قالـوا تعلمـت قلـت عناد وفراسـه=أجاهد النفـس والدنيا وأصارعـهـا
ودرست في مدرسـة من شيّبـت راسـه=دنيا العنا اللـي قصيفـاتٍ مطامعهـا
تلميذهـا دايـماً يكـتـب بقرطـاسـه=وتعطيـه جملة دروس ما يضيعـهـا
والله عطانا نظـر وشعـور حساسـة=ناخذ علوم المعرفة مـن مراجعهـا
ونسايـر الوقـت ونقيسـه بمقياسـه=ونواجه النفـس بالواقـع ونقنعهـا
وترى حياة الفتى مهما قـوى باسـه=محفوفةٍ بالخطـر والمـوت تابعهـا
من مبتدأ العمر حتـى يلفـظ أنفاسـه=يمر فـي مرحلـة تكثـر زوابعهـا
أول حياة الفتـى مشوار وعساسـه=مسافة في عجـاج العمـر يقطعهـا
وثاني حياة الفتـى تدريـب ودراسـة=تصعب ظروف الحياة وينشغل معهـا
وثالث حياة الفتى يرجع على ساسـه=النقطـة اللـي بـدأ منهـا يراجعهـا
ياصل لسن الهـرم ويضيـع الطاسـة=ويزحف مع الأرض ويخطط شوارعها
وإليا تلاقت متونـه وارتخـى راسـه=ضاعت جميع العلوم اللـي يجمّعهـا