العام أخذت البيرق وصدت العقاب = يوم الرجال حلوقها من دون ريق
أسرجت شعري والجماهير الزهاب = وسنادي بلاد وولد عم وصديق
وحولت في الوادي وهو دونه ضباب = مدري ورى الوادي مطر ولا حريق
كم فارسٍ وده يحول غير هاب = يستوحش الماخوذ لا شاف المضيق
اقدمت والفرسان ترتاب وتهاب = أجري الهياب وأقز الطريق
ومثلت داري بالقصيد وبالجناب = من الشمال الى العديد الى العريق
ترابها بالحس ماحسه تراب = وحزومها تسوى الزمرد والعقيق
ومثلت راية من تلين له الرقاب = صليب راي وكفو وحجاجه طليق
ممشاه للعليا ذهاب بلا إياب = الشيخ ابو مشعل حمد علمٍ دقيق
ومثلت كل الشعب من شايب وشاب = بدو وحضر تاريخنا عزٍ عريق
ومثلت ربعٍ في الوغا مخلب وناب = مريةٍ تاريخنا ماهو لفيق
حن مزبن اللي لا يجار ولا يثاب = وحن فزعة اللي ذودهم راحت وثيق
أقدامنا جبال وعمايمنا سحاب = وأمجادنا تشبه سهيلٍ لها بريق
ومثلت يام بكبرها والانتساب = الى همدان نجمٍ له شعيق
الله خلقنا سيلٍ متونه هضاب = كل السدود نحطها حبٍ دقيق
شاركت متوكل على منشي الحقاب = وحزامي من الشعر والعده يضيق
وطرقت بيبان القوافي باب باب = وقدمت ماشفتوا جميع انه يليق
وحشمت اذانيكم عن سقاط الخطاب = ورقيت بإيديكم على قمة طويق
ووعدت داري بالفخر قبل الكتاب = ووفيت بأمر الله بالعهد الوثيق
وسترت بأفعالي مزينة الخضاب = وقهرت عدواني ونومست الرفيق
ولطم بعيري شوط واحد للركاب = يقوم راس وينتهي ماهو زريق
ومن كف ابو خالد تسلمت النصاب = من كف من عينه على القمه تويق
شيخٍ يروم المجد ويروم الصعاب = خلا الشعر من نومة الغفله يفيق
واليوم لا والله شفت القاف شاب = صار الشعر كوره وكلٍ له فريق
وضاع الهدد بين الحديه والغراب = وضاع الصهيل مكرمين من النهيق
إلا الرجال اللي قصايدهم عذاب = اللي لها معنى بها حسٍ رقيق
لاتشعل الفتنه ولا تطرد سراب = ولا يرقع ما نقصها بالزعيق
بس العرب ما عاد تدري بالصواب = ما ميزوا ويش الزفير من الشهيق
من جاب ضيعه قل شوفوا ويش جاب = انا اشهد انه جاب له معنى عميق
الذيب كانه ذيب يدرع فالذياب = يخلي الخرفان للضبع العويق
ماجيت انافس جيت دعمٍ للشباب = وفوزي دمه عاده على القمه يريق