لاعاش ابو ذا الحب لاعاش لاكان =اللي طعني تحت حدب المحاني
حتى غديت لنايد الناس عنوان =سيرة الم مابين قاصي وداني
وحتى شمت في عثرتي واطي الشان =وزود طعوني مع بلاوي زماني
ماقال سالم وان عثر كبوة حصان =همه الى قالوا زماني وطاني
وهمي مطارق والزمن صار سندان =مابينها صامد واعاني مكاني
مجروح جرحين ٍ توارت بالاحزان =جرح ٍ يصيح وجرح صمته معاني
وانزف مواويل الغلا وارسم الحان =واكتب على ليل المواجع مغاني
واشيل فوق اكتوفي دهور وازمان =واحس حتى الدرب دربي جفاني
أحيان احس اني بلا روح واحيان =احس روحي في جسد شخص ثاني
انشهد انه موت لاهمت فـ انسان =لاصار لا يرحم ولاهو يعاني
ودام الغلا خضب خفوقي بالاحزان =ابنتقم من كل جرح(ن) خذاني
انا ومن بعدي يجي الف طوفان =دام الجسد في تربة الارض فاني
ما عاش من يكسر شموخي ولا كــان =حتـى ولو هو تحت حـــدب الـمحانــي