ذكــريــات عـبدالعــزيز [الأرشيف]

عبدالعزيز الحربي

14-10-2010, 10:47 PM

بسم الله الرحمن الرحيم

الحمــــد لله وحــــده .. وصلاة ربي وسلامه على من لا نبي بعــــده ..

أمـــــــــــــــا بــعــــــــــــــــــد /

أخـــوانــي / أخـــواتــي
في هـــذا المنتـــدى المبــــارك :

الســـــــلام عليــكـــــــــــم ورحمــــة الله وبركــاتــه :

أفتتحــت هــذا المــوضــوع في هذا القســم وكلي أمــل في أن أقـــدم ما يرضــي الجمــيـع , علمــاً أن اغلب حـديـثـــي هــنا ســيـكـــون بمشيئة الله تعالى شـعــــراً , وعسى أن أكون عند حسن الظن بي .

وتقبلــــــوا تحيــــات وتقديـــر أخوكـــــم عبدالعزيز الحربي .

http://www.mydanalshar.com/image.php?u=4124&dateline=1287076386

تم تدوينه في 7 / 11 / 1431 .

عبدالعزيز الحربي

14-10-2010, 11:18 PM

الصبر مفتاح الفرج كيف تنسـاه؟..لا تغـلـق ألاّ بـابٍ يجــوز غـلـقـه
وان ضاع صبرك دوّره لين تلقاه..وان ما لقـيـتـه دوّره زيـن والـقـه
مايجلس المومن على حيد مركاه..ويقول ابي من كل الارزاق شلقه !

عبدالعزيز الحربي

14-10-2010, 11:18 PM

ظلما الجهل فوق نور العلم معتليه **** حاجه غريبه ولكن صارت وحصلت
ياوقت مالي أشوف الناس مبتليه ؟ *** ماكن أحد من سياج المشكله يفلت
دنيا غثاها تعدا الكبــد للكليــه **** تشابكت مع نوايا إبليس واتصلت
فيها دروب الحيا بالشوك ممتليه **** وفيها طريق الخطر مرصوص ومزفلت

عبدالعزيز الحربي

14-10-2010, 11:20 PM

ياطول ليلي ياهوى البال طولاه ........ الفجر عيّا لا يجي والقمر غاب
هـذا الزمـان اللي غريبه مزاياه ........ الرابح اللي يكتشف للفرج باب
ياللي تبي باب الفرج وين تلقاه؟ ....... فكّر وجاوب قبل أسمّيك كذّاب!

عبدالعزيز الحربي

14-10-2010, 11:20 PM

مالقيت أكذب من الاعـلام تلفـاز وصـحـافـه .. .. الحقـيـقـه شـيّ واللي يذكــرونـه شـيّ ثـانـي
مصدرٍ موثوق صرّح , هاه يامصدر خرافه؟ .. .. ويش عندك غير تعقيد الشوش هي والآذاني؟
كـل عـلـمٍ تذكــره تنسى وتعـطــيـنـا خـلافـه! .. .. تلك حالات الكـذوب اللي من الدوخـه يعـاني
دوخـة الكــذّاب ماهي من تعـب والاّ كـلافـه! .. .. في نظام الكذب سرّك ينكشف باربع ثواني!!
مدمنـين الكذب من زود الحقاره والسخافـه .. .. في نظـرهم كلّ خلق الله حـروف بلا معـاني!!

عبدالعزيز الحربي

14-10-2010, 11:26 PM

ألا يـالله ثـبّــتـــنــا عـلى الاســــلام لــيـن نـمــــوت .. .. وبعّـدنا عن اللي يـكـرهـون الديـن الاسـلامـي
أشوف الصحف قامت تجمع العـاقـل مع السربوت .. .. وبين الحـقّ والباطل ما بين الشرق والشامي
أسـاس الحـنـظـلـه مـن خلقـة الدنيا ما تنـبت تـوت .. .. وفرق المـرّ والحـالي مايبـغى موجـز إعلامـي
لكـنّ اللــيـل مـظـلـم والـمـطــيّــه قــيـدهـا مـفـلـوت .. .. وحـدّتها هـبوب الغـرب صوب المورد الضامي
ولن جـيـنا الحـقـيـقـه وش يجـيب الرمث للياقـوت؟ .. .. عجـيبه نظـرة العـلمانـي اللي غـرّه الجـامي!!
باسـم حـرّيـة التـعــبـيـر قـامـت حـمـلـة الطـاغـوت .. .. بمـيـدان الحـزازيّـه و وطيس المعركه حامي

عبدالعزيز الحربي

14-10-2010, 11:32 PM

لا تسأل المهموم وش جاب همّه .. .. .. يمكن يصيـبك همّ وتصير مهمـوم
أبعــد وخـلّـه لا تجـيب المـطـمّـه .. .. .. هـذا إذا مانته مضــيّع ومـنـجــوم!

عبدالعزيز الحربي

14-10-2010, 11:32 PM

في داخل القلب مدري داخل عيوني ......... أو بالأصح أنت تسكن قلبي وعيني
وان كان قالولك انّي فـيك مفـتوني ......... هـذا فـقط جـزء لو الكامـل يـبـيـنـي

عبدالعزيز الحربي

14-10-2010, 11:33 PM

نظـمـتـلـي قـافٍ بلـيـغ الـبـلاغـه ... يبـلـغ بلـيـغـين الـبـلاغـه بلـوغـه
من شاعـرٍ فكّــر وقـرر وصاغه ... ولاكل من يبغى يصوغه يصوغه
وضح النقا مافيه حروة مراغـه ... ومنهج مسير العدل مافيه روغه
مايقـنـع الفـارغ ويمـلا فـراغـه ... إلاّ نـهــارٍ فـيــه للـعـــيـن زوغــه
اليانقلب ثقـل الجسـد خـفّ باغه ... وعقل الفتى النابغ تلاشى نبوغه
يزوغ عقلٍ شوف الاهوال زاغه ... ويغيب نـورٍ كـان واضـح بزوغـه
من زاد تفكـيره تشـطّـب دماغـه ... أسـبغ شقا نفسه وزوّد سـبوغـه

