|
غارت الخيل الاصايل \\ مصافحة اولى لبني يام بعد التحية والسلام
السلام عليكم ورحمة الله وبركاته
بداية احب ان اسجل اعجابي برجال يام ووالله مابحثت عن منتديات يام والعجمان الا بعد ان عاشرتهم وصار بيني وبينهم صحبة وخوة رجال انا رجالن عملت بنجران لعامين كانت من اسعد سنين عمري رغم البعد عن الاهل في ( الجوف ) ولكن ماذاك الا لانني وجدت رجال في نجران يسمون ( بني يام) اما الان فاتركمم مع هذه الأبيات المتواضعة واتمنى ان ترتقي لذائقتكم
ياقلم جاوب على صوتن بعيدن له نحيب=ونت كلك فدوتن له وفي يدينه كالزمام حي من صوته ينادي من بعيدن للقريب=دامِ صوته وسط جوفي يبشر انه مايظام ياقصايد وكفخي من مدرجن خطّطه شيب=احملي اذكى القنابل لزمت الغارة لزام اقصفي كل المواقع وقصفي كلما يريب = الكدي الباس بقدمك وارخي للعنف اللجام العدو من كنت احسبه عام الآول كالصحيب= بيّنت فيه الخوافي وطيّر الرّيح الخيام لو برزّلي في قتالٍ ضربتي ملها طبيب = اجعله متضرجن بدماه للبيداء طعام كيف لا وانا الذي ماقيل نيشاني يخيب = يرمي نيشاني الهدف ولوهو في عتم الظلام المهلهل جنب قلبي يعوي ويقنب قنيب=يقنب اقنيب الضواري ويعوي من فرقا الهمام حي مصهال الفرس لاطارت وغز السبيب = كنّها وقت اللقا قصايدي بين الانام عبيتن عربا وابوها حصانن مسلسل عريب = مهرتن مرباطها من مخلديات العمام هذا انا عسافها واهديتها بكيفي لذيب =لاعوى ثم امتطاها شقق صفوف الزحام غارت الخيل الاصايل مع بدايات المغيب=ويل من تصبح بساحه وقايد الجيش السقام السحب ترمي رماح والورق ساح وكتيب =وقايد الحرب الدماغ وفكره يقص العظام كبدي ماهي بارده والقلب ماوالله يطيب = ومن سئلني كيف حالك قلت له ماني تمام لكن الهقوة بقصايد لارمت كبدن تصيب=وتفزع اليا صاح قلبي وجردت يدي الحسام ياقصايد هاك رمحي اللي مضرابه عطيب=اصعقيبه مثل برقن لاتدلى من الغمام ماني ماجد بن حمد ولاني ذيبن للكتيب=انما صيرت العدو متزلزلن قلبه حطام هو يحسب ان المبادي لعبتن بيد اللعيب=او هو يحسبها سوالف مثلها مثل الكلام جل ربي وعز شانه ياهب بليا حسيب =ولا لوهي بكيفهم ماحيروا ربعي النعام المهلب ماحسب لابن الفجاءه او شبيب=ولوهم اشرف من عدوي لكن التشبيه قام الخوارج يحسبون انّا خوارج يالحبيب=نسيوا ان الدين تم وكلنا راعي علام عيرونا بالكبيرة ولاحدن منهم مصيب=كنّا حنّا من الولاه وهم عصاتن للامام مانسينا يالوجيه السود ماضينا الرهيب=يوم شيدنا مباني العز وانتم في ركام جايز يطول الظلام ولكن العقل اللبيب=يعلم ان الله حي وشرعه له يومن يقام القصايد واضحة والمعنى في صدري يغيب=لكن اللي يشوف شوفي يشوفها باعلى السنام وسلامتكم= ماجد الزيد=1427 |
ماجد حمد الزيد الخالدي
مرحبا بك الف فـ مجالس قبيلة العجمان بـ منتداك ومحلك الثاني والله يحيك , وتشرفنا بتواجدك معنا وصح الله لسانك ولاهنت قصيدة جزلة ومعبرة وسلمت وسلمت يمناك , ودائما بـ أنتظار جديدك وتقبل سلامي واشواقي |
مشكوررررررررر يا الخالدي على القصيده الجزله وثناءك على رجال يام هذا يدل على طيب اصلك .
