باحت صدور الرجال المغاليـق=أسرارها صارت عليهـم عقوبـة
كم واحدٍ يصبرعلى نشفة الريـق؟=من شيمتـه رفاقتـه مـا دروا بـه
يدرى خماله عن هروج المطافيـق=والآدمي ما يستـره غيـر ثوبـه
والشعر يا بنت النشامـا مواثيـق=سمعة وقيمة وابتكار وعذوبـة
وأنا قصيدي ما دخل بـه تلافيـق=أنقاه عن درب الخطـا والمعوبـة
لو إني أبحث عن قصيد العشاشيق=حطيت لي فـي كـل دار محبوبـة
لكني أبحث عن جـزال الطواريـق=أم المعانـي حبكهـا بالصعـوبـة
شومي قصيد مدوريـن الغرانيـق=وأخذي قصيد اللي ربوعه هقوا بـه
كلمة ولا تحتاج شـرحٍ وتعليـق=والعلم ما ينعـاد عشريـن نوبـة
إن كان عيبـي خوتـي للمطاليـق=تراي رجلٍ يفتخـر فـي عيوبـه