ياليت جدي من العجمان ### اللي على الحرب صباره

[دولة وادي العجمان]

ياليت جدي من العجمان ### اللي على الحرب صباره
ردوا سلامي على ضيدان ### وخميسن شاعت أذكاره

يالربع هذي بيتين من قصيده قيلت في العجمان وأعتقد أنها قيلت بعد هيت
العيينه ولكن من اللي يعرف تكلمتها يزودنا فيها ولكم خالص الشكر
دولة وادي العجمان

[ابن بحيح]

والله يالطيب القصيده هذي قالتها ساره بنت ابن حميد شيخ العتبان وهي تشره على ربعها يوم ماخذو الثار من ابن سعود يوم ذبح ابيها اللي هو ابن حميد وتمدح وتمنى انها من العجمان يوم خذو ثار ضيدان بالعيينه

والقصيده تقول فيها

وجد وجدي على ضيدان =وخميس ذاعت اخباره
يا ليت جدي من العجمان= اللي على الحرب صباره
اخيرمن ؟؟؟ العتبان= قولن تقوله لكم ساره

والصراحه ماكان ودي احطها بس عشان نبين لك السالفه يالغالي وذالسالفه ماتنقص من حق العتبان

[دولة وادي العجمان]

الله لا يهينك يابن بحيح على التوضيح و ونعم في عتيبه ومافيهم قصور
وصح لسان قايلتها

[MSH3AL]

لاهنت يالذيب


وماتنقص حق عتيبه



سلاااااااااااااامي

[غــشــام]

الاخ :دولة وادي العجمان اللة لايهينك
الاخ:ابن ابحيح بيض اللة وجهك
واللة ونعم بعتيبة الهيلا

[الحبيشي2]

لاهنت على نقل القصيده

[ابو فيصل الخويطري]

ونعم في عتيبه

وصح لسان ساره

ولاهنت يبن بحيح

[السنافي]

الاخ :دولة وادي العجمان اللة لايهينك

الاخ:ابن ابحيح بيض اللة وجهك

[ربعي ياهلي]

لاهنتوا ..

إبن بحيح .. السالفه هذي صارت ولا ماصارت ... ؟

معروف انها صارت ... لذا أتمنى تكتب السالفة كاملة ...ننتظرك ياغالي وهذي كتابة تاريخ

[ابومحمد الشامري]

ونعم في قبيلة عتيبه وبشيوخهم وكما ذكرنا هذي ابيات لسارة بنت الشيخ سلطان بن بجاد ال حميد احد زعماء الاخوان:
وهو سلطان بن بجاد بن سلطان بن هندي بن حمد ابن حميد(ابالروس) ويلقب بسلطان الدين فهو حفيد سلطان بن هندي أخو محمد بن هندي واخواله هم الرباعين حيث ان جده لامه هو الأمير والفارس المشهور مسلط بن محمد بن ربيعان.
تسلم الزعامة بعد وفاة محمد بن هندي في وقت وصل فية الفارس البدوي الى أعلى درجات فنون القتال للدرجةالتي جعلت الكثير من المستشرقين يصف تلك الشجاعة والاقدام في تقاريرهم بالاسطورة وكان لانتشار وظهور الدعوة الوهابية في تلك الفترة التي أعادت أبناء القبائل الى الدين الاسلامي الصحيح أثر كبير علية إذ سرعان ماظهرت علية مظاهر التدين الى أن أصبح من أشد الناس حماسة ونصرة للدين وتجلى ذلك في حركة الأخوان التي كان أول ظهور لها في وقعة جراب عام 1914 م . وقد قاد ابن بجاد الأخوان في أول الفتوحات في معركة تربة الشهيرة ضد الشريف ومن معه من الأنجليز ثم فتح الطائف وفتح مكة المكرمة وحصار وفتح جدة والمدينة . وتوفي بن بجاد عام 1352هـ.

