يقولـون لاتصـرف مـن المـال ولا زال=على صـرف ماعنـدي وذا ورث جدانـي
كسبت العلـوم الطيبـه بيـن عـم وخـال=والى من حدانـي وقتـي آجيـه متفانـي
عشقـت الطويلـه والطويلـه بهـا نـزال=نـزل قلبـي بـراس الطويلـه وخلانـي
عشق مرقبي قلبي والى جيت ضايق بـال=فصـح الله شعـوره وصـح الله لسـانـي
اجيب القصيد اللي يحبـه بـدون اشكـال=وآسليـه فـي خلـواه واعــد بلعـانـي
بقهويه مـن فكـري وازلـه بوسـط دلال=بعـد يقـدع المعنـى بقهـويـه قيفـانـي
والـى شكـر الفنجـال باثنـي الفنجـال=واثلث له الفكـره واسـرج لـه حصانـي
الى مـن تهقوابـي رفيقـي فأنـا رجـال=اشرفـه فالقاصـي واجمـلـه فالـدانـي
والى جات من ربعي مكاتيب في مرسـال=فلانيـب مـتـردد ولا نـيـب متـوانـي
عزومي تسنـد بـي علـى طيبيـن الفـال=علـى لابتـي وان جـا لزومـن بتلقانـي
اهـل سربتـن تخطـي ولا تقبـل العيـال=نهـار الملاقـا حضـروا كـل شيطانـي
والا ياهجوس الشعر كيف انت كيف الحال؟=لـك ايـام مامريـت قاعـي وريضانـي
بعـد جيتنـي يامرحبـا والعلـوم جـزال=ابقـدح علـى راس الفتيـلـه بميـدانـي
عسى الغيمه اللـي دمعهـا وابلـن همـال=بتحيي هشيـم عـروق ذربيـن الايمانـي
الى روحت مـع خايـع الـدو بالزرفـال=غطاريف ذودن لاادبـر الوقـت تشعانـي
بسند عليهـا وازعـج الصـوت بالهوبـال=واباقول ياهل العرف مـن حـر ماجانـي
انا لي مع الطيب مواثيـق عهـد وصـال=الـى كبـرت القالـه وضاقـن الازمانـي
اسوق الرجل للمعضلـه والرجـال جبـال=وانا ماثنيت الرجـل يـوم العمـر فانـي
عسى الله يجملني واعرف الحمـول ثقـال=لها يبـرك الرجـال مقفيـت الاضعانـي