القصيده غامضه هل من توضيح ولك كل الود |
اقتباس:
حياك الله وبياك اخوي سعود وجعل الجنة مثوانا ومثواك _ وصدقت عز الله المنتدى هذا وربي ونا فيه كني بين جماعتي ولابتي _ ومثل ماسبق وقلت اخوي سعود بني يام جربتهم قبل الانترنت وهالسواليف هذي وعز الله نعم نعم نعم نعم الرجال _ اما استقبالكم الطيب فهو لايزيدني يقيناً ابدا ( فكأنما كشفت عني الحجب ورأيت بني يام فرأيت رجالا يستحقون مايقال عنهم من صيت وعلم غانم ) اخوي سعود شاكر لك مرورك الطيب والي يدل على طيبك وطيب اصلك يالذيب وصح بدنك طال عمرك |
ارحب ارحب يالخــالدي
ارحب ملآيـيـن القصيدة جزلــة نفداكـ بغيتك توضـح لاهنت واتمنى واكرر ابيك توضحهـا لاهنت يالذيـب وعالعموم حياك الله بيننا اخيك بن جذنه |
اقتباس:
فاقول ( الي يشوف شوفي يشوفها باعلى السنام ) وان شاء الله انكم بتجيبونها كان ودي وربي المعذره يالطيب اعتبرها لغز وعطني رمعتك وابشر بالي يعطيك الصحيح |
شوش التفكير ياماجد حمد واضحى صويب=مادرى وش غاية المقصود عندك ياغلام من بغى يمدح رجال الحد مفنين الحريب=مايجيب ألغاز ماتفهم ويلحقها غمام ويام مادحها الأمام الحيدري صهر الحبيب=وقال لو هو حارس الجنه بيدخلهم شمام :: :: منذو انا عرفت القصائد وخط شنبي وأنا لم اذكر ان قصائد المدح تأتي بهذا الشكل.. اتمنى معرفة القصد لكي نتمكن من الرد ليكون على قدر الكلام وتقبلوا تحياتي ولاهنت ياخالدي على ماقلت في مقدمة القصيده أما القصيده فأترك الحكم عليها لحين اتضاح الصوره |
اقتباس:
ياهلابك يابن مطلق وانت لك عقلن لبيب=القصيده ماهي فيكم القصيده في الظلام اما عن يامن فنا رجلن مجرب بل طبيب=والله انهم فالجبال جبال قمتها الغمام ويام مادحها الامام الحيدري ابو النجيب=وبن خالد بن وليد الجبري مادحكم يايام والي سابق القصيده من كلامن يالحبيب=نابعن عن تجربه والتجربه ماهي لغلام |
اقتباس:
المقدمه اخي مالها علاقه بالقصيده المقدمه ليست الا اشاده ببني يام وحفظ للمعروف والعشره معهم الله يعز مقدارهم دنيا واخره ولا له علاقه بالقصيده وما ذاك الا لانها اول مواضيعي في هذا الصرح الشامخ باهله فاحببت ان احفظ المعروف لاهله بعض الاخوان ظنها مقدمه للقصيده وهي ليست كذلك اشكرك مره اخرى اخوك ماجد الخالدي |
رد: غارت الخيل الاصايل \\ مصافحة اولى لبني يام بعد التحية والسلام
السلام عليكم و رحمة الله و بركاته
صح السانك اخوي ماجد الزيد على القصيده.. و فعلا قصيده جزله و رائعه مغلفه بالغموض.. لكن احسست من قرأتي للقصيده انك ترمي لمذهب معين من المسلمين؟؟؟ اصبت او اخطأت بصراحه لا اعرف.. و لكن انتظر توضيحك اخي الشاعر.. |
| الوقت في المنتدى حسب توقيت جرينتش +3 الساعة الآن 06:23 PM . |
مجالس العجمان الرسمي