رحمك اللًه يااللي جابك الطاري وجيت امجيـب = معاي العبره اللـي كنّهـا مـن ذكـرك اوداعـه
يسيّلهـا مقامـك يـا مقـامٍ سيرتـه مـا هيـب = تعرّضهـا الهبـوب رياحهـا وتقـاد منصـاعـه
فقدك اللي عرفك ومن سمع بك وافتقدك الشيـب = بعد ما زدت من هيبة وقـارك مجمـل اوضاعـه
معك تصغر كبار اللي نصاك ويكبـر الترحيـب = فدى رجليك من كبـر المناصـب غيّـر اطباعـه
تبسّامك .! خلاص .. وكلمتك ما تقبـل التكذيـب = لهـا بيـن الرجـال شهـود قرّايـه وسمّـاعـه
واذا ان المرجله عند الرياجيل اتحضـر وتغيـب = ما غابت عن حياتـك كلبوهـا لـو ربـع ساعـه
جعلك الله فرج للـي همومـه مـا لهـا تجنيـب = وعلى عينٍ قبـل لا تاصلـك ضجـره ومرتاعـه
ولا يلحق فعولك مع جميع النـاس شـك وريـب = يا صبحٍ كل صبـح يحـن لـه ويـدوّر شعاعـه
عسى قبرك عليك اوسع من حدود الفضا والغيـب = وعسى نوره مثل شمس الضحى فعلـوّه وقاعـه
وعسى الله يبعدك عن نار الاخرى بعدك من العيب = ويقرّبك لنعيمـه قربـك مـن الطيـب والطاعـه
ويغفر لك ذنوبك كلهـا فـي جهـر والا غيـب = ومن كثر الفعـول الخيّـره تلقـى لـك شفاعـه
وانا لا من دعاني ذكرك الطيّـب بأجيـه مجيـب = معاي العبره اللـي كنهـا مـن ذكـرك اوداعـه