<p>بديت باللي كلنا نطلب رضاه=إللي إليه الملتجا والمآلي</p>
<p>يالله ياللي ماندم من ترجاه=ياللي عليه المعتنز وإتكالي</p>
<p>عطنا جديدك ياقلم واكتب رثاه=خصٍ ليا منه عزيزاً وغالي</p>
<p>في اللي علوم المرجله ما تعداه=يقبل على فعل الكرم مايمالي</p>
<p>يرحمك ياعودٍ على العز ماطاه=أبوعمير إللي يشيل الثقالي</p>
<p>يقدم عليه الضيف يقبل وينصاه=ودون الرفاقه ماحسب للريالي</p>
<p>من دون ربعه ماذخر مالٍ وجاه=يشتل حملٍ ماتشيله جمالي </p>
<p>دايم مع الأول على العز تلقاه=ولاهو يخلي للمعثر مجالي</p>
<p>لامن نخيته جاك كله من أقصاه=مامال لو عود الدهر فيه مالي</p>
<p>تلقى ليا جيت السعد في محياه=وروحٍٍٍٍٍٍ عزيزه ترتقي للمعالي</p>
<p>وأبشر ليا جيته تحفاك بحكاه =تلقى الشحم ومبهرات الدلالي</p>
<p>وتلقى بشاشة وجه مع بسمة شفاه=تلقى بها روح الوسيع الشمالي</p>
<p>أنا أشهد إن حن والرفاقه فقدناه=يشهد على قولي كثير الرجالي</p>
<p>لا لا تلوم الجفن لامن نثر ماه=ياعزتا للقلب ياعزتالي</p>
<p>ما مات والله من كسى الطيب يمناه=ما مات والله كود نذل الخصالي</p>
<p>وما مات من ذكره على الطيب قداه=وما مات من نسله قروم العيالي</p>
<p>إللي زرع له ورد لابد يجناه=وإللي زرع له شوك يلقاء الخمالي</p>
<p>أبوحمد ذرب الفعل لاعدمناه =وأخوه أبوزايد كريم السبالي</p>
<p>وباقي الغمار بتتبع الشايب إخطاه =واتكمل المشوار فأول وتالي </p>
<p>يالله تجعل جنة الخلد مثواه=وحقق ياربي رغبته والمنالي</p>
<p>ويالله على حوضك مع الآل نلقاه=ومعا الصحابه يا عظيم الجلالي</p>
<p>وصلاة ربٍ كلنا نطلب رضاه =على النبي عد الحصى والرمالي</p>
<p>وعداد ما طاف الملبي وناداه=واعداد ما ناضت بروق المخالي