هبت علي امن الشمال النسانيس=وساقت معاها ريح خلي وذكراه
وتزاحمت فالقلب كل الأحاسيس=والشعر طب الشاعر ان ضيع دواه
سهرت ليلي بين حبر وقراطيس=اكتب شعوري والمخاليق تقراه
(حبيبتي) كم لي دموعي محابيس=ضاق المكان وحاصرتني زواياه
(حبيبتي) والشوق ماله مقاييس=مهما تجاهلته يلحقني اقصاه
(حبيبتي) صارت الأماني كوابيس=تعبت من دنيا الاسى والمعاناه
(حبيبتي) قلبي وروحي متاعيس =حني على اللي زايد الشوق عناه
(حبيبتي) زادت علي الهواجيس=في غيبتك عايض يكفيه ما جاه

على غصن الغرام اللي ذوا حطت طيور الشوق=بعد ما هبت رياح الحنين وهاضت أشجاني
تناسيت الجروح ومابقى فالخاطر المخنوق =سوا حلم السنين اللي رسمته ما تناساني
اجامل وابتسم للناس ماكني لحقني عوق=حبيس الصمت اداري دمعتي وداري احزاني
تكابرت الهقاوي والهقاوي أصغر امن الموق=صدمني واقعي مدري من المجني من الجاني؟
انا في داخلي شي ٍ عجزت اعبَره منطوق=تضيعني دروبي والزمان الشين عنَاني
حبيبي حبنا ثوب ٍ من الأيام فيه فتوق=نرقع ما نرقع مايفيد وعمرنا فاني

ما ضاع منزالي وماضاع منزالك=والذكريات القديمه باقيه فيني
لكَن حبيبي اذا مريت في بالك=لا تذرف ادموع عينك دام تغليني

يا أجمل حكاية محبه ماحواها كتاب=أحداثها تعبت صدر الورق والسطور
كتبتها فوق صدري وألحقتني عذاب=حبري دموعي وانا شاعر وعندي شعور

غنيت من ضيقتي والقلب مكسور=وجروح الايام ما يلحق مداها
وش قيمة القلب دون احساس وشعور؟=خله/ والاحباب فرقاها حداها
وش قيمة الوصل دام الحب مقبور؟=وبروق فرقاك لاحت في سماها
يا قاتل الشوق قبل أقول مشكور=بقالي الكلمه اللي في خفاها
لا تتصل بي حبيبي منت مجبور=أحلامنا ماتت ومتنا معاها ..

على كثر ما أخطيت /ورغم اختيارك=ورغم كسر قلبي / ورغم انهزامه
هذا انا/ جالس هنا / بأنتظارك=فيني من الذكرى وسوم .. وعلامه
على أمل انك تغير قرارك=ويطير من سرب السعاده حمامه
ليلك كرهته / وأتشفق نهارك=والوصل عيآ ينهمربي غمامه
تنازلك فالحب يرفع وقارك=وإلا الانانيه تجيب الندامه
حاير / وأسئلتي تدور بـ مدارك=(طال الغياب) وماتفيد الملامه
يا رحلة العشاق قلبي مطارك=متى على الله توصلي بالسلامه ..؟