تعبت اجامل الدنيا تعبت اداري العدوان =تعبت اخالف الواقع وانا شوفي يقديني
تعبت ارسم على وجه الحزن بسمه بلا واجدان=بقايا بسمة ماتت مشاعرها من سنيني
عجزت اكذب على نفسي واقول ان الحصان حصان =كبا مليون كبوه والامل مازال يحديني
دفعت اللي معي في الطير واثره طير ابن برمان =تعشاني خبيث العش قبل انه يعشيني
اجود زلة الصاحب وامشي غلطة الغلطان =كفى ياوقت لاتضغط علي ماراح يكفيني
درست الهم واجزاءه عرفت الزود والنقصان =ولكن مادرست من الفرح حاجة تمشيني
وصلت ابعد حدود الصبر ماحصلت لي عنوان =وضاعت خطوتي بين العوارف والمجانيني
اشوف الناس تضحك المواقف تدعي الاشجان =لقيت اللي يضحك كل خلق الله يبكيني
سرقت من الزمن لحظة فرح في غفلة الاحزان =وسرت المتهم بضياع لبنان وفلسطيني
واثر فرعون مايقدر يمشيها على هامان =وهذي سنة الله في الفقارى والسلاطيني
زماني لا متى وانا اسير الهم والحرمان =كرهت الصبر بالمره وهو ماعاد يبغيني
على صرح المصايب صحت يادنيا تراني انسان =بشر مثل البشر وابسط ولامني ولافيني
سجين بذنب غيري لكن الشرهه على السجان =علامه ماتمعن في ملفات المساجيني
دخيل الله يادنيا العنا وش سبة العدوان =اموت براحتي بس اعرف اللي بينك وبيني
اذا كان السبب يرجع لنفس ترفض السلوان =خذي سمعي خذي شوفي خذي روحي وفكيني
الا ليت الزمن يرجع ويرجع كل شي كان =ولكن خايف القصة معه ترجع وتنهيني
كفايه يازمن ماعاد لي في اللي تبقى شان =خذيت اللي مضى واللي بقا ماعاد يعنيني
مجرد ماقعدت احاول ادرس فكرة النسيان =تحاليت البكا وارخيت للدمعة هدب عيني
ولولا الله وادري ان الحيا شعبه من الايمان=لشق الجيب واكسر حاجز الكتمان بيديني
وابين قصة يبكي لها اللي يعبد الاوثان =واصيح صياح واخلي القرايب تبتلش فيني
زماني ويش ذنب ابن المهادي يوم جا تعبان =غرير ينتظر صبحه مثل باقي البزاريني
جريمة قتل متعمد ادلتها شهود اعيان =ولكن طاحت الدعوى على روس المساكيني
نجوم الليل لاشفتي نصايب قبر ابن جمعان =دخيل الله دسي وصف قبري عن دياييني
أخاف الحزن يدري بالخبر ويجدد العرفان =واخاف الهم لايعرف مكان القبر ويجيني