لو بدا للحزن في وجهي [ مواري ] ؟ = لا يهمّك والحزن تبّت يدينه !
مومنٍ بـ / أمر الولي ، والحكم جاري = واحمد اللي سن حكمه واستعينه
كل ما قام يتبسّم لي نهاري ؟ = جعل ليلي ما تشيب رموش عينه

طال الغياب وصوت مرسال الغلا ما من مجيب ! = للي دماره من ظنون الوصل لـ / اسباب الغياب
لو سقت ظنّي فيك يظلم درب ، ويضيق الرحيب ! = لكن على بيض النوايا جيت كافيك الجواب
حبّك غريب الدار ، والتوقيت واحساسه غريب ! = وانا غريب يعدّي الاحباب شرهات العتاب
غريب مالي في حياتي لا قريب ، ولا حبيب = باعوني الاحباب ، والاقراب سنّوا لي حراب !
ما أظنّي أوّل من عطاه الوقت طعنه من قريب = ولاني أوّل من تجرّع بـ / الهوى مر العذاب
ولاني أوّل من هقا [ هقوه ] وهقواته تخيب ! = ولاني أوّل من حفت رجله ورى طرد السراب
مع إنّي أوّل من صنع من ذاته لذاته رقيب = لاجله حياتي مرجّحه بين التصابي والصواب
وانا ادري ان الآدمي بعد الخطا لازم يصيب = هابيل ما دلّه على درب الصواب الا الغراب !
هذا انا تمشي بي الدنيا على [ حظ ، ونصيب ] = والا الحياه ؟ أغلى مكاسبها يجي تحت التراب !

بديت استعيد اللي مضا وافتح الاقفال = عسى نعمة النسيان ماهي بـ / مذبوحه !
علاقه وزالت ، مير [ تأثيرها لازال ] ! = أكابد نتايجها ، والاشواق ؟ مسموحه !
تخاطف عيوني كيف أحيل الغلا واحتال ؟! = ولي عين مستوره ، ولي عين مفضوحه

قضينا وبـ / احكام القضاء تقنع [ العقّال ] ! = وكلٍ عن الثاني سحب روحه بروحه !
لو ان الجفا قاسي ؟ يهون الجفا لا طال = عسى الله يوفّق كل مسلم لـ / مصلوحه

يا جماهير الشقرديّه ، وجمهور المكاين = وجماهير البرازيل ، وجماهير الآزوري
ويا جماهير النجوم السود في كل المداين = استعدوا واسمعوني زين لا تخطون شوري
جايكم [ ميسي ] معه فرقه وكل العلم باين = ما يوقفهم دفاع ، ولا تفاتيش المروري !

تعذّر ؟ لابلاش انك تعذّر ابتعد مسموح = تراضيني سنين البعد كان البعد يزعلني !
علي لا ينشغل بالك ولو كلّي غديت جروح = تهمّلني ربع ، واحباب و [ الله ما يهمّلني ]