لا اريد ان ادخل في التفاصيل ولكنها قالت هذه الابيات بعد مقتل ابيها الشيخ سلطان بن بجاد على يد ابن جلوي عبد الله وابنه فهد وقيلت هذه الابيات بعد ان علمت ان العجمان قتلوا الامير فهد بن بن عبد الله بن جلوي في كون العيينه .
ولقد ذكر الشاعر محمد الغالي المري رحمه الله احداث معركة العيينه فقال:

يوم جيـنا مع الـصـوان جـرداني = يا زيـن ضـرب النمـش فـي قــوم عـبـدالله
بندق في "العيينة" حج راعيها= طَيّرت من (فهد) في كبد (عبد الله)
ليت من هو بزين الصوغ حاليها= أنقذت من خبيث الفعل خلق الله
أربع آلاف راحت هي وراعيها= كل ألف بميّة من جنود الله

فعندما علمت سارة بنت الشيخ سلطان بهذا الخبر قالت تتوجد على قبيلة العجمان:


يا ليت شوقي من العجمان= اللي على الحرب صبّاره
لا خير في ربعي العتبان= قولن تقوله لكم ساره

وقبيلة العتبان ما فيهم قصور وهذه الابيات لاتمثل الا قائلها.

ولا هنتم

[ربعي ياهلي]

تسلم يابوحمد ... وعزالله انك مرجع ماشاءالله ... ربي يحفظك

[فيصل بن محمد]

بيض الله وجهك يابو حمد على التوضيح ولكن القصيده الصحيحه هي حقت ابن بحيح بس المصادر اللي انت ماخذ منها تبغى تعدل فيها لان بعض الكلام نقص في عتيبه ولكن التاريخ مايرحم ومهما قالت الصدق ساره بس العتبان ونعم فيهم هل سربه

[دولة وادي العجمان]

يالربع ونعم في عتيبه ولااجل العيينه انا بقول اللي في خاطري من دون تقصير بالقبايل كلها
لا ذكرت أنا ربعي ما أكتفيت &&& ياما خذينا ثارنا ياما
ولا هنتوا جميع على المرور الكريم والمشرف
تحياتي لكم
دولة وادي العجمان

[khld]

الله لايهينكم كلكم وبيضالله وجيهكم
كلكم
وعتيبه فيها حقها الجواد ولا فيهم قصور
ذباحة الحايل لطامة العايـــــــل

[جابر البطان]

صح لسانكم جميع على القصيد وسوالفه اللي معه

وهذا فعل العجمان ما أحد ينكره ويتنومس به كل يامي والله نصرهم على من ظلمهم

ونعم بعتيبة الهيلة

وكما قال أحد شيوخ العتبان : يوم سمع بسالفة العيينة قال أعتيبة تمنت يوم مثل ذا ولا حصلته ونعم بالعجمان

.

[هــــــــــادي]

لاهنت

ومشكور


هادي

[زبون الجاذيه]

الله لا يهينك تحياتي

[اليامي2]

اللي سمعت أنها تقول:
تكفون ياربع سلطان..............مامنكم اللي خذا ثاره
ياليتني من العجمان..............اللي على الحرب صبارة

[ALSFEER]

لا هنتم ياجماعة على التفاصيل الواضحة ونعم في اعتيبة مافيهم شكة

لكن انا بستفسر منك يا ابوحمد الشامري الله يطول في عمرك انت ذكرت ابيات للمري ابن
الغالي في معركة العيينة لكن هناك لبس على مايبدو عندك وعند اكثر العجمان ,, وهي ان
اول بيت


يوم جينا مع الصوان جرداني = يازين ضرب النمش في قوم عبدالله


هذا البيت مطلع لقصيدة رجل من الناجعة وهو حضر المعركة اما الابيات الاخرى فهي كما ذكرت للشاعر المري

ان شالله تتقبل برحابة صدر يالسنافي

وفقكم الله

[الهوازني]