عبدالعزيز الحربي

15-10-2010, 04:08 PM

طيارة أشواقي على موعد إقلاع......طيّارها قلبي وركّابها أشواق
كشّافها الضوئي تقل برق لمّاع.......أخيلها بالجو مزنه وبراق

عبدالعزيز الحربي

15-10-2010, 04:08 PM

بين آمال التوبه وبين لحظات الفنا ..... صعب تمييز الهدف صعب تحديد المصير
أحرقتني نظرة الشوق من عينه وانا ..... محترق من قبله بنار تأنيب الظمير

عبدالعزيز الحربي

15-10-2010, 04:09 PM

الحب والشوق والتقدير والفرحه......جمعتهن كلهن وارسلتهن يمك
غلاك يصعب عليّه وصفه وشرحه......بس الأكيد أني بعينيني أضمك

عبدالعزيز الحربي

15-10-2010, 04:09 PM

أنت القمر والا سهيل اليماني؟.......والا الجدي والا أنت نجم الثريا
دورتلك ياصاحبي وصف ثاني.......وغير القمر مالك شبيه وحليّا

عبدالعزيز الحربي

15-10-2010, 04:10 PM

أنت لو تطلب عيوني قلتلك هذي عيوني.....لو بغيت عيوني الثنتين قلت أبشر بعزك
خدمة" من قلب ماهي مثل خدمة ساعدوني.....ذيك خدمة مصلحه تضحك عليك وتستفزك

عبدالعزيز الحربي

15-10-2010, 04:10 PM

كانك مصمّل تغيب وتشغل أفكاري.......قلي وش اللي يداوي صدمة غيابك؟؟

عبدالعزيز الحربي

15-10-2010, 04:11 PM

ياسلام الله على قلب" من الشكّه منقّا ..... بين حدب ضلوع صدري خالقه ربي تعالى
قلب" أصمد من صمود الضلع لكنه مشقّا ..... من هوا اللي نور خده مثل براق" تلالا

عبدالعزيز الحربي

15-10-2010, 04:11 PM

لقيت لك في جسمي أربع جماهير == الفكر والاحساس والشوف والسمع
إن غبت عني صار بالمخ تغيير == ما ميّز القسمه من الطرح والجمع
وان جيت جتني كل فرحه بتعبير == بالكشف والإشعاع والقدح واللمع
يامشغل" عندي جميع التفاكير == شمعت قلبي فوق برج الهوى شمع

عبدالعزيز الحربي

15-10-2010, 04:12 PM

عبدالعزيز الحربي

15-10-2010, 04:12 PM

المال قطّاع الطرق يسرقونه === بس القصيد أظن من يسرقه دلخ
واللي يبيع الشعر منهو زبونه؟ === ياناس ملّينا من النصب والصلخ
يامنتحل شكل الحرامي ولونه === أنته وهو فراغ شرطه نقاط ألخ

عبدالعزيز الحربي

15-10-2010, 04:12 PM

ياساكن القلب قلبك مسكن لقلبي.......قلبك سكن قلبي وقلبي سكن قلبك
فيك الوفا إيجابي ومنك الردا سلبي.......عنك الردا شد يوم الطيب نازلبك
ان كان لي حق عندك لا تماطلبي.......شفني تحمّلت كل إيجابك وسلبك

عبدالعزيز الحربي

15-10-2010, 04:13 PM

لا تغلا والتغلي مايجــوز............أنت من دون التغلي لك مقام
أنت لو نافسك غيرك مايفوز...........في سباق المعرفه والاحترام
تستحق المال كله والكنوز............وفوق ذلك تستحق أحلا سلام

عبدالعزيز الحربي

15-10-2010, 04:14 PM

نسيت سجاتي علشان سجه ==== ياللي سبايب سجتي كلها منك
القلب والتفكير يمّك توجه ==== والعين حتى في غيابك تعاينك
ياليت صدري في يدينك تفجه ==== حتى تأكد ان بالقلب مسكنك
ماعنك لا صده ولا عنك هجه ==== يافرصتي بالعمر غصب أتحيّنك

عبدالعزيز الحربي

15-10-2010, 04:14 PM

عبدالعزيز الحربي

15-10-2010, 04:14 PM

لضاق صدري وارتفع ضغط دمّي ==== دقّيت سلف ورحت يم المدينه
ثم انشرح صدري وفارقت همّي ==== وحسّيت بالراحه وطعم السكينه

عبدالعزيز الحربي

15-10-2010, 04:15 PM

يارفيق العز والطيب والراي الصويب === حظ من بينك وبينه معزه واحترام
مابلشنا فيك ياصاحب العقل اللبيب === مشكلتنا عالم" مايردون السلام
يمرسون السم الاحمر مع الماء والحليب === ماعرفوا فرق الحلال المباح من الحرام

عبدالعزيز الحربي

15-10-2010, 04:15 PM

عبدالعزيز الحربي

15-10-2010, 04:16 PM

على الدنيا السلام وياهل المعروف سمّوني :- .... [وحيد الفكر] والدنيا ماعاد أبغى صداقتها
بعد ماعذّبتني لين شفت الموت بعيونــي ..... أبنساها وابنسى ذكرهــا وافطع علاقتها

عبدالعزيز الحربي

15-10-2010, 04:16 PM

أدري وبعض أحيان ماودي أدري **** لو كنت داري قلت ماني بداري
لا ناقص" حاجه ولا قلّ قدري **** عاقل وهذا مقصدي واعتباري
أضحك واوسّع بالسواليف صدري **** التغطيه زينه والارسال جاري

