يالله لا تقطـــع رجـــاه وفيه لا تقطـــع رجـــــاي = ضاقت ولا باقي لنا في بعضنا غير الحلوم
يا حيث مالي في البشر غيره ولا حد له سواي = حبي بقلبه مثلما حبه سكن في القلــب دوم
في حبي اعلن طاعته واعلنت في حـــبه ولاي = جيته وانا صادق بحبي له وهو جاني جزوم
الصاحب اللي يحتوي حزني ويمسح لي اساي = ياكم على صدره غفيت وطارت اسراب الهموم
ما اذكر بداية حبنــــا لكن في فتــــــرة صبــاي = مهتم في شخصه وفي ما هو يخصه من علوم
واتعبت رجلي صوب داره بين رايح له وجاي = حتى غدا مثل الصلاه في فرضهــــا واجب لزوم
هذا وانا توّي صغير وكــان لي قمّــــة منــاي = وان كان ما شفته بيومي مرّ وكنّــــه الف يوم
سنين مرّت والعمر يكبر ويكبر لـــه غـــلاي = لين اصبح اغلى من خلق ربي على وجه العموم