قم يا نديبي على كور العمانيه =درعيه ٍ من بنات عصيل مجناها
ورث ٍ لشيبانا ماهيب مشريه = لكن غزينا على عمان و خذيناها
مكسب ولد شيخ قوم ٍ يحتمي الهية= صبي ٍ على مجري الهياب ضواها
وصوفها يوم اوصفها خيالية = بسم الله ابدا و اوصفها من ادناها
كنها الى غرد الركاب ريمية = ريمــــية ٍ ذيّروهـا من مــفلاها
و فيها مواري دلع بنت ٍ هواويه = تدجر على الصوت و الترويح يشعاها
و فيها من أطيب بنات الريح مارية =و فيها من الذيب اذانيها و علباها
و إن درهمت بك مع الأرض الخلاوية =و الليل حاديك و ديارك تمـناها
شيهانه ٍ من علو الريع مدعيه=صـقارها غلَّ مـلواحه و ناداها
اصيل ما دق فيها عرق حزميه = مـا نوخت للبعـــير و تخطــراها
مذخورة ٍ للمشاوير الخصوصية= من شان لا كلحت الانياب نلقاها
يالله يالله تامـنها من السية = و تدخل احماك راعيهــا و تاقاها
ما فوقها إلا قـنابل شعر ذرية = بارودها المسك و العنبر شضاياها
و أقصا ما تاصل من الوادى جنوبيه=مقصودها ام العراد ولا تعداها
الديرة اللي بفعل الطيب مسميه=يرتاح باله و ينسى الهــم من جاها
تنصى لبيت ٍ طويل ٍ وجه راعيه = يا عيدها من قسا الدنيا و مـنصاها
و اللي يذري ذراه و فيته فيه = لا جاته الناس ظللها و ذراها
يا شيخ انا جيت لي مقصد و لي نية = تحدني لك ظروفي و اتحداها
محتاج لي فزعة ٍ ماهي بعاديه =إلا على اللي عـلوم الطــيب يبغاها
له جسم ٍ ما يلين و قو شخصية= روس الرياجيل يامرها و ينهاها
و مقدر ٍ عند حكام السعودية= ماهوب من ساير العالم ولا ادناها
عقيد قوم ٍ معـربة ٍ عزاويه= عاشت سلاطين يام و عاشت اسماها
ذكرت مانع و تل الشعر طاريه = و جات القصيدة على مدحه من أقصاها
و قام يحداني قصيدي في معانيه= حي الله أسمن بيوت الشعر و أقواها
هاذيـك ، هاذي ، لاوالله غير هاذيه = جواهر ٍ في طريقي و آتنقـــاها
و أمدح بها شيخ قوم ٍ نارها حيه= عكفان الأشناب جعل اللاش يفداها
من آل ضاعن و سروج الخيل عجميه= تسهج حما الناس و تعدي عن حماها
ربع ٍ لاحمي الوطيس و كبرت الهية= تشرب و تسقي من الجمة مطاياها
و الأبل ليا كل ريع ٍ سال واديـه= ترعى بهم كل قاع ٍ زان مرعاها
إبل ٍ جنـبها ام فتخه و ام ربيه= من طمع فيها يجيه الموت ما جاها
قولو : المن ضيقت به لارحم حيه= ينشد عن ام العراد ايلين يلقاها
أميرها شيخته ماهيب عــاريه = ورث ٍ لجده و زاهيته و يزهاها
خذها بيمنى و سيف و حد جنبيه=و هقاوي ٍ ما تبور الى تهقواها
و الى بغا الأبل غزا الدار الجنوبيه=ولاهي عـليه بغريبه لا تقفاها
يامـا خذاها بحد السيف جبريه = و ياما لحقناها لا خذها و خذناها
ما عقّب الريع خيال الفداوية = يوم أكثر الخيل معطيته مقفاها
لو ان ذوده على البير الشمالية= من ضرب صبيان يام أقفى و خلاها
لين أطلعت من خبا البنت السنافية= طرقاً كن الشمس تشرق من محياها
حنا مجانين و البنـت إنتحاريه = تقول : من يبغي الحبه و جيناها
أحلم يا مانع تراها جات عفويه = خلنا نتمدح بأمور ٍ ما لحقناها
ماجيت اعيد السوالف الأولانيه=غيـر القصيدة كذا لارحم مجناها
أحدها في شفوف الناس و معيه= جرت علي غـصـب ما حددت مجراها
ولا أنت ما دار حولك شك موليه=يكفي آل جمعه فخر لاعدت اسماها
عند البدو و القطاعات الحكومية= و ملوكنا اللي يوقف الأمر لا جاها
و أنا الشمالي و لي مقصد و لي نية= محتاج فزعة و هاقي ٍ فيك و ابغاها
يا ريف ربعه ، و جيرانه ، و عانيه= تعطي يمينك و يعطى من عطاياها
تكفى يا مانع و معلنها اعلانيه= يا ثقل تكفى علي و كبر معناها
بغـيت لي من ولاة الأمر برقية = يرتج عيد الكدادي قبل يقراها
يا شيخ تصعب علي الرديان و العيه= اللي لاضاقت على مثلي تعداها
ولا انت مقدم رجال و ذات اهمية = و تحصل الناس عندك حل دعواها
و الوقفة اللي تجي جوزى معذرية= من صوب مانع تراني ما اتحراها
يا تقولي تم و المطلوب جاهية = ولا تقول إنسها يا شيخ و أنساها
ما لحقني شك يامي عند ياميه = و أعتز في يام و أفخر في حماياها
و قد قيل لمكثر الروحات و الجية= اللي يقدم علوم الطيب يلقاها
شاعر مفوّه ولد جني و جنيه = بأسمك بنيت البيوت و زان مبناها
عصماً من المدح موزونه و مقفيه= ابحربها لين اعرف حدود مرساها
يملا صداها القنوات الفضائية = ما جابها شاعر ٍ غيري و وداها
و أرسلتها لك على كور العمانية= و أبغيك لاهنت تسمعها و تقراها