الشاعر ابن سبيل
 

من روائع شعر الشاعر الوجداني الكبير
عبد الله بن حمود بن سبيل رحمه الله
هذه القصيدة وهي موجهة للشاعر والفارس الشيخ ذعار بن ربيعان
من شيوخ الروقة من عتيبة

يقول ابن سبيل:






ياذعار أنا قلبي هذا اليـوم حولـه
من العام ينقـص مابقـى إلا قليلـه
مثل الشعيب اللـي تقافـت محولـه
مسـنٍ جنابـه يابـسٍ حنظليـلـه
ربيـع قلبـي جيـة البـدو حولـه
وتقيـرب المقطـان واحبنـي لـه
والسوق يعجبني إلى شفت ضولـه
مثل النظيم المختلـف عـن مثيلـه
ذولا لهم حاجـة وذولا بـدوا لـه
يلهون راعي الـواردة عـن قبيلـه
وش خانة المقطان في كـل جولـه
حـز الربيـع إلـى تزايـد نزيلـه
ربيعهم قول العسوس ارحلـوا لـه
عشب جديد ولابعـد جـف سيلـه
والصبح سمحين الوجيه احقلوا لـه
وعطّ السلف واستجنبوا كل اصيلـه
وكـلٍّ لأهـل بيتـه ينـوخ ذلولـه
ونوّخ خفيف الزمـل وأقبـل ثقيلـه
والبيت يبنـى فارقـه كبـر زولـه
لابد شرّاب الحشايـش يجـي لـه
في روضةٍ صكـت عليهـا نزولـه
والفقع قدم البيـت مـا ينعنـي لـه
تلـوة نهـار وكلّهـم سيـروا لـه
والخيل من تاعي لها ترعـوي لـه
ماقيل يارعي الحصان اقهـروا لـه
باطرتـه النعمـة مديـمٍ صهيـلـه
وباغٍ إلـى ماوقـف العلـم طولـه
وتنافضت بيـن العميـل وعميلـه
نيه على اطراف العرب واجمعوا له
نمرا تصهـرج مثـل نـو الرفيلـه
والسبر روّح وردهـا فـي حلولـه
ودرهم عليه الشيخ واشتـال شيلـه
وشافوا عياله يوم هـم قربـوا لـه
صفرا تكف الخيل عن كـل عيلـه
قالوا مطالـع قـال الآخـر يقولـه
وتعايلـت قـدام يومـي شليـلـه
وفاضوا على طرشٍ وساعٍ خلولـه
مـن دنـة الغـارة تزايـد جفيلـه
حوّوا ودوّوا بأولـه واقهـروا لـه
ماعنده إلا مـن يحلـب بصميلـه
يوم اوسعوا لحق الطلب وارجحوا له
كـل أبلـج يأخـذ عليهـم دبيلـه
كـم مايـقٍ برماحهـم سبقـوا لـه
مطغيتـه الدنيـا يحسبـه طويلـه
وهـود وعـود كاثـراتٍ عذولـه
كـلٍّ بقلبـه واهـجٍ مـن غليـلـه
يمشون مشي اللـي ثقـال حمولـه
زمل مـن الوزمـة رخـيٍّ لكيلـه
يتلـون شيـخٍ ماضيـاتٍ فعـولـه
يسري وغب سـراه ماينـدري لـه

سموحه منكم غلط مطبعي