عبدالعزيز الحربي

15-10-2010, 04:17 PM

العـقـــل لا يـشــرا ولا يـنـتـبــدل **** أنصحــك يا عـاقــل تدبّـر وفـكّــر
ان كنت مخطي درب حاول تعدل **** وان كنت فاعـل خـير صـدّ وتنكّر
لزاد ضغطك ضعت لو كنت مدّل **** وان قلّ ضغطك تطعم الملح سكّر

عبدالعزيز الحربي

15-10-2010, 04:19 PM

وشلون أبسمع مطاليبه وانفّـذهـا؟ **** لصـار مايعـجـبـه فعـلـي ولا قـولـي!
أنا أعرفه زين قبل الروح ياخذها **** وهو ماعرف منّي ألاّ عرضي وطولي
روحي غريقه عسى الرحمن ينقذها **** في بحر حبّه غرقت وغرقت سطولي
خذها ياعبدالعزيز ابن سعد خـذهـا **** من كفّ حظٍٍّ ماهو عن شي مسؤولي

عبدالعزيز الحربي

15-10-2010, 04:19 PM

يقول من صبره على الهمّ غطّا **** ياحظ من غطّا على الهمّ صبره
أمشي على درب القدر واتخطّا **** واخذ من الدنيا تجارب وخبره
بعض العرب على الحيايا ايتوطّا **** واذا الحقه منهن خطر هلّ عبره

عبدالعزيز الحربي

15-10-2010, 04:20 PM

ياعنتر العبسي معك سالم الزير **** تبغى الحقيقه*كلبونا دواهي
أنا أشهد انك داهيه مار أنا غير **** لا تحسب اني عن محايلك لاهي
ان جيتني بالعنتره قلت لك خير **** ترا الشدايد غير وقت الملاهي
وان جيتني بالكيد أدبّرك تدبير **** ان مانهتني عنك بعض النواهي

عبدالعزيز الحربي

15-10-2010, 04:20 PM

عبدالعزيز الحربي

15-10-2010, 05:57 PM

حبك يذكّرني بعنتر وعبله.......عبله هوت عنتر وعنتر هواها
ياصاحبي عطني على الخد قبله......واعطيك روح" كامل" محتواها
الحب لو كل البشر تنتسبله.......تبقى مواصيله بعيدا" مداها

عبدالعزيز الحربي

15-10-2010, 05:59 PM

في رحلتي شفت كل أنواع خلق الله........الطيّب المحترم واللي على عكسه
مار الوفاء مابغيت ألقاه من قلّه........الوضع مقلوب والافكار منتكسه
واللي بقلبه غليل ومهلكه غلّه........أردى من اللي قضى عليه باتكسه
يقطعك يارفقة" ماهي على الملّه........تقول رفقة خطاب الفاكس مع فاكسه

عبدالعزيز الحربي

15-10-2010, 06:00 PM

الأورده وعروقها والشرايين.........والصدر وضلوعه والاعصاب والروح
والقلب والفؤاد والراس والعين.........والجسم كلّه لك بساتين وصروح

عبدالعزيز الحربي

15-10-2010, 06:00 PM

عطني مواثيق المحبه وانا أعطيك.......ميثاق حبّ" مستحيل التراجع
لعل من حاول عن الصدق يثنيك.......يندم على فعله ويأثم وياجع
تكفـا ترا ماعـاد لي حيلـة" فيـك.......أخاف يفجعني من الهمّ فاجع

عبدالعزيز الحربي

15-10-2010, 06:01 PM

الحب جوف القلب مخفي ومدسوس................ماهو كلام لسان والاّ إبتسامه
والحب ما يشرا وينباع بفلوس...............حب الشرف ماهو بـ حب الندامه

عبدالعزيز الحربي

15-10-2010, 06:01 PM

قالت تفضّل قلت أنا ودي أروح.........عندي شغل يابنت ماني بـ فاضي
قالت تراك ان رحت مانته بـ مسموح.......قلت الزعل ممنوع عقب التراضي
قالت علامك تنتفض قلت مجروح........قالت وش البرهان قلت إنتفاضي

عبدالعزيز الحربي

15-10-2010, 06:02 PM

بركان حبك تفجّر داخل عروقي ==== لين الظمير أرتوى من نار بركانك
يامالك القلب عطني كامل حقوقي*==== ماتدري أني هجرت الناس من شانك

عبدالعزيز الحربي

15-10-2010, 06:02 PM

يامسلمين ليادعيتم للاسلام ==== ترا الدعاء ماهو مغير لفلسطين
للمسلمين بشرق الاقطار والشام ==== بالهند بالصومال بارض الفلبين
وكشمير والافغان وبلاد صدام ==== والترك والشيشان مع مصر والصين
مع دولة السودان مع كل منظام ==== واهم شي اللي بكوبا مساجين

عبدالعزيز الحربي

15-10-2010, 06:19 PM

شعري اللي منبعه من جوف صدري......مادعيته لين شفت أنه دعاني
للقصيــد شـروط والشعــار تــدري......غير وزن وقاف تنسيق ومعاني

عبدالعزيز الحربي

15-10-2010, 06:21 PM

ان كان ودك تعرف إبليس عن قرب.......أدخل محلاّت الحريبي وسربال
خلفك مره يارجل وخّر عن الدرب.......لاتعترض درب النساء وابت رجّال!
ياكثرهن بالسوق سرب" ورا سرب.......ماشوف غير عيون ونـهـ واذ....ال
ذيك الحبارى تنتظر جيّة الخرب.......اللي تركها بين شارع وعمّال
وهذيك تلقي درس عن جدول الضرب......تعليم ليلي والتلاميذ بنقال!
ياهيئة المعروف ماينفع الضرب......شوفولهن صرفه ترا شرهن طال
أما اعزلوهن مثل ماتعزل الجرب......والا إمنعوا عباية الكتف والشال
صارن علينا أشد وافتك من الصرب......والعن من إسرائيل في بعض الاحوال
يالله ياللي تفرج الضيق والكرب.......أمّا أهدهن والاّ أحصهن ثمّ زلزال

