الضاعني غنى بحلو ألحانه= مثايلٍ من فكرته وإلسانه
مثايلٍ يطرب لها المتذوق=تدخل بقلب المستمع وآذانه
مثايلٍ تبقى لجيلٍ قادم= همزة وصل تربطه مع جدانه
أغوص في بحرٍ عميقٍ هيره= وأجيب من لولوّه ومرجانه
أعرف بحوره زين وأميزها= غير البحور أجيد كل ألوانه
إليا سريت أسري على مسحوبه= وإليا سرحت أجرها هيجانه
ولي مع المنكوس باعٍ طايل= اللون ذا بالذات حن خلانه
أما التّرمل والحداء مفهومه= ذا كارنا لامن رقص شيطانه
ومنهج نمر عندي وانا بيطاره=القلب بيته والصدر بركانه
أما الهلالي لو يطول أو يقصر= أهندسه وأتعب على بنيانه
أكيد أنا محسوب ضمن الخمسه= لكن مع أولهم أنا لي خانه
أغوص في بحر المعرفه وأنتج=إبيوت شعرٍ كلها رنانه
لامن وقفت بموقفٍ له هيبه=لاجاتك إبيوتي تجي مليانه
زكوني إربوعي وأنا شاعرهم= والحر ما ينهض بلا جنحانه
قدمت نفسي نايب وزكوني=عند الشيوخ وعند كل العانه
من الكويت الغاليه للوادي= وأجنبي لنجران للكرعانه
ربعي مواقفهم إتشوّش راسي= يطرب لهم فكري وأهد إعنانه
ياميةٍ يردون لحياض الوغى=ما اقول قول الا على برهانه
كم زوجوا بأفعالهم من شينه= في عين خاطبها تجي فتانه
ياتي ولدها في الرجال إميز= مثل القمر لاجاك وسط أقرانه
أكبر دليل ان الدويشِ فيصل= من طيبنا غطى على عمانه
حنا سلاطين المجالس حنا= حنا رحاة للعدا طحّانه
يوم الحرايب في الحسا شعّاله= حنا هزمنا الترك في ميدانه
دستورنا ذبح الجبان الخاين= ما اهتزت له ذباحه وإدفانه
يامن بنا الخايف ونمّن خوفه= يامن بنا غصبٍ على عدوانه
سقنا بحد السيف غصب وقوه=قمت سنام المجد حن عنوانه
يعيش الضعيف والقصير بضفنا= بوقتٍ كثير الناس به هلكانه
من كان عنده شك يرجع للورا= ويشوف تاريخ الامم بعيانه
هذا كلام الصدق ياهل الذمه= قبل أنطقه موزون في ميزانه
ماهوب كلام إشويعر متغطرس= البيت ما يبنى بلا عمدانه
ما أذم وافي الخصايل لِلّه= كلن على حقه رفيع شانه
كلن على حده وانا لي حدي= كلن يحد القوم من حدانه
الزود كثره نقص مابه شكه= مانيب من اللي يرخص لحصانه
أرجو المعذره يا النشاما منكم= شاعر(ن) وأمثل لابةٍ بطرانه