مجالس العجمان الرسمي - ** ألا وآفقع كبدي فـ الهوى من حب بعض الناس **

السلام عليكم

بعد الغيبه عن المنتدى

اقدم لكم هاذي القصيده كهدييه واتمنى ان تنال على اعجابكم

وهي للشاعر رحيم الغنامي

أنا لا دارت أفكاري وشرّع بابه الهوجاس

ـــــــــــــــــــــــــــــــــ أغنّي بالبيوت اللي تهذّبها معانيّه

وأترجم مايدور بْخاطري وأفكّك الاقواس

ـــــــــــــــــــــــــــــــــ وألحّق ما بقي والثّانيه بالاوّلانيّه

والا ياهاجسي هبّ النسيم وذعذع النسناس

ـــــــــــــــــــــــــــــــــ وذايقتي لجزلات المعاني مرحبانيّه

أبا أغنّي بْقافٍ للقصيد المعتبر نوماس

ـــــــــــــــــــــــــــــــــــ يبا يبطون ما غنّوه شعّار الديوانيه

ترى فـ الشعر والامثال ياسامع ذهب ونْحاس

ـــــــــــــــــــــــــــــــــــ وطعم الجايده ماهي كما اللي طعمها نيّه !

أنا ماقول شعري غير وأمثالي درر وألماس

ــــــــــــــــــــــــــــــــــــ لكنّ المغتني ما هوب في حاجه لِعَانيّه

يبا يلقى الحيا من للربيع وللمطر عسّاس

ــــــــــــــــــــــــــــــــــــــ وجعل السيّه بدنياي ما تمحق حسانيّه

أثر حبّ المهجّن ( فيه تمريره وضربة راس )

ــــــــــــــــــــــــــــــــــــــ يطمّن لك علوّ القاع ويعلّي طمانيّه !

طلع لي مع طلوع سهيل واحرمني من المجلاس

ــــــــــــــــــــــــــــــــــــــ ودخّلني بجوّه مع دخول المربعانيّه

ابوه امْعلّقٍ بأمّه ولا شاور عريب السّاس

ــــــــــــــــــــــــــــــــــــــ تزّوجها بعد ما علّقته (الْتركمانيّه)

مثقّف والشهاده جابها من ( جامعة تكساس )

ــــــــــــــــــــــــــــــــــــــــ مؤهل جامعي والام ( عضْوه برلمانيّه )

ليا منّه رطن لي قمت اراطن له بـ (نو) و (ياس)

ــــــــــــــــــــــــــــــــــــــ ولابدّي ما اجيب القرمزيّه برتكانيّه !

حكمني وامتلكني بالرموش وقدّه الميّاس

ـــــــــــــــــــــــــــــــــــــــ بعد ماجاني بنيّه وانا جيته على نيّه !

هذاه وْبعد ماحبّيته وجاني منه وسواس

ــــــــــــــــــــــــــــــــــــــ على قوّات قلبي شنّ هجمه طالبانيّه

طعنّي مثل ماهدّد وسدّد طعنته جسّاس

ـــــــــــــــــــــــــــــــــــــ وعكّر صفْو جوّ شْيوخ وائل والكنانيّه

أنا ماكنت احسْب انّه يطبّلّي على المرواس

ـــــــــــــــــــــــــــــــــــــ يالين أبحر بباخرته ولا ارست في موانيّه!

حسبته صادق إحساسه وفي شرع الهوى حسّاس

ـــــــــــــــــــــــــــــــــــــوأثره يقودني من حفره لحفره بأذانيّه

ماهمّه غير ما يجري بصالة قاعة الاعراس

ـــــــــــــــــــــــــــــــــــــ وما قالت فلانه في فلانه للفلانيه

وجوّالٍ جديد مْركّبٍ فيه احدث الاجراس

ـــــــــــــــــــــــــــــــــــ وراس المال طرحة شال وعْبايه عُمانيّه !

لو إنّه يعطي الجوّال حقّه فـ الهوى لاباس

ــــــــــــــــــــــــــــــــــــ يدق ويفصله قدّام لا اشيله لَعَانيّه

على شانه من الجوّال قرّرت أعلن الافلاس

ــــــــــــــــــــــــــــــــــــ ما دام إنّه كذا لا بد ما اعلنها علانيّه

بعد حدّدت له حدّ إئتماني . والوضع منحاس

ــــــــــــــــــــــــــــــــــــ نكبت الحب والجوّال يا حدّ إئتمانيّه !

أخذتي يالليالي من يديني زاهي الالباس

ـــــــــــــــــــــــــــــــــــــ هذا انتي يالليالي ما تكبّين الأنانيّه

ألا وآفقع كبدي فـ الهوى من حب بعض الناس

ــــــــــــــــــــــــــــــــــــــ الاماني رديّه , تكرم احلامي وأمانيّه

يحسبون المحبّه سكبة عْقال وموديل لْباس

ــــــــــــــــــــــــــــــــــــــ تساوت رغبة الترفات بيضا واسمرانيّه

ترى الحب الحقيقي مايموت وصادق الاحساس

ـــــــــــــــــــــــــــــــــــــ ولوّ كان يْتعرض لإنقلابه بهلوانيّه !

أنا غنّيتها من ضيق مدري من فرح وأوناس

ــــــــــــــــــــــــــــــــــــــ طرت لي قلت أغني لي بيوتٍ مشبهانيّه

موقّفها على (آنيّه) لو (آنيّه) ماهيب أساس

ــــــــــــــــــــــــــــــــــــــ لرغبة هاجسي فيها موقّفها على (آنيّه)

وسلمتواا وعذراً على الاطاله ..