عبدالعزيز الحربي

15-10-2010, 06:22 PM

ظلمتني ظلم دوريات" أمنيّه...........لضعيّف" من ضروف الوقت ماجدّد
وشلون ماخفت ربّ" يعلم النيّه...........يامخفي السر رغبه مدري مهدّد
ماتنطق أحبّك ألاّ عقب جاهيّه...........وتقولها وانت متحسّف ومتردّد

عبدالعزيز الحربي

15-10-2010, 06:24 PM

ياولد عمّي لياهاضت قريحه ...... عند شاعر من شواعير الأغاني
أتركه جعل الولي عنّا يزيحه ...... مايسمّى شعر هذا نوع ثاني
ماقشر المكياج بوجيه" قبيحه ...... والكلام اللي يبيله ترجماني
مار خذها من ولد عمّك نصيحه ...... موت عزّ ولا حياة" بالهواني
لا تطيع النفس تاقع بالفضيحه ...... ماعلى الدنيا يابن عمّي ضماني

عبدالعزيز الحربي

15-10-2010, 06:26 PM

لك في ظميري وجود ولك معي طاري..........على مدار الزمان أيام وليالي
ان كان مشتاق ودك تعرف أخباري..........أخباري إنك خذيت القلب ياغالي
جيتك بليل الهوى متعنّي وساري...........أمشي على ضوّ خدك بالخلا الخالي

عبدالعزيز الحربي

15-10-2010, 06:26 PM

عساك بالدنيا تعيش بسعاده ==== وبالآخره عساك في جنة الخلد
يا من خذيت الطيب مذهب وعاده ==== لعل من عاداك للسجن والجلد
من رايي الشخصي عطيتك شهاده ==== في مثلكم لا تحمل إنثى ولا تلد

عبدالعزيز الحربي

15-10-2010, 06:28 PM

البارح أنا وروحي حرب ومفاتن **** أنا أعلن التوبه وهي ترفض الفكره
قصدي أعوّض سنين" بالجهل فاتن **** وهي قصدها الملتزم هذا الزمن يكره

عبدالعزيز الحربي

15-10-2010, 06:28 PM

ألقاك في قلبي متى مابغيتك.............واكررك في خاطري واستعيدك
وليادخلت إرشيف مخّي لقيتك............يا من خذيت القلب والعقل بيدك

عبدالعزيز الحربي

15-10-2010, 06:29 PM

أعشقك عشق النداوي للطلوع..........يوم نادولـه وفكّــوا برقـعــه
لو تغيب شوي سمّيتك قطوع...........حيث في شوفك لعيني منفعه
غيبتك ياصاحب النفس الولوع...........تسهر عيوني وقلبي تخلعه

عبدالعزيز الحربي

15-10-2010, 06:29 PM

هلا باللي عيوني لحظر قامت تهليبه ** ترفّ عيوني لشوفه وتفرحبه شراييني
وانا أفرح لطبني شي والبّي مطاليبه ** وانا أسلّيه لجاني علشانه يسليني
وله عندي هديّه غاليه بمناسبة طيبه ** أقدّم له على حسن التعامل قلبي وعيني

عبدالعزيز الحربي

15-10-2010, 06:29 PM

يفز قلبي على نغمات جوالك.............واقوم أرحّب بجوالك وارحّبّــك
أبلشتهم من كثر ماذكرك واسعالك............اللي مدحك أمدحه واسب من سبّك

عبدالعزيز الحربي

15-10-2010, 06:30 PM

أسمح لقلب المحب أنه يزورك..........مع بداية كل لحظه من حياتك
وانت لو تحظر يشرّفني حظورك..........أفتخر لصرت ضيفي من غلاتك

عبدالعزيز الحربي

15-10-2010, 06:30 PM

ما يغثّ البال ويضيّق الصدر الوسيع..........غير زلاّت الحبايب بدون أدنى سبب
والله ان الظلم ياصاحبي ذنب" فضيع.........والغريب أني معك ملتزم حسن الأدب
كيف تجرحني وانا اللي عطيتك ماستطيع.......أعتقد هذا العجب هو سبب كل العجب
صرت بعيونك دهر وانت بعيوني ربيع.........كاسبلّك سلم ماهو من سلوم العرب

عبدالعزيز الحربي

15-10-2010, 06:31 PM

ياسيدي يوم ان كل" له اسياد........من غيرك اللي يستحق السياده
حنا ابتلينا بناس للناس حساد........ناس" خذوا سلم الشياطين عاده
على بعضهم ضيق وهموم وانكاد........وعلى المعادي وسع صدر وسعاد
ياسيدي وجروح الايام تزتداد.........والمشكله ماعاد أطيق الزياده
فزعتك يا من فزعته مالها أضداد........قبل أتحوّل تحت ناري رماده

عبدالعزيز الحربي

28-10-2010, 07:11 PM

بسـم الله الرحـمــن ربّ السمــوات ..... بديت باسمه وافضل الذكر ذكره
ولياختلط مع هاجس الشعر سـجّـات ..... حكرت قافٍ يتعب الناس حكره
العــيـد بكــره ياعـيـوني ســلامــات؟! ... تكفـين لا تبـكـين والعـيـد بكـره
قالـت حـزينـه والمـدامــع حـزيـنـات ..... والا تراي أكره مثل مانت تكره
قلت أصبري قالت نفد صبري ومات ..... طيرٍ غدا واللي بقي معي وكره
قلـت أيـه مـعــذوره ولا من مـلامـات ..... واللي يلومك ما معه ربع فكره
ياعــيـد سـامـحـنـي تـرا كـلّـي آهات ..... والمعـرفـه بعـيوني اليوم نكـره
فقـدت أبـوي وفـاقــد ابـوه بـالــذّات ..... تـلـفّـبـه دنيـا العـنا لـفّ مـكــره
اضحك واداوي حر فرقــاه بسـكـات ..... وصبحي ظلام وحالة الجوّ عكره
تـمّ الكــلام اللي خـتـمـتـه بـكـلـمـات ..... ولله حـمـده وامـتـنـانـه وشـكره
ويالعبد مهما طـال عـمـرك سـنـوات ..... للعـمـر وقفـاته وللمـوت سـكره

