يالله ياللـي نشتكـيـك المـضـره=ياعالـمٍ بالغيـب خيـره وشــره
ارفق بحالي واخذنـي بيـد رحمـه=ولا تعرضنـي الطريـق المكـرّه
لعبت بي الدنيـا وانـا اول شبابـي=لعب الهبايـب فـي جريـدٍ تـدرّه
وانا احمد الله خضتها فـي تجـارب=والعرف قد سافـرت جـوّه وبـرّه
وعرفت انا الخل الصدوق العمـاوي=معـي ولا تاتيـه منـي مـضـرّه
ماهوب يتركني الى اقفت ضعونـي=ولا سوالـيـف المـقَـرّد تـفـرّه
ان غاب عني في الرخا.. من ظروفه=وعند القسا ماشفـت شـرواه مـرّه
وعرفـت هـذّار المجالـس لفنـدم=اللـي سواليـف النسـا ماتـغـرّه
ترحيبتـه نجسـه ويمنـاه نجسـه=ثوب الوفا لا شافني اقفيـت طـرّه
في شذب عرقوبـي وسبـي مفـوّه=كنه على محـق السوالـف مشـرّه
وانا خذيـت مـن الحيـاه الفوايـد=وزولٍ با البي له... وزولٍ با احرّه
والى شرهت اشره علـى الطيبينـي=ماني على اشناب الرخـوم اتشـرّه
قولوا لابو وجهين مجمـل كلامـي=ماتسلـم الجـره مـع كـل مـرّه
قـام يتخبـط بيـن هـذي وهـذي=ولا امدحوه اهل العشا فـي مقـرّه
اللاش ما ابغي من ورى اللاش فزعه=عزي لمن يرجـي ورى ذا مسـرّه
كنّه مع البـدوان خطـوات زرقـا=متسمـويٍ بشتـه ورانـا يـجـرّه
استغفر الله ليش انـا جبـت ذكـره=اللـي ولا يـجـزا بمثـقـال ذرّه
بطهّر اللسانـي واعطـر قصيـدي=بمدح الرجال اللـي رقـوا للمجـرّه
طاب القصيد وقلت با امدح (محمد)=ومدحٍ سوى (ابن الذيب) مانيب امرّه
مـرددٍ مابيـن عـمـه وخـالـه=الاصل عجمي.. والخوال آل مـره
(الزير سالم) في الظفر والشجاعـه=و(الطـي) فــي يمـنـاه لله درّه
الكلمـه الجزلـه رفيقـة إلسـانـه=والخطـوه الذربـه لرجليـه جـرّه
قبل امس بانـت وقفتـك يالسنافـي=يوم المنافـق يجتـوّل فـي ممـرّه
ابيك (راشد) جعـل ربـي يبيحـه=اقفى وفيك العـز والطيـب صـرّه
شاعر وطن..ايضاً وشاعـر قبيلـه=لك بيرق الشعـر المسمـى نشـرّه
واختامها والنعـم بـك يـا محمـد=والنعـم والله والنعـم بـاآل مـره