ارفع ملاويح الغلا لنداوي=والحب له هجمه وصده وغاره
امٌا شهر راع الجناح الرهاوي=ولا على ماكره يبقى وقاره
عجل بمنطوق الهوى للهواوي=بشرني بصوتك وهاك البشاره
الوقت طرف واسود الليل ضاوي=لا يجزع النادر وبيدك قراره
شمس النهار مهرفه لا تراوي=موجب وضيعت الوحش ياخساره
الشمس هفت والوحش هف هاوي=وأتلا العهدبه بين قاره وقاره
في عرض شاهوق الشرف له حراوي=تحت الشفق كنه يبعثر شقاره
لا عاد تنشد ياعيون المهاوي=عليك راج وراج بأول نهاره
وصكت طواريح الشبك وانت غاوي=منا ومنا بين تاره وتاره
وأن زرقوله طير شلوى غناوي=لو ماتعشى فوق راس الزباره
من زوعته تخفخ كبار العزاوي=كفه شطير وهدته من شطاره
نشٌر مواميه الطويلات لاوي=ويفرٌق متون السحايب طياره
لويكسر الحومه بعيد الهقاوي=ماينقله راع الولع بالصقاره
بينك وبينه يقنب الذيب عاوي=والموج يزمي بين دارك وداره
خلي سباريت الخلا للخلاوي=وسمي وصلي ركعتين استخاره