عبدالعزيز الحربي

28-10-2010, 07:32 PM

الخوّه اللي ماهي لله ماهي خوّه..............أحطّها تحت رجلي واتوطاها
أبحتزم ضدها واستخدم القوه.............واحدها لين أوردها على أقصاها
إلى متى انزيّف الاعذار ونموه.............ونضحك على أرواحنا ونزيد بلواها
ونعيش في عالم" مشبوه ومشوه.............به عيشة الضنك بضع سنين عشناها
عالم سخط وانحطاط ومظلم" جوه..............منه المصايب على أنفسنا جنيناها
وصرنا على مايريده كل متفوه..............باسبابنا برر الغيبه وزكّاها
أقول راح الجهل واثر الجهل توه.............اثر الجهل طاول سنيني وخاواها
وان جيت للقاعده في منهج الخوه:- .......... (الخوه اللي ماهي لله مابغاها)

عبدالعزيز الحربي

28-10-2010, 07:33 PM

يا محلا المكشات في روضة خريم ==== مع واحدن مايدبل الكبد طبعه
معلّـمــه ربـّه ما يحتــاج تعلـيـــم ==== لو خانتــه دنيـاه ماخـان ربعه

عبدالعزيز الحربي

28-10-2010, 07:35 PM

ياناشد العالم عن أسباب حزني.............حزني عميق ويعلمه عالم الغيب
ماني بـ فرصه سانحه تنتهزنـي.............ولا ني من اللي يجهلون المواجيب

عبدالعزيز الحربي

28-10-2010, 07:36 PM

الصمت قاتل والسوالف متاهـه .......... علـى كـذا راع الحيـا بين ناريــن
واجب على العاقل يزيد انتباهه .......... بالذات في وقـتٍ ضعوفه سلاطين

عبدالعزيز الحربي

28-10-2010, 07:37 PM

صد وتنكر عقب ذيك الرفاقـه .....
ياليتني عن رفقتي ذيك خيرت
اتلا العهد به يوم قطع العلاقـه .....
للغرب سيّر يوم للشرق سيّرت
قدمي طريق الخير واسع نطاقه .....
وإليا تغير صاحبي ماتغيـرت
طلعت سالم لو شعرت بحماقـه .....
مستني الطيره وانا ماتطيـرت
اللي علشانه كرهت الصداقـه .....
إلا صداقة واحدٍ فيـه نيـرت
ماعاد يحزني جفـاه وفراقـه .....
فرقاه عيد وعقبها ماتحيـرت
الله عطاني عقل فهـم ولباقـه .....
إليا بغيت اختار صاحب تخيرت

عبدالعزيز الحربي

28-10-2010, 07:37 PM

ياساكن القلب قلبك مسكن لقلبي .... قلبك سكن قلبي وقلبي سكن قلبك
فيك الوفاء إيجابي ومنك الردا سلبي .... عنك الردا شد يوم الطيب نازلبك
ان كان لي حق عندك لا تماطلبــي .... شفني تحمّلت كل إيجابك وسلبك

عبدالعزيز الحربي

28-10-2010, 07:38 PM

يازين سجّات الضمير اللي يسلّن الضمير .. لو ان بعض أحيان سجّات الضمير اتعذّبه
لكن لياجينا الصحيح الشر شر الخير خير .. مره تصير مناسبه واحيان غير مناسبه
وان كانها قامت على راسي تلف وتستدير .. الفكره اللي محتواها بين أكيد ومشتبه
ضربتها في حايط الذكرى يصير اللي يصير .. لا بارك الله في شجيعٍ مايقوم بواجبه

عبدالعزيز الحربي

28-10-2010, 07:39 PM

يامختفـي عن عين غاليـك فتـره .... فترة غيابك خلّت الحيـل فاتــر
البستني من لبس الاحزان ستره .... لو كان ما في لبس الاحزان ساتر
الوصل ثوب وبشت أماره وغتره .... والهجر وصفه ماتشيله دفاتر

عبدالعزيز الحربي

29-11-2010, 08:30 PM

يانجمـةٍ بين النجوم المضيئه ........... ضوّك يضوّي ضامي الشوق بدري
متلبّسـه بالجرم وانتي بريئه ........... من لبّسك في لبس الاجرام مدري!
الآدمي مهما أرتكب من خطيئه ........... لشاف مخطي قال ضيّقت صدري!

عبدالعزيز الحربي

29-11-2010, 08:30 PM

شربت كاس الحبّ من كفّ ساحر ..... واصبحت من كاسٍ به السحر مسحور
راع الهوى منحور والحـبّ ناحـر ..... وانا الذي من دون سـكّـين مـنـحــور!

