المساعد الشخصي الرقمي

مشاهدة النسخة كاملة : من يفيدنا عن معركة ( الغضا ) وش قصتها !


منصور بالله
23-07-2011, 12:42 AM
السلام عليكم ورحمة ورحمة الله ومساكم الله بالخير

يقول منوخ بن بجاد ال هادي


يالله يالـلـى لا الــه غـيــره =بيـوم اللقـا تاتـى لنـا رفـيـق

(العارضي) جا يثاري بـ/(جـوده) =و قدهـو علـى ذهابنـا شفـيـق

و (الهاجري) جا يثاري بـ/(الغضا) =ويـقـول خلـونـا وذا الفـريـق

والكـل منهـم جـا بيوفـى دينـه =و زدنـا الديـن القديـم بلحـيـق!

هذا في كنزان ..



ويقول شاعر هاجري نقلا عن ابن نعيرية الهاجري ( وهو مصدر غير ثقة نهائيا) ان بعد الرياحية بعامين معركة انتصر فيها ربعه على العجمان ويقول شاعرهم واسمه دغش الكدادي الهاجري


قولوا لبجـاد يخبـر (هـل الغضـا) =والله عليـم بالـدمـي الخفـايـف

خمسه وتسعين (قضى في هل الغضا)=مع مثلهم راحوا لقومـي طرايـف ..

الشاهد في الموضوع .. صحة موقعة الغضا فقط للعجمان على بني هاجر .. أما القصيدة المنسوبة للكدادي فلا صحة لها في رأيي والدليل قول منوخ ال هادي


(الهاجري) جا يثاري بـ/(الغضا) =ويـقـول خلـونـا وذا الفـريـق!

والكـل منهـم جـا بيوفـى دينـه =و زدنـا الديـن القديـم بلحـيـق!

وهذا في كنزان! ... 1916 ميلادي .. وهذا يعني أن الغضا .. لم يثأر لها بني هاجر بعد حتى كنزان...وهذا يؤكد أن أبيات الهاجري منتحله على لسانه ..والله أعلم

لذا نتساءل هل الغضا .. غير عن الرياحية ..وهل هي معلومة لديكم ؟

لكم صادق التحية

الـهـادي
23-07-2011, 02:30 AM
حياك الله يامنصور بالله ,,

الصراحه انا مالي علم في ذا الوقعه بس قصيده منوخ بن بجاد شاهد على ذا الوقعه

ومادام ابن النعيريه له طرف فى الروايه فا أخذها مني سالفته كذب بكذب لأنه كذوب وفيه بلا علي العجمان

فا لاتعب نفسك يابن عمي مادام ابن النعيريه له دخل بالموضوع

وسلامتك ,,

ابومحمد الشامري
23-07-2011, 03:15 AM
اشكر الاخ العزيز منصور بالله على طرح هذا السؤال والاستفسار عن الابيات السابقة.
الغضا هي معركة الرياحية التي قتل فيها بني هاجر مقتله عظيمة وهي بعد رجوع العجمان من البحرين في عام 1282هـ ومعركة الرياحية حدثت بعد رجوع العجمان من البحرين باربعة اعوام وبعدها حدثت معركة جودة وتعد الرياحية احد اسباب معركة جودة.
يقول الدامر:
كانوا بني هاجر فاضين المنامة واخذوا تقريبا ثلاثمائة سيف واخذوها العجمان منهم يوم الرياحية يقول بن صبيح فيها:

يوم الحقوهم سربه كنها عور=تحداء عليهم في تفقها احزامه
لا سندوهن لقد الرمح مكسور=ولا بطلن اخذنا سيوف المنامه

الابيات السابقة التي ذكرتها اخي العزيز منصور يذكرها محمد بن النعيرية في روايته انها في معركة فودة في قضا الرياحية وحدثت بعد عامين من الرياحية.

والكل منا يعلم روايات ابن النعيرية لا تستقيم مع المسار التاريخي للاحداث فالرياحية جاء بعدها معركة الوجاج وجودة والبره ثم دخول العجمان مع الامام سعود الفيصل الرياض.
يقول سعود ابو هلا وهو الامام سعود الفيصل :

يالله إني طالبك مـد عانيـه=في نهار ثار عجه وبـاروده
يا نديبي يم ذيـب الرياحيـه=ينهذب قدامنا والوعد جـوده
العشا جمع العوارض فداويـه=والغدا من قوم وبدان وجنوده
بشاية الله نقضب الشيخ بلحيه=والخناجر يلهبن جوف ماهوده

وسقط حكم عبد الله الفيصل ويروح جلاوي عقب انهزامه من العجمان في البرة يقول الشاعر:

كانك في دنياك فكران وتشوف=عبدالله الفيصل يطرد جـلاوي
حماي من المقطع لنقرة الجوف=ومن ديرة السيد تجيه الهـداوي
من عقب ماتتبعه دقلات وولوف=استنزله وبدان عنـده فـداوي

يقول محمد بن النعيرية الكدادي ان معركة فودة حدثت بعد الرياحية واخذوا بني هاجر قضاهم من العجمان ويرويها بقول الشاعر دغش بن سالم ال حامد الكدادي وكلهم من الكدادات من بني هاجر يقول دغش:

خذيت عاميـن وانـا أكـن عبـرة=والثالثـة منهـا عظامـي نحايـف
ذكرت الغضا ماني بخاطـي دلوبـج=كما الثور الأنبط همتـه بالعلايـف
يوم على فوده جرى مـن رفاقتـي=واحمدت انا ربي وسيـع الكنايـف
انا احمد اللي جابهم ثم رمـى بهـم=ثـم اتليناهـم بـحـد الرهـايـف
الـي عليـه مـن الرفاقـه جنابـه=غسلها ويبس لـه هـدوم نظايـف
قولوا لبجـاد يخبـر هـل الغضـا=والله عليـم بالـدمـي الخفـايـف
جبنـا ضحاياهـم عليهـم قريـب=من البعد ما نرضى لهم بالشفايـف
خمسة وتسعين قضى في هل الغضا=مع مثلهم راحـوا لقومـي طرايـف

يقول ابن النعيرية في روايته ان بني هاجر اخذوا قضاهم من العجمان في الرياحية بمعركة فودة وقتلوا منهم 190 بقوله:
( خمسة وتسعين قضى في هل الغضا / مع مثلهم راحـوا لقومـي طرايـف )

فنظر الى احتراف ابن النعيرية في كذبه جاب نفس عدد قتلى معركة الرياحية وحطهم في المعركة المزعومة المسماه بـ فودة ؟

فالعجمان اذبحوا من بني هاجر 190 في الرياحية وهم بني هاجر ذبحوا من العجمان 190 يعني لا غالب ولا مغلوب:) فابن النعيرية ما زاد رجال على 190 ولا نقص وش ذا المصادفة العجيبة!!! :)

يقول عبلان في الرياحية في حداء له :

الله من يوم جرى في الجـوف=ياما غشاه من ازرق الدخـان
ياليت علي حاضـرا ويشـوف=يوم اقتضى الداين من الديـان
( ميه وتسعيـن ) وعليهـا نـوف=اخذنا القضاء له من بني سرقان
هذا لعينا صاحـب المعـروف=اللي كسانا الجـوخ والقيـلان

ويقول عبلان في قصيدته المشهورة :

(ميه وتسعيـن ) فـي وجـه العكيليـه=واللي ومرنـا عليـه قـادر والـي
كن الجنايز خشب بيـر نسـع طيـه=يوخذ من الجم ويحذف به على الجالي
والذبح جا في المخاضيـب الهلاليـه=فرسان دهم السرايا عيدهـا الشالـي
امن المساريـر دار الحبـل قفريـه=ما عاد فيها مـن ال جـدي نزالـي
عفيت وطرشانهـا تمسـي خلاويـه=والذيب منها المدهال الغضـا حالـي
تروى شبا الهنـد وسيـوف يمانيـه=ماعاد يجلى حلاهـا كـل صقالـي
هذا بدل قولتـه فرقـان شاويـه=حنا المرازيق نقصر شبر من طالـي

ونرى تصديق ان بني هاجر لم يأخذون بثأرهم من العجمان في الرياحية قول الشاعر منوخ بن بجاد بقوله :

ياالله ياللي لا الهن غيرك=بيوم اللقا تاتي لنا رفيق
العارضي جا يثاري بجوده=وقدهو على ذهابنا شفيق
والهاجري جا يثاري بالغضا=ويقول خلونا وذا الفريق
الكل منهم جا بيوفي دينه =وزدنا الدين القديم بلحيق

فالرياحية وقعت في عام 1286 هـ وكنزان وقعت في عام 1333هـ فمنذ ذلك الحين لم يأخذ بني هاجر من ثأرهم من العجمان في الرياحية وهذا سبب اشتراك بني هاجر في حروب ابن سعود ضد العجمان.

وايضا بدو وحضر العارض لم يأخذوا بثأرهم من العجمان في يوم جودة يوم يقول شاعر من اهل العارض :

يا ذيب سلم لي على أهل جوده=كم ليلة عشوك يـا سرحـان
لابد ما ناخـذ قضـى جـوده=تسعمية من دولـة العجمـان

وهذا تصديقا مرة اخرى لقول الشاعر والفارس منوخ بن بجاد في كنزان :

العارضي جا يثاري بجوده=وقدهو على ذهابنا شفيق
والهاجري جا يثاري بالغضا=ويقول خلونا وذا الفريق
الكل منهم جا بيوفي دينه =وزدنا الدين القديم بلحيق

وسامحونا على القصور
:)

منصور بالله
24-07-2011, 12:18 AM
الهادي الله يحييك وأنت صادق قصيده منوخ بن بجاد شاهد على ذا الوقعه أما ابن النعيريه فلا أعتد بما يألف أبدا ولكن سؤالي عن اسم الوقعه .. تقبل سلامي

منصور بالله
24-07-2011, 12:27 AM
الأخ ابو محمد الشامري ما من قصور :) كفيت ووفيت الله لا يهينك

وأنا متأكد ان الأبيات المنسوبه للشاعر الكدادي منتحله أو على غير سنع للشواهد التي تناقضها

وإنما كان مقصدي أن أتأكد من اسم الوقعه فقط ان كانت هي نفسها الرياحية ولا هية أخرى للعجمان على بني هاجر ..لأنها جاءت على لسان منوخ ال هادي .. وهذا يكفي عندي دلالة على صحتها , وأنت أفدتنا مشكور

تقبل سلامي

البحر الهادر
07-08-2011, 10:26 AM
لا هنتوا على التفصيل والافادة