يقول من قطع الخلا عادةٍ له=لو كان ماهوب وامن بعض الاوضاع
ما يلتفت لاهل القلوب المغله=فجوج ربي كل ما ضاقت وساع
يابن عماره والحياه الممله=ورى عربها ما ندور للاطباع
الجي طوّل واقفٍ في المضله=الى متى وانت مطربله بشراع
خلك على ظني سنافي وخله=خله يدورله مع الجو مطلاع
تله يا عبدالله على الدرب تله=تل الفؤاد اللي من الحب ملتاع
اوتلّت اللي مكرمه بالاجله=لديارها قدها من البعد نتّاع
ما عندنا في المال كثره وقله=في لازمه لو نمسي الليل جيّاع
لأم العراد دروبنا مسفهله=في حلةٍ يامن بها كل مرتاع
في بيت لرفح يا عساه ولعله=يبطي لنا حيٍ والانذال خنّاع
مانع سواة النايفات المطله=اللي بطيبه هنّت مليجه نطاع
وان غاب مانع لا محمد محله=يبين نجم سهيل ويهب ذعذاع
نوعك مثل نوعه وطيبه جبله=لو كان نوعه نادرٍ بين الانواع
لانك وريث الشيخه المستقله=ماهيب شيخة ختم او شيخة كراع
جذورها ما بين منسف وسله= ورايٍ على الاريا الى جاك قطّاع
مكانتك بين السحب والأهله=ومن رحمة الله يوم نزلك في القاع
حتى الى ضاع المدور تدله=وتكفيه عن منّت قليلين الاسناع
المصمك اللي كل ابينا فـ ضله=يوم الحضر مقفين والبدو نجّاع
لو ان جدك طامعٍ يستحله= كان استحله والمخاليق خضّاع
لكن مع معزي عسى الله يحله=ساق العهد والعهد ماهوب ينباع
ياللي تجي فزاع في دبي قله=في وادي العجمان عيّنت فزّاع