ياخوان سلطان بن بجاد بن حميد سجنه ابن سعود وسجن نايف بن محمد ابالكلاب بن حثلين ولايعلم عن مصيرهم إلى الان ولكن كيف الشاعرة تتمنا انها من العجمان والعجمان مثل العتبان لم ياخذوبثار هؤلا الشيوخ انا لا اعتقد ان القصيدة لبنت ابن حميد ولم اسمعها من رواة عتيبة وإذا انكم تفتخرون بقتل فهد بن جلوي فنحن قتلنا سعود بن فيصل ال سعود اكبر مكانه من ابن جلوي

[اليامي2]

الشيوخ اللي سجنهم بن سعود هم
أبا الكلاب والدويش وبن لامي
أما الشيخ اللي أخذ بثأره العجمان فهو الشيخ ضيدان بن حثلين
أردت التوضيح للهوازني

[عبدالله بن جفن]

القصيده لا تعرف منهي له ولكن ((((يبدوا من لهجتهاا شماليه)))) ..


ردوا سلامي على ضيدان // وخميس شاعت اذكاره ..
ياليت جدي من العجمان// اللي على الحرب صباره ..
عجمان يوم القى فرسان // كم واحد(ن) خربوا كاره ..


الخ ......
وفيها بعد انها تذكر ابن سرحاان ...
ولكن المشهور منه اول بيتين ..

وخميس في القصيده هو : خميس بن منيخر ...

ولكم التحيه

[منصور]

ياخوان سلطان بن بجاد بن حميد سجنه ابن سعود وسجن نايف بن محمد ابالكلاب بن حثلين ولايعلم عن مصيرهم إلى الان ولكن كيف الشاعرة تتمنا انها من العجمان والعجمان مثل العتبان لم ياخذوبثار هؤلا الشيوخ انا لا اعتقد ان القصيدة لبنت ابن حميد ولم اسمعها من رواة عتيبة وإذا انكم تفتخرون بقتل فهد بن جلوي فنحن قتلنا سعود بن فيصل ال سعود اكبر مكانه من ابن جلوي
ياالهوازني حناذبحناسعدبن عبدالرحمن وصوبنا عبدالعزيز وذبحنا بن جلوى عط روحك العفيه وحناسويناشي محدسوه

[ابن طفله]

الله لا يهينكم على التوضيح كفيتوا ووفيتوا

[سلطان الشامري]

ياوجد حالي على ضيدان=وخميس(ن) ضاعت اخباره

ياليت ربعي من العجمان=قوم(ن) على الحرب صباره

وياليت ماني من العتبان=قول(ن) تقوله لكم ساره


هذي الابيات الي انا اعرفها وسمعت فيها

ولا هنتوا

[مسعطر]

الروايات كثيره ,,
و في نظري أن اصحها في ترتيب الأبيات هذي :


يا ليت ماني من ( العتبان )=قول ٍ تقوله لكم ( ساره )
يا ليت شوقي من ( العجمان ) = اللّي على الحرب صبّاره
يا مَن يسلّم على ( ضيدان ) = و ( خميّس ٍ) شاعت أذكاره

و البيت هذا شبع من الكسور و اعتقد انه مضاف عليها من الرواة :
تكفون يا ربع سلطان = ما منكم اللي خذا ثاره



طبعاً القصيدة ما تنقص من قيمة عتيبة ,,
حتى لو ظهرت من أحدى بنات القبيلة ,,

[فهيد البطان]

لاهنت والقصيده الي نسمع بها الي يقول@@@ يــوم جيـنـا مــع الـصـوان جـردانــييا زين ضرب النمش في قوم عبدالله
بنـدق فــي "العييـنـة" حــج راعيـهـاطَيّرت من (فهد) في كبد (عبـد الله)
ليـت مـن هـو بزيـن الـصـوغ حاليـهـاأنقـذت مـن خبيـث الفعـل خلـق الله
أربـــع آلاف راحـــت هـــي وراعـيـهـاكــل ألــف بـمـيّـة مـــن جـنــود الله