مهرةٍ غنت مع الطـار .. والطبلـه = غن ياورقي .. وغـرّد ياعصفـوري
جابها الاعجاب .. لشرق من قبلـه = واخلفت تفكيري .. وحاست امـوري
يوم جات بسالفت .. عنتـر وعبلـه = والغياب اللي .. مايشفع له حضوري
قلت ليلك ليه الانسام .. تلعـب لـه = قالت الانسام .. ماترضي غـروري
انت شاعر .. واقرب شوي واقرب له = قلت تو الناس .. ياداعـي سـروري
قالت الجمهور يبغاك .. تكتـب لـه = قلت وش تبغيني اكتب .. لجمهـوري
لي سنه .. كبدي من الشعر مندبلـه = ودايمٍ يظهرني الشعر .. من طـوري
قالت اكتبني .. من الحـب منهبلـه = وانت سبة علتي .. وانـت دكتـوري
شعرك اطرب له .. وطاريّك اطرب له = واختلفت ولا قدرت .. املك شعوري
هرجها المعسول .. والشفه الذبلـه = والظلام .. اللي على الصبح منثوري
شد حبلي ليـن .. لفّـه ورى حبلـه = واعتنقت انفاسها .. وابتـدى دوري
وفي دقيقه حبهـا .. جـبّ ماقبلـه = واستفز امواجي .. وهيّـج بحـوري
والمشاعر غيمها .. ماوقـف وبلـه = لين ريح زهورها .. عطّر زهـوري
ياخزامى قلبـي المدهـر .. وربلـه = خلي النرجس يسولف .. مع الجوري
ما امحق من الخبل .. لاحب له خبله = حسب عرفي .. في المحبه ومنظوري!!