قم يا نديبي ترحّل صنع الألماني=رزريز ودلوكس ما يتعبك سكّانه
مع طلعة النور تله قبل الإذاني=وأسحب له الليت قد صكيت بيبانه
وإذا أسفر الصبح لي ذاك المثل باني=سنحٍ يسارك تصلي الفجر بوزانه
ثم أعلق القار تو المشي لك زاني=والظهر وسط الرياض وبين عربانه
قبل العليّا يمينك خذ بحسباني=ملفاك بيتٍ هله تفرح بضيفانه
على دروب الوفا شادوا له أركاني=في واحة المجد شدّوا ساس بنيانه
ملفاك خالد كريمٍ يكرم العاني=ويشيل ضيم الدهر عنك مع أحزانه
أول كلامه هلا وإن جاه ضيفاني=والهيل والعود الأزرق غالي أثمانه
ويجيب من بعد ذا كبشٍ من الضاني=ويبين لك في كلامه صدق صفطانه
تبنى له البيض بأعلى كل ما باني=والجود هو معدنه والطيب نيشانه
خالد رباع المجنى طير حوراني=طيبه من أبيه وأجداده وعمانه
كل الدوامر صناديدٍ وفرساني=رواد في الحرب لما حمي ميدانه
رجال المعارك لمنه ثار دخاني=تغشى الوغى ما تهاب الرد وأكوانه
من منبع الجود من ذربين الأيماني=هم هيكل الجود هم ساسه وعلمانه
أولاد مرزوق فريّسٍ وشجعاني=وهم عزوة اللي يشوش بفعل جدانه
قد لقبوهم هل التاريخ بألماني=والسلة الفارية والرمح وسنانه
هواشم الأصل وأما اللقب عجماني=سعدٍ لمنهم بني عمه وصدقانه
لي جيتهم والصدر مثقل بالأحزاني=سرعان ما ينجلي همك مع أحزانه
سلم عليهم عدد ما هل وداني=وعداد من طاف بين البيت وأركانه
وعداد ما في النفود طعوس كثباني=وعداد ما غرد القمري بألحانه
مهما مدحت أو تغنّينا بالألحاني=ما وصل في حقهم مثقال ميزانه
يا الله عسى ما يجيهم ميل الأزماني=اللابة اللي نباهم عاليٍ شانه
صلوا على المصطفى من نسل عدناني=شفيعنا الهاشمي في يوم حسبانه