عبدالعزيز الحربي

29-11-2010, 08:33 PM

ياطبيب القلب ماعندك دوا ......... يصلح لفؤاد مجروح الغرام
أشهد اني رحت في يدها هوا ......... ماصفالي لا شراب ولا طعام
من سرح بالقلب وابطى ماضوا ......... انتقم من صاحب القلب إنتقام
يامقــامـي يارفــيع المســتوى ......... إبق في موقعك الاول يامقام
كل ما ذيب الدهـر قدمــك عــوا ......... لد يم البندقيه والحزام
قــول ياسرحــان ملعــون الثـوا ......... كان تبغاها لعانه ياسلام
لو تبي نهرف سوا نهرف سوا ......... أو تبي ناكل بعض راي" تمام
من ورد حوض البلايا وارتوى ......... ماحسب للسقم بعد الإرتطام
جيت أعدل ساق بقعاء والتوى ......... ثم صار النور بعيوني ظلام
هو صحيح الصدر ولّع وانكوى ......... لاكن الصبر القوي فك اللحام
مايشيل الطور عن وادي طوى ......... غير من يحيي رميمات العظام
من قرا العنوان فهم المحتوى ......... غير دلخ" للفهم يحتاج عام

عبدالعزيز الحربي

29-11-2010, 08:35 PM

يزعل عليّه واعتذرله واقول أنس ..... لا قدّر أعذاري ولا شاف طيبي
يامـحـترم ياشـيخ يامـير يابـرنـس ..... ماني بـ قايل سـيّدي ياصحـيبي
ترا إختلاف الطبع والحال والجنس ..... مايخلف شعور الغلا ياحبيبي

عبدالعزيز الحربي

29-11-2010, 08:36 PM

عطني غلا واعطيك صدق وميانه ...... وازيـدهـن حـبٍٍّ يعـادل مـية حـبّ
أمّـا كـذا والاّ تـرا مـعـك أمـانــه ...... تبعد وانا أبعد لا مدايح ولا سبّ
الحـبّ له تخصـصـه وامـتـحـانـه ...... يعني مثل لو أطلـبك للطـلـب لـبّ
عندك ضمان الحبّ عندي ضمانه ...... وان كان ماعندك ضمان الهوى تب
الحبّ له عندي مقام ومكانه ...... والهجر عقب الوصل جرحٍ بعد طبّ
والقلب مركز والمشاعر كيانه ...... شيّد كيان القلب ياصافي القلب

عبدالعزيز الحربي

29-11-2010, 08:36 PM

بكيت لين انه صفا راسي وجفّت دمعتي .... ما ردّلـي كـثر البـكـا غـالـي ولا عيّنت خـير
ياوقت سجّل كلمتي واكتب بقايا حكمتي .... هو منهو اللي رجّع المفقود بالدمع الغزير؟!!

عبدالعزيز الحربي

29-11-2010, 08:37 PM

ياطـويل العـمـر مـن لا عـرف قــدر الرجــال .. .. ضـاع قــدره بـيـن نـاسٍ عـزاز نـفـوسـهـا
تدّعـي بالكـذب والكـذب هـو سـاس الضـلال .. .. ضـلّل أصـحــاب الريـا كــذبـهـا وفـلـوسـها
ليـه ماتـاخــذ تـجــارب مـن دروس اللـيــال؟ .. .. اللـيـال السـود تـنـفـعــك بـعــض دروسـها
مثل درس (إحساس الانسان يعطيه إحتمال) .. .. والصحيح (أخبار الامطار عند عسوسها)
ومثل (إذا تجهل طريق العـرب روح وتعـال) .. .. ثـمّ عـدّل مـشــيــةٍ كـنـت قـبــل تـحـوسـهـا
ومثل (حسن أخلاق الاحباب يدعو للوصال) .. .. ومثل درس (أفزع للاصحاب ترفع روسها)

عبدالعزيز الحربي

29-11-2010, 08:38 PM

هذي رساله واضحه ماتبي شـرح ......... مظمونها : ماعاد لي خلق بالنّتّ
النّتّ ضيقة خلق وانا أحسبه مرح ......... ياليـتـنـي فـي عـالـمـه ماتـبـيّـنـت
ياجرح تدري ويش يعنيلي الجرح؟ ......... الجــرح يـوم انّك بقـلـبـي تمكّـنت
يا من بنيت بداخلي عالي الصـرح ......... تعال واسكن داخل الصرح لا هنت

عبدالعزيز الحربي

29-11-2010, 08:39 PM

يامدوّرٍ من شجرة الحنظله ورد .......... الورد والحنظل لا يمكن تواجـه
إلا إذا ريـم الفـلا يشبه القرد !! .......... على كذا حتّى الحبارى دجاجه!

عبدالعزيز الحربي

29-11-2010, 08:40 PM

صحيح انّي غفلت وكنت ماحسب للامور حساب ...... لكنّي ناوي أنهض نهضةٍ ماعقبها غفله
أنا اللي كنت أجامـل واتحـمّـل لـيـن ظـنّـي خـاب ...... وانا اللي يوم ظنّي خاب أببدا شنّة الحمله
وانا إسـتاذ اللغـه والنحـو والتشكـيل والإعراب ...... يوم ان أكثر عباد الله مايعرف يعرب الجمله
وانا دكـتور فـي علـم الحـوادث تتـبـع الاسـبـاب ...... وباحث في مجال الفرق بين الجمع والعزله
أعرف الناصح الصادق واعرف المادح الكذّاب ...... صدوق الفعل أصدقله وراع الكذب أكذّبله
وانا جرّبت غـلـطــات القريب وغلطـة الاجـناب ...... لقيت ان القريب أشـدّ شـرّ وغلطـتـه خـبـله
ولاني مـلـحـق الدنيـا مـلام ولا عـلـيـهـا عــتاب ...... ملامي يوم ألـوم ألـوم رجـلٍ ضـيّـع القبله
يصلّي عـابـد الدنيــا وقـلـبـه عن صـلاتـه غـاب ...... ولو حــاولـت أعـدّل سـيرته ماهي بمنعدله

عبدالعزيز الحربي

17-01-2011, 11:02 PM

بمناسبة دعوة المنافقين لما يسمّونه (المساواه) بين الرجل والمرأة !!

