سيوف حرب الخنبقه مع شِلْفِه=اشوفها تالي الزمـن مسلولـه
احدٍ شرى سيفه واحد مستلْفـه=زلق اللحا وأشنابهـم مفتولـه
وكلٍ يساند في الملاقـا حِلْفـه=لو كان حلفـه مايعـنّ خيولـه
لكن نفـوسٍ بالـردى مئتلْفـه=هذا يـدق وذا يهـز رجولـه
مع بعضهـم رافعيـن الكلفـه=مازعّلو الحمّص على التبولـه
نواعم الليل الدغـوش وجلْفـه=توالـفـو لكنّـهـا مقيـولـه
ما صدق الكذاب ساعة حلفـه=إلا رفيـقٍ لـه يحـب فعولـه
والوقت يبرم والليالـي صلْفـه=وامّا طلوع الرجم والا نزولـه
فاللي طلع مايلتفت وش خلفـه=واللي قعد ردّه بـلاً بحثولـه!
ما ردّ ذود ولا حلب له خلفـه=وماسار بأطلال الجبل وسفوله
همه بملبوسـه وقصّـة زلفـه=واكله وشربه والطرب واطبوله
خروف حوشٍ علته من ظلفـه=احيان عيب الشي جا من طوله
تفكير ذولا في الونس والعلفـه=يمشون بس أفكارهم مشلولـه
واللي يفكر في الوليف وولفـه=اشوى . ولازالت يدَه مبلولـه
واللي يفكر كيف يقضي السلفه=فياحيّ من ذا علمـه ومدلولـه
وانا على كثر الظروف الجلفه=فلا هي بهمي ولا هي حولـه
ياصدر همي لا وصلك إستلفه=الدين همّي ماهـي المكحولـه
زاد التساهل وأسرفو المعتلفـه=واخر خبر منه العرب مذهوله
مضمونه الموتر ودقـة سلفـه=والنتق لو في سكّـةٍ مجهولـه
ومعايرة زيتـه ووزنـة بلفـه=بيصير حقٍ للمره في الدولـه!
والعالم الله عن حقوق الخلفـه=بتصير حق القير والصامولـه!
يعني العلوم عفاك يبـن زلفـه=فكْرتْك هذي ماهـي بمقبولـه