المساواه بين الجنس والجنس الآخر ..... مطلبٍ لو تحبّون السماء ماتحقّق
لو قلبتم جبال طويق إلى قصر فاخر ..... ولو تمـعّـن معلّمكـم وركّــز ودقّـق
ماتقـود البـواخـر مـن يقـود البـواخـر ..... قفّل المحظر وطشّ القلم يامحقّق
ماتحوّل طريق السمع عبر المناخر ..... وثوب الايمان يبقى ضافيٍ ماتشقّق

عبدالعزيز الحربي

17-01-2011, 11:05 PM

يابنـي علمـان دوروا للـورا وارتـدّوا .......... هجمةٍ من رجل كافر شاتها وارتدّت
كم تلقّيتم هزيمه من طرفتا عدّوا .......... كم وكم حذفه حذفتونابها وانصـدّت

عبدالعزيز الحربي

29-10-2011, 10:46 PM

يابنـي علمـان دوروا للـورا وارتـدّوا .......... هجمةٍ من رجل كافر شاتها وارتدّت
كم تلقّيتم هزيمه من (طرفتا) عدّوا .......... كم وكم حذفه حذفتونابها وانصـدّت

ما بين القوسين خطأ مطبعي .
المقصود: (طرفنا) وليس (طرفتا) .

عبدالعزيز الحربي

29-10-2011, 11:00 PM

ياكاتب التاريخ وشلون تنسى؟=مواقفٍ نسيانها صعب جداً
إيطاليا والبرتغال وفرنسا=بعد اقبلن دارن ورا واستعدّن
باسباب بلقيس وخديجه وخنسا=الباديه فازت على اهل التمدّن

عبدالعزيز الحربي

29-10-2011, 11:09 PM

ابتسم واضحك ولكن بانتظام=ماحلا البسمه مع الجو اللطيف
ابتسم للنور من بعد الظلام=واعتبر نفسك على الايام ضيف
ابتسم وارسل مع البسمه سلام=للمصاب وللفقير وللضعيف

عبدالعزيز الحربي

28-07-2012, 09:07 AM

ياتاجر الورد لو تسمح نبي ورده=الورد مطلوب بين الحين والاخر
الحبّ سحرٍ طبيعي حرّه وبرده=وانا تفاصيل حبّي نوعها فاخر
ماكل ضامي غلا جمّ الغلا يرده=ولاكل قلبٍ بمكنون الغلا زاخر
طارد سراب الهوى ماينفعه طرده=لاضاق بدّل هواه بنقده الساخر

عبدالعزيز الحربي

12-11-2012, 12:51 AM

بنتك ليازوّجتها لاتشترط فوق اللزوم=
خلّ السفاهه للسفيه ان كان في وجهك حيا

والله ماياخذ زياده بالمهر غير الرخوم=
أهل الحقاره والدشاره واللعانه والريا

والاّ رجال المعرفه والطيب وافين السلوم=
يكمّلون الناقصه ويزوّجون الاتقيا

هم عارفين ان المطامع والدراهم ماتدوم=
وان الطماعه ماهي الاّ من سلوم الاغبيا

راع الطماعه يدّعي بالنصر لو كان مهزوم=
مايدري انّه صار هو وابليس بالدرب اخويا

غصون

12-11-2012, 02:29 AM

لاا علم هل يسمحلي ان ادخل

وتمتع بهذ الحساس الرااقي والحروف الجميل

ام اني تجاوزت حدودي وقتحمت خلوتك الخاصه

كلمات مكتوبه بماااءالذهب فيهاا كل الابدااع

الف شكر لك عليهااا

عبدالعزيز الحربي

13-11-2012, 02:56 PM

لاا علم هل يسمحلي ان ادخل

وتمتع بهذا الاحساس الرااقي والحروف الجميل

ام اني تجاوزت حدودي وقتحمت خلوتك الخاصه

كلمات مكتوبه بماااءالذهب فيهاا كل الابدااع

الف شكر لك عليهااا

حيــاك الله ياغصون

بالنسبة لي لا مانع لدي وأرحب فيك في كل وقت

واشكــرك على المتابعـــه والتعليــق الجميــل

عبدالعزيز الحربي

13-11-2012, 02:56 PM

https://pbs.twimg.com/media/A7heUgyCAAAVxxo.jpg

عبدالعزيز الحربي

04-03-2014, 12:55 PM

ان كان عند ابليس خطّه محكمه عندي صبر
الصبر يكشف خطّة المارد ويدمغ حجّته

يابليس حنا مانسينا الموت واهوال القبر
واللي يهجّ اليوم بكره ماتفيده هجّته

بكره وجيهٍ مسفره بالحيل ووجيهٍ غبر
من لا نجا باسباب فعله عزوته مانجّته

كلّ المشاكل خلفها شيطان هل من معتبر؟
من يصنع الرجّه يبا يلقا عواقب رجّته

وانا لقيت ابليس ناثر مع طريق الورد ابر
ماشفته بعيني ولكن شفت اثره وعجّته

يالله ياللي بامرك عظامٍ كسيره تنجبر
تغفر ذنوب الشاعر اللي سجّ وابطت سجّته

عبدالعزيز الحربي

04-03-2014, 12:58 PM

الهرج لامنّه كِثر حول موضوع
تشعّب الموضوع واصبح مواضيع

مفروض ما للهرجه اقسام وفروع
من شان مانحتاج مشروع تجميع

أحيان تلقا الهرج في سطر مجموع
واحيان يبغاله مطابع وتوزيع

الاختصار اللي به الزود ممنوع
أفضل من السرد المزوّد بتسريع

كم كلمةٍ تنشي ثمانين مشروع
وكم هرجةٍ طالت ولدّت مشاريع

أحدٍ كلامه لاتكلّم يجي نوع
واحدٍ ينوّع وجهة الهرج تنويع

النوع الاول ياصف الكوع بالكوع
والنوع الاخر يلحق الكوع تكويع

تمّ الكلام وزايد الهرج موضوع
للهرج حدّ وللسفر فيه توديع

عبدالعزيز الحربي

04-03-2014, 01:07 PM

عطني تفاصيل الخبر وازهل الشرح
هل تشعر براحه اذا شفتني جيت؟

اذا [نعم] جيتك وانا خاطري مرح
واذا [لاوالله] لو تنــادي تعدّيت

لو كنت باني في طرف منزلك صرح
خلّــيت صرحي صدقةٍٍ لك وشدّيت

انا حياتي (غاب جرح وحضر جرح)
ماعــاد لي خاطــــر بيمكن وياليت

عبدالعزيز الحربي

04-03-2014, 01:14 PM

ياصديقـي كان باقي بـ دنيـاك اصدقا ......... لاتشــيل همـوم دنيـاك والدنيـا ســراب
مثل ماتلـقــا سعــاده تبا تلقــا شــقــا ......... والزمن ماضي ولابه حظور بلا غياب
إن شكـيت من المفارق ترا باقي لقـا ........ من فقـدتــه يمكن تحـصّله يوم الحساب
وان توقّعت السلامه على وضح النقا ........ وابتلتك همـوم وغمـوم يكفيك احتساب
لاتفكّــر كـم مضى من زمان وكم بقى؟ ......... ثمّ تدخـل في متاهـه وضـيقه واكتئاب
ركّــز التفكــير باللي نزل واللي رقـا ......... واخذ من هذا وهذا مفاتيـح الصـــواب
التجارب مدرســه والمـدارس ملتقى ......... تجمع اصحاب المهمّات شيبان وشباب

عبدالعزيز الحربي

04-03-2014, 01:34 PM

لله در اخـــوانــنــا فـي ســوريا
صدّوا جيوش الكفر بسلاح الثقه

وقــفــاتــهــم لله مافـيـهــا ريــا
والاّ من يقابــل قـذيفـه بفشقــه؟!

واعمال جيش الفرس قتل الابريا
ولياقتل مسلــم يقــوم ويحرقــه

الحقــد كـم دمّــر كـنــوز الاثريــا
ياللي تحسب المعركه لعب ورقه

عبدالعزيز الحربي

04-03-2014, 01:38 PM

الابتسامه والرضا والقناعه
مع صبر ماينفد وقوّة تحِمّل

تجلب نزول الضغط عقب ارتفاعه
ركّز على هذا الكلام وتآمّل

نفّذ قوانين الكرم والشجاعه
كانك على كسب الجمايل مصمّل

لا تعتذر وتقول ماش استطاعه
خلّك مع اصحاب الجميل وتجمََّل

أحذر تصدّ وتبتلى بالقطاعه
وتصير لضروف الليالي مكمّل

عبدالعزيز الحربي

04-03-2014, 01:40 PM

الروح تسلا عن غرامه وتدله ........... ولياحظر طاريه حبّه تجدد
ماني ضحيّه بين ظلمه وعدله ........... لكنّ لي مطلب ولاني محدد
عاقد عقد حبل الهوى وانعقدله ........... قام يتفاخَر بالوقوف وتمدد
وانا لي اقدامٍ مع الدرب عدله ........... من قوّة الصمله نسيت التردد

عبدالعزيز الحربي

04-03-2014, 01:49 PM

ياشام لاتحزنك فزعات الاحـزاب ............ الله جـمـعـهـم والنهـايـه قريبــه
الروم بالاردن يحــدّون الانيــاب ........... والفرس من طهران ترسل كتيبه
الكفر واحد واصدق القوم كذّاب .......... والحرب خدعه والتفاوض غليبه
ما يرضي الكفّار مذكور بكـتـاب ............ يعني رضى الكافر علينا مصيبه

عبدالعزيز الحربي

04-03-2014, 01:54 PM

الذكريات اللي تسبب لك احزان ....... حاول تجنّب ذكرها قدر اﻻمكان
اترك ما كان وفكّر بوضعك اﻻن ....... ﻻتشـغــل افــكــــارك بشـيٍٍّ تعـدّا

ولياجتمع في بالك افكار وافكار ....... مابين زين وشين واقبال وادبار
عليك بالقرآن مع بعض اﻻذكار ........ جاك الدوا مضمون ياشاكي الدّا

دنيــــاك مليانه هموم وبلاوي ........ يبغالهــا رجــلٍ بعـــيـد الحـراوي
ماتنفع القـــوّه وكثر العزاوي ........ تبـغـى تفــصّـل ثوب لازم تقـــــدّا

يعني بمعـنـى اخــر : تدبّـر وفـكّر ........ يمكن نسيت وبعد ساعه تذكّـــر
بالصبر يصفي جوّك اللي تعـكّـر ....... ولياتحـــدّتـك الصعــايب تحـــدّا

تبغاني اضربلك مثل واختصرلك؟ ........ طيّب تعال اسمع كلامي من اجلك
خذلك من السوّاق منهج ومسلك ........ يسرع واذا شاف المطــبّـات هدّا

خليف الوهيداني

18-03-2014, 02:18 PM

الله واكبر

ذكريات جميله

وبارك الله بالذكريات اللي طلعت

لنا من عبدالعزيز الحربي هالدرر

لله درك من شاعر والله اني انسجمت معها

وتمتعت بها

لك احترامي

عبدالعزيز الحربي

06-10-2015, 01:10 AM

خليف الوهيداني

حياك الله

أشكرك على هذا الثناء الذي لايصدر إلا من الأوفياء شرواك

عبدالعزيز الحربي

14-02-2023, 01:02 PM

يوم الرسول وصاحبه في غار ضلع ام القرى
وقريش تدفع للذي يلقاه نص نياقها

أثنين والعدوان كم ؟ ورغم ذلك وش جرى ؟
تبرق مزون ابو لهب لين احرقه براقها

ياللي تشد اطنابها واوتادها جرف وثرى
لـ طاح واسط خيمة الحكمه